អាជ្ញាធរខេត្តព្រះសីហនុ បានធ្វើការឃាត់ខ្លួនជនជាតិចិនម្នាក់ក្នងចំណោមបក្សពួក៣នាក់ ពាក់ព័ន្ធករណីមនុស្សឃាតដោយចេតនាលើបុរសម្នាក់ដែលជាជនជាតិចិនដូចគ្នា។
គេហទំព័រអគ្គស្នងការដ្ឋាននគរបាលជាតិ ដែលបានដកស្រង់របាយការណ៍របស់មន្ត្រីនគរបាលខេត្តព្រះសីហនុ បានចុះផ្សាយនៅថ្ងៃទី១ ខែមករា ឆ្នាំ២០១៩ នេះ ថា កាលពីម្សិលមិញជនសង្ស័យជាជនជាតិចិន៣នាក់ បានធ្វើសកម្មភាពសម្រុកចូលក្នុងរថយន្តរបស់ជនរងគ្រោះជាជនជាតិចិនដូចគ្នាដែលមានមុខរបរជាវិស្វករ។
ប្រភពដដែលឲ្យដឹងថា ជនសង្ស័យទាំង៣នាក់ បានប្រើកូនកាំបិតស្នៀត ០១ដើម និងកាំភ្លើងខ្លី០១ដើម ក្នុងពេលដែលពួកគេកំពុងវាយ និងយកកាំភ្លើងភ្ជង់គម្រាមកំហែងជីវិតរបស់ជនរងគ្រោះនៅក្នុងរថយន្ត តែត្រូវកម្មកររបស់ជនរងគ្រោះឃើញទើបពួកគេនាំគ្នារត់គេចខ្លួន។ ប្រភពខាងលើ ឲ្យដឹងបន្ថែមថា ចំពោះជនសង្ស័យ០២នាក់ទៀតដែលរត់គេច កម្លាំងសមត្ថកិច្ចខេត្តព្រះសីហនុកំពុងស្វែងរកចាប់ខ្លួនពួកគេ។
តាមការចុះផ្សាយរបស់គេហទំព័រអគ្គស្នងការដ្ឋាននគរបាលជាតិ ការវាយប្រហារនេះ បានបណ្ដាលឲ្យជនរងគ្រោះរងរបួសស្នាមជាំនៅកញ្ចឹងក។
យោងតាមរបាយការណ៍ ចុះកាលពីថ្ងៃទី២៤ ខែមករា ឆ្នាំ២០១៨ ដែលផ្ញើទៅរដ្ឋមន្ដ្រីក្រសួងមហាផ្ទៃ អភិបាលខេត្តព្រះសីហនុ លោក យន្ដ មីន បានគូសបញ្ជាក់ថា ក្នុងឆ្នាំ២០១៧ ជនបរទេសចូលមកស្នាក់នៅក្នុងខេត្តព្រះសីហនុ មានចំនួន ៦ ៣៨៥នាក់ ក្នុងនោះ ជនជាតិចិនមានច្រើនជាងគេ គឺ ៤ ៤៩៨នាក់ ឥណ្ឌូណេស៊ី មាន៩០៩នាក់ ហ្វីលីពីន ១២៧នាក់ ម៉ាឡេស៊ី ១២២នាក់ និងជនជាតិផ្សេងៗទៀត៕