ក្មេងប្រុសម្នាក់បាត់បង់ជីវិត ហើយក្មេងប្រុសបីនាក់ទៀតរួចផុតពីគ្រោះថ្នាក់ក្នុងករណីបាក់ច្រាំងទន្លេមេគង្គ នៅស្រុកមុខកំពូល ខេត្តកណ្តាល នាដើមសប្តាហ៍នេះ ប៉ុន្តែសកម្មជនបរិស្ថានសង្ស័យថា ករណីបាក់ច្រាំងនេះពាក់ព័ន្ធការបូមខ្សាច់។
យោងតាមការចុះផ្សាយរបស់អគ្គស្នងការដ្ឋាននគរបាលជាតិ នៅថ្ងៃទី២ ខែមករា ឆ្នាំ២០១៩ នេះបានឲ្យដឹងថា ក្នុងករណីបាក់ច្រាំងទន្លេ កាលពីថ្ងៃទី៣១ ខែធ្នូ ឆ្នាំ២០១៨កន្លងទៅនេះ បណ្តាលឲ្យក្មេងប្រុសចំនូន៤នាក់ធ្លាក់ចូលក្នុងទន្លេមេគង្គ ដោយបាត់ខ្លួនម្នាក់ និងផុតពីគ្រោះថ្នាក់ចំនូន៣នាក់។ ក្មេងប្រុសដែលបានបាត់ខ្លួននោះឈ្មោះ ឃាន់ ម៉េងហេង ភេទប្រុស អាយុ១៤ឆ្នាំ ជាសិស្សថ្នាក់ទី៧ នៅអនុវិទ្យាល័យព្រែកដំបង ។
ប្រភពដដែលបានឲ្យដឹងថា ក្មេងប្រុសរងគ្រោះ និងមិត្តភក្តិរបស់គាត់បាននាំគ្នាទៅឈរលើច្រាំងជាប់មាត់ទន្លេបន្ទាប់ចេញពីសាលារៀន ហើយបាននាំគ្នាយកជើងអង្រុនដី ស្រាប់តែពេលនោះក៏បាក់ស្រុតដីចូលក្នុងទន្លេ បណ្តាលឲ្យក្មេងប្រុសទាំង៤នាក់ ធ្លាក់ចូលក្នុងទឹកទន្លេ ខណៈនោះក្មេងប្រុសចំនួន៣នាក់ បានស្រវ៉េស្រវ៉ាហែលឡើងមកលើគោករួចខ្លួន រីឯក្មេងប្រុសរងគ្រោះនោះ បានបាត់ខ្លួនធ្លាក់ទៅក្នុងច្រាំងទន្លេនោះ។ ចំណែកឯច្រាំងទន្លេរដែលបានបាក់ស្រុតនោះមានបណ្ដោយប្រវែងប្រមាណ២០ម៉ែត្រ ជម្រៅប្រមាណ៧ម៉ែត្រ ។
អធិការរងស្រុកមុខកំពូល លោក នូវ សាវុធ បានប្រាប់ វីអូឌី ថា សមត្ថកិច្ចនិងក្រុមគ្រួសារ បានរកឃើញសាកសពក្មេងរងគ្រោះ នៅព្រឹកថ្ងៃទី៣ ខែមករា ឆ្នាំ២០១៩នេះ ហើយក្រុមគ្រួសារបានយកសាកសពនោះ ទៅធ្វើបុណ្យតាមប្រពៃណី ។
សកម្មជនបរិស្ថាន កញ្ញា លីម គីមស័រ បានប្រាក់ វីអូឌី ឲ្យដឹងថា នៅតាមបណ្តោយទន្លេមេគង្គមានសាឡង់បូមខ្សាច់ជាច្រើន ហើយមានច្រាំងទន្លេបាក់ជាបន្តបន្ទាប់ ដែលបណ្តាលមកពីការបូមខ្សាច់នេះ។ កញ្ញាសង្ស័យថា ការបាក់ច្រាំងដែលបណ្តាលឲ្យក្មេងប្រុសម្នាក់ស្លាប់នេះអាចជាប់ពាក់ព័ន្ធការបូមខ្សាច់ ហើយកញ្ញានឹងចុះទៅស្រាវជ្រាវរកមូលហេតុនៃការបាក់នៅចុងសប្តាហ៍នេះ។
កញ្ញា លីម គីមស័រ បានមានប្រសាសន៍ថា៖ « សម្រាប់ការបាក់ច្រាំងហ្នឹងដូចជាគ្មានបញ្ហាអ្វីក្រៅពីការប្រមូលផលខ្សាច់នឹងទេ។ តាមការសិក្សារបស់ខ្ញុំនៅតាមដងទន្លេមេគង្គ ខ្ញុំក៏បានសាកសួរទៅប្រជាជនដែល ថាតើមុនពេលដែលមានការបូមខ្សាច់មានការណីបាក់ច្រាំងនិងអត់? ប្រជាជនតែងតែឆ្លើយថាអត់មានទេ ប៉ុន្តែបន្ទាប់ពីមានការមូនខ្សាច់ ការបាក់ច្រាំងនិងពិតជាខ្លាំងក្លាមែនទែន » ។
កាលពីខែតុលា ឆ្នាំ២០១៨ មានករណីបាក់ច្រាំងទនេ្លមេគង្គស្ថិតក្នុងខណ្ឌច្បារអំពៅ ក្រុងភ្នំពេញ ដែលបណ្តាលឲ្យចេតិយ៍ពីរធ្លាក់ចូលក្នុងទន្លេ ហើយប្រជាពលរដ្ឋអះអាងថាការបាក់ស្រុតនេះបណ្តាលមកពីការបូមខ្សាច់៕
