ក្រោយសម្រេចចិត្តបញ្ចប់ចម្រូងចម្រាស់ផ្លូវច្បាប់ក្រោមហេតុផលទទួលយកការសម្របសម្រួល និងសំណងទឹកប្រាក់ត្រឹមតែ១ម៉ឺនដុល្លារ តារាចម្រៀងកញ្ញា ទេព បូព្រឹក្ស បានអះអាងថា កញ្ញានៅតែរក្សាជំហរយកទឹកប្រាក់សំណងដែលខ្លួនទទួលបានទៅជួយដល់សង្គមដដែល បើទោះជាចំនួនដែលនាងទទួលបានបានត្រឹមតែ១ភាគ១០នៃសំណើរ។ នាងប្រកាសជំហរនេះ នៅក្នុងវេទិកាសន្និសីទកាសែតកាលពីរសៀលថ្ងៃទី២៨ធ្នូ ដោយមានទាំងភាគីអ្នកបង្កចេញមុខសុំទោសជាសាធារណៈនៅចំពោះមុខអ្នកកាសែត។
កញ្ញា ទេព បូព្រឹក្ស ថ្លែងថាហេតុផលដែលកញ្ញាសម្រេចចិត្តដកពាក្យបណ្ដឹង និងយល់ព្រមបញ្ចប់រឿងក្ដីជះស្រាប៊ៀ និងគប់កំប៉ុងស្រាប៊ៀមកលើនាងនេះ គឺដោយសារតែភាគីជនបង្កឈ្មោះ រស្មី ជានិស្សិតឆ្នាំទី១ ផ្នែកគ្រប់គ្រង និងភាគីម្ចាស់ហាងសមុទ្រនៅខាងក្រោយពេទ្យកុមារជាតិ យល់ព្រមសុំទោសរូបនាងជាសាធារណៈនូវអ្វីដែលបានកើតឡើង ទី២យល់ព្រមបង់ជំងឺចិត្តអោយនាងចំនួន១ម៉ឺនដុល្លារ និងបានចុះកិច្ចសន្យារមិនគុំគួនគ្នា។
នាងថា ខ្លួនមិនខ្វល់ពីការបានសំណងត្រឹមតែ១ភាគ១០ក្នុងចំនួនដែលបានទារនោះទេ ដោយសារតែនាងចង់បានធំបំផុតគឺត្រឹមតែពាក្យសុំទោសតាំងពីពេលកើតហេតុភ្លាមៗ ប៉ុន្តែដោយសារតែរឿងរ៉ាវបានអូសបន្លាយធ្លាក់ដល់ការប្ដឹងផ្ដល់ ទើបនាងឈានដល់ការកំណត់ទារសំណង១០ម៉ឺនដុល្លារ លើការបាត់បង់កិត្តិយស និងការខូចខាតការងារក្នុងពេលចម្រូងចម្រាស់ ដោយប្រកាសថានឹងយកប្រាក់នោះទៅជួយសង្គម មិនប៉ះពាល់ជាប្រយោជន៍ផ្ទាល់ខ្លួននោះឡើយ។
យ៉ាងណាមិញ នាងនៅតែប្រកាន់ជំហរនាំយកទឹកប្រាក់១ម៉ឺនដុល្លារ ដែលបានទទួលពីជនបង្កនៅថ្ងៃសន្និសីទកាសែតនោះយកទៅជួយក្មេងៗ និងចាស់ជរា ដោយនាងសម្រេចថា នឹងយក៣ពាន់ដុល្លារជូនដល់មន្ទីរពេទ្យគន្ធបុប្ផា ហើយចំនួន៧ពាន់ដុល្លារទៀត នឹងប្រើសម្រាប់ធ្វើកិច្ចការសង្គមផ្សេងៗ ដូចជាធ្វើជាអំណោយចែកដល់ចាស់ៗ និងទុរគតជន ដែលនាងនឹងប្រកាសលើផេកនៅពេលចេញធ្វើសកម្មភាពម្ដង។
លោក រស្មី ដែលអះអាងថាជាជនបង្កហេតុ (ពាក់អាវយឺតស និងអាវក្រៅពណ៌គគី) បានអះអាងថា ហេតុការនៅក្នុងថ្ងៃនោះ គឺដោយសារតែលោកផឹកស្រវឹង ហើយបាត់បង់ស្មារតីទើបនាំអោយលោកឈានដល់ការជះស្រាប៊ៀ និងគប់កំប៉ុងទៅកាន់តារាចម្រៀងនាង ទេព បូព្រឹក្ស ដោយមិនបានដឹងថានោះជាទង្វើខុសឆ្គងឡើយ។ លោកប្រកាសសុំទោស និងថា នឹងមិនអោយមានករណីនេះជាលើកទី២នោះឡើយ។
ដូចគ្នាភាគីខាងម្ចាស់ហាងសមុទ្រ ក៏បានសារភាពថាហេតុផលដែលលោកមាត់ធំអោយ ទេព បូព្រឹក្ស មុនពេលកើតរឿង ក៏ដោយសារតែនោះគឺជារឿងយល់ច្រលំជុំវិញបញ្ហាម៉ោងពេលផងដែរ ដោយលោកមានតែប្រកាសសុំទោស និងសម្ដែងការសោកស្ដាយ។ លោកថា ក្នុងហាងសមុទ្រពិតជាមានកាមេរ៉ា ប៉ុន្តែកាមេរ៉ាទាំងអស់មានសភាពខូច និងខានប្រើប្រាស់យូរហើយ ទើបរូបភាពពាក់ព័ន្ធនឹងទិដ្ឋភាពដែលបានបង្កចំពោះ ទេព បូព្រឹក្ស លោកថាមិនមាន។
ជាមួយនឹងការបញ្ចប់ចម្រូងចម្រាស់នេះ អ្នកគាំទ្រ ទេព បូព្រឹក្ស យល់ថាជាការផ្ដល់អោយនាងនូវយុត្តិធម៌មួយដ៏ប្រសើរ បើទោះជាមានការវិភាគថា បុរសដែលមកសុំទោសថាខ្លួនជាអ្នកគប់មានរូបរាងស្គមមិនដូចបុរសដែលគេថតបានភ្លាម ហើយការបកស្រាយរបស់ភាគីអ្នកអះអាងថាខ្លួនជាអ្នកគប់និងម្ចាស់ហាង មិនសូវសមស្របនឹងអ្វីដែល ទេព បូព្រឹក្ស បានប្រកាសក្ដែងៗភ្លាមៗពេលមានរឿង៕