ពលរដ្ឋនៅសហគមន៍បុរីកីឡាដែលមិនទាន់ទទួលបានសំណង រួមជាមួយពលរដ្ឋរងគ្រោះដីធ្លីមកពីសហគមន៍ផ្សេងទៀត មានគ្នាប្រមាណជិត៥០នាក់ បាននាំគ្នាធ្វើពិធីរំឭកខួប៧ឆ្នាំ នៃការបណ្តេញពីលំនៅឋានទាំងបង្ខំនៅថ្ងៃនេះ។
លំនៅឋានពលរដ្ឋសហគមន៍បុរីកីឡា ត្រូវបានក្រុមហ៊ុនផានអ៊ីម៉ិចរបស់អ្នកស្រី ស៊ុយ សុផាន និងសមត្ថកិច្ចរាជធានីភ្នំពេញ ឈូសឆាយចោលនៅអំឡុងឆ្នាំ២០១២ បើទោះបីជាពលរដ្ឋបដិសេធចាកចេញពីលំនៅឋានរបស់ពួកគេក៏ដោយ។
តំណាងពលរដ្ឋសហគមន៍ អ្នកស្រី ស ស៊ន ដែលអះអាងថា មិនទាន់ទទួលបានសំណងនៅឡើយនោះ ប្រាប់ វី.អូ.ឌី ថា អ្នកស្រី និងពលរដ្ឋដទៃទៀត នៅតែឈឺចាប់មិនអាចបំភ្លេចបាន នៅពេលនឹកដល់សកម្មភាពបណ្ដេញចេញទាំងបង្ខំកាលពីថ្ងៃទី៣ ខែមករា ឆ្នាំ២០១២។
អ្នកស្រី សន ស៊ន ប្រាប់ថា៖ «ដោយសារថ្ងៃទី៣ មករា ក្រុមហ៊ុនផានអ៊ីម៉ិច ដាក់កម្លាំងចម្រុះមកឈូសផ្ទះពួកមីងហ្នឹង អត់មានការជូនដំណឹងមុន ឬមានដីកាពីតុលាការអីទេ ចាប់ផ្តើមឈូសផ្ទះពួកមីង ៣៨៤ខ្នងផ្ទះ បំផ្លិចបំផ្លាញទ្រព្យសម្បត្តិ ប្រើអំពើហិង្សាលើរូបមីង និងអ្នកផ្សេងៗទៀត ចាប់ពួកគាត់អ្នកគុក ៨នាក់ ហើយពួកមីងតាំងពីពេលហ្នឹងមក បានការឈឺចាប់ បាត់បង់មុខរបរកស៊ី ជំពាក់បំណុលគេច្រើន និងមានការរើសអើងជាដើម»។
តំណាងពលរដ្ឋរូបនេះ បន្តថា គម្រោងធ្វើពិធីរំឭកខួបលើកនេះ គឺអ្នកភូមិបាននិមន្តព្រះសង្ឃសូត្រមន្តតាមបែបសាសនា ដើម្បីរំដោះគ្រោះ និងគ្រោងលើកបដាបង្ហាញសារជំរុញទៅអាជ្ញាធរឲ្យពន្លឿនដោះស្រាយសំណងដែលពួកគាត់អាចទទួលយកបាន ប៉ុន្តែ អ្នកស្រីថា អាជ្ញាធរហាមមិនឲ្យលើកបដានោះទេ។
ពលរដ្ឋម្នាក់ អ្នកស្រី ភោក សុភីន ឲ្យដឹងថា ពលរដ្ឋមួយចំនួនដែលមិនទាន់ទទួលបានសំណងនោះ បច្ចុប្បន្ន គឺកំពុងស្នាក់នៅលើអគារចាស់មួយកន្លែងក្នុងសហគមន៍បុរីកីឡា។ អ្នកស្រីបន្តថា ការពន្យាពេលមិនផ្តល់សំណងសមរម្យជូនពលរដ្ឋទាំងនោះ បានធ្វើឲ្យពួកគេជួបការលំបាកជាច្រើន។
អ្នកស្រីបន្ថែមថា៖ «ខ្ញុំសំណូមពរទៅរដ្ឋាភិបាលដោះស្រាយបុរីកីឡាបញ្ចប់ទៅ កុំទុកពួកខ្ញុំរីងរៃតទៅទៀត ហើយកន្លែងណាដែលត្រូវអភិវឌ្ឍ កុំអភិវឌ្ឍដូចនៅបុរីកីឡា ព្រោះអ្នកបុរីកីឡាជួបការលំបាកច្រើនណាស់នៅលើគំនរសំរាមដោយសារអត់ផ្ទះ អភិវឌ្ឍលើទឹកភ្នែករាស្រ្ត។ ពួកខ្ញុំឈឺចាប់ណាស់។ រដ្ឋាភិបាលអភិវឌ្ឍកាន់ជើងតែអ្នកមានលុយ មានអំណាចទេ គាត់ធ្វើការពុករលួយធ្វើ ដោះស្រាយមិនមានភាពយុត្តិធម៌ទេ បើគាត់មានភាពយុត្តិធម៌ គាត់សង់ ១០អគារហើយ»។
អ្នកនាំពាក្យសាលារាជធានីភ្នំពេញលោក ម៉េត មាសភក្តី សុំមិនធ្វើអធិប្បាយលើរឿងនេះទេ ដោយលោកថា ជាប់រវល់។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា អាជ្ញាធរមូលដ្ឋានដោះស្រាយពុំមានតម្លាភាព ដោយលោកជំរុញទៅអាជ្ញាធរពាក់ព័ន្ធត្រូវយកច្បាប់ជាគោលក្នុងការដោះស្រាយបញ្ចប់វិវាទដីធ្លីនេះ ជាជាងប្រើអំណាចគំរាមកំហែងដើម្បីដោះស្រាយ។
លោក អំ សំអាត បន្តថា វិវាទដីធ្លីនៅបុរីកីឡានេះ ពលរដ្ឋរងផលប៉ះពាល់មួយចំនួនបានចេញតវ៉ា និងពលរដ្ឋខ្លះទៀតមិនបានចេញតវ៉ានោះទេ ដោយសារស្តាប់តាមអាជ្ញាធរ។
លោកបន្ថែមថា៖ «សំខាន់បំផុត អាជ្ញាធរមូលដ្ឋាន និងអាជ្ញាធរថ្នាក់ក្រោមហ្នឹង ត្រូវដោះស្រាយបញ្ហាទាំងអស់នេះ។ យើងជាសង្គមស៊ីវិល យើងតែងតែផ្តល់អនុសាសន៍តាំងពីដើមមក យើងធ្វើការដោះស្រាយអ្វីក៏ដោយ យើងត្រូវយកច្បាប់មកធ្វើការដោះស្រាយ កុំដោះស្រាយតាមលក្ខណៈបុគ្គល តាមលក្ខណៈនៃអំណាច»។
បើតាមតំណាងពលរដ្ឋអ្នកស្រី ស ស៊ន ឲ្យដឹងថា សម្រាប់ក្រុមពួកគាត់នៅ ៧គ្រួសារទៀតមិនទាន់ទទួលបានដំណោះស្រាយ ខណៈក្រុមពលរដ្ឋផ្សេងទៀតដែលមិនធ្លាប់ចេញតវ៉ា ហើយកំពុងស្នាក់នៅលើអគារចាស់ដែរនោះ គឺមានប្រហែលជាង ៣០គ្រួសារទៀតមិនទាន់ទទួលបានដំណោះស្រាយ។
កាលពីឆ្នាំ២០០៣ ក្រុមហ៊ុនផានអ៊ីម៉ិចរបស់លោកស្រី ស៊ុយ សុផាន ទទួលបានសិទ្ធិពីរដ្ឋាភិបាលធ្វើការអភិវឌ្ឍនៅសហគមន៍បុរីកីឡា ដោយកាលនោះក្រុមហ៊ុននេះ សន្យាសង់អគារចំនួន១០ជូនពលរដ្ឋវិញ ប៉ុន្តែ ក្រុមហ៊ុនសង់បានតែ៨អគារ ក៏ផ្អាក ដោយលើកហេតុផលថា ក្ស័យធន ដែលបណ្តាលឲ្យពលរដ្ឋមួយចំនួនដែលមិនទទួលបានសំណង ចេញតវ៉ារហូតមកដល់សព្វថ្ងៃនេះ៕
