មេដឹកនាំបក្សកាន់អំណាចលោក ហ៊ុន សែន បានផ្ញើសារជូនពរឆ្នាំថ្មីឆ្នាំសកល២០១៩នេះ ផ្តោត លើគោលនយោបាយឈ្នះ-ឈ្នះ ធានាបានសន្តិភាពពេញលេញ ខណៈអតីតមេដឹកនាំបក្សប្រឆាំង លោក កឹម សុខា ដែលត្រូវបានគេឃុំខ្លួនក្នុងផ្ទះ បានរិះគន់ពីការធ្វើនយោបាយអគុណធម៌ ចំណែកលោក សម រង្ស៊ី សន្យាចូលស្រុកវិញឆាប់ៗ ។
លោកនាយករដ្ឋមន្ត្រី ហ៊ុន សែន បានសរសេរនៅហ្វេសប៊ុករបស់លោកថា នៅរាត្រីឆ្លងឆ្នាំនេះថា មនុស្សច្រើនម៉ឺននាក់ បានទៅចូលរួមកម្មវិធីនៅវិមានឈ្នះ-ឈ្នះ ក្នុងបរិយាកាសសប្បាយរីករាយក្រៃលែង។ នៅលើហ្វេសប៊ុកលោកបានបង្ហាញរូបថតអង្គុយរួមតុជាមួយភរិយា បង្ហាញនូវស្នាមញញឹម។
មេដឹកនាំបក្សកាន់អំណាចរូបនេះបានសរសេរទៀតថា ភាពសប្បាយរីករាយទាំងអស់នេះកើតមានដោយសារតែកម្ពុជាមាន «សុខសន្តិភាព» ពេញលេញ ដែលថា នាំឲ្យការលេងកម្សាន្តរបស់ប្រជាពលរដ្ឋមិនមានការព្រួយបារម្ភនោះឡើយ។ លោក ហ៊ុន សែន ក៏បានជូនពរជនរួមជាតិ រួមទាំងមន្រ្តីរាជការ កងកម្លាំងប្រដាប់អាវុធគ្រប់ប្រភេទ ជួបតែសេចក្តីសុខ សុភមង្គល ក្នុងក្រុមគ្រួសារ និងមានលាភសំណាងល្អគ្រប់ៗគ្នា ចាប់ពីថ្ងៃចូលឆ្នាំសកលថ្មី២០១៩ នេះតទៅ។
ចំណែកអតីតមេដឹកនាំបក្សប្រឆាំងលោក កឹម សុខា ដែលតុលាការបន្តឃុំខ្លួននៅក្នុងផ្ទះនៅឡើយនោះ ក្រៅពីជូនពរដល់ជនរួមជាតិជួបនូវសុភមង្គល លោកបានសរសេរថា៖
«សូមឲ្យទំព័រប្រវត្តិសាស្ត្រថ្មីនេះចាប់ផ្តើមពីមេដឹកនាំគ្រប់និន្នាការ ដើម្បីជាគំរូ ដោយបញ្ឈប់ការធ្វើនយោបាយតាមបែបអគុណធម៌ មិនថាតាមរយៈការគំរាមកំហែង ឬការមួលបង្កាច់ ហេីយវិលរកទសពិធរាជធម៌វិញ ដើម្បីត្រួសត្រាយផ្លូវជូនប្រជាពលរដ្ឋ ជាពិសេសកូនខ្មែរជំនាន់ក្រោយ»។
លោក កឹម សុខា ក៏បានសរសេបន្ថែមថា លោកចង់ឃើញ ប្រជាពលរដ្ឋខ្មែរទទួលបាននូវសុខសន្តិភាព និងវឌ្ឍនភាពតាមគោលការណ៍ប្រជាធិបតេយ្យ ចាប់ផ្តើមពីការផ្សះផ្សាជាតិពិតប្រាកដមិនយកខ្មែរណាជាសត្រូវ លុបបំបាត់ការគាបសង្កត់ជិះជាន់ គំរាមកំហែង អំពើហិង្សា ការលាបពណ៌ ជេរប្រមាថ និងបង្ខូចកេរ្តិ៍ឈ្មោះជាដើម។
ចំណែកអតីតមេដឹកនាំបក្សប្រឆាំងមួយរូបទៀតដែលកំពុងនិរទេសខ្លួន គឺលោក សម រង្ស៊ី បានផ្ញើសារខ្លីថា៖
«ខ្ញុំជឿជាក់ថា យើងនឹងបានជួបជុំគ្នាវិញក្នុងឆ្នាំ២០១៩ នេះ។ សូមជូនពរឲ្យបងប្អូនកូនក្មួយ ជួបប្រទះតែសេចក្តីសុខ និងសេចក្តីចម្រើនគ្រប់ប្រការ ចាប់ពីពេលនេះតទៅ»។
អ្នកវិភាគវ័យក្មេង កញ្ញា លី ស្រីស្រស់ និយាយថា ជាធម្មតាមេដឹកនាំនយោបាយមាននិន្នាការខុសគ្នា តែងតែផ្ញើសារនយោបាយផ្ទុយគ្នា ប៉ុន្តែកញ្ញាថា មានតែការផ្សះផ្សាជាតិឡើងវិញទេ ទើបអាចទាក់ទាញអ្នកវិនិយោគ និងទប់ស្កាត់ការបែកបាក់ជាតិបាន។
កញ្ញា លើកឡើងថា៖ «បើសិនជាយើងនៅតែបន្លាយអាការបែកបាក់ហ្នឹងឲ្យទៅរហូត អាហ្នឹងមានន័យថា ប្រជាពលរដ្ឋដែលគាំទ្រនិន្នាការគណបក្សប្រឆាំងហ្នឹង ហាក់ដូចជាមិនអាចរួមសុខរួមទុក្ខក៏ដូចជារស់នៅសុខដុមរមនានៅក្នុងសង្គមនេះបានល្អទេ។ ឥឡូវ ខ្ញុំលើកឧទាហរណ៍ថា ការសម្ពោធវិមានឈ្នះ-ឈ្នះ របស់លោកនាយករដ្ឋមន្ត្រីនេះអញ្ចឹង មានន័យថា អ្នកមាននិន្នាការគណបក្សប្រឆាំងខ្លះគាត់រិះគន់ គាត់គិតថារដ្ឋាភិបាលហ្នឹងមើលបញ្ហារំលងឲ្យតម្លៃអានោះពេក អត់គិតដោះស្រាយបញ្ហាជាតិ»។
លោក សម រង្ស៊ី បាននិរទេសខ្លួនម្តងទៀតអំឡុងឆ្នាំ២០១៦ ក្រោយពីតុលាការសើរើបណ្តឹងរបស់អតីតរដ្ឋមន្ត្រីក្រសួងការបរទេស លោក ហោ ណាំហុង និងបណ្តឹងថ្មីមួយទៀតពីមន្ត្រីបក្សកាន់អំណាច ទាក់ទិននឹងការរិះគន់ហ្វេសប៊ុករបស់នាយករដ្ឋមន្តី្រ។ ចំណែកលោក កឹម សុខា ត្រូវសមត្ថកិច្ចឆ្មក់ចូលឆ្នាំខ្លួនទាំងយប់ ឈានចូល ថ្ងៃទី៣ ខែកញ្ញា ឆ្នាំ២០១៧ ដែលលោក ហ៊ុន សែន ថា លោកជាអ្នកបញ្ជាឲ្យចាប់ដោយចោទថា «ក្បត់ជាតិ»៕