អភិបាលរាជធានីភ្នំពេញ លោក ឃួង ស្រេង បានឲ្យដឹងថា សាលារាជធានីភ្នំពេញ បានស្នើសុំកាត់ដីទំហំ ២០ហិកតាពីបឹងតាមោក ដែលជាបឹងរក្សាទឹកកខ្វក់ និងរំដោះទឹកពីរាជធានីភ្នំពេញនោះ សម្រាប់សង់ផ្សារ និងចំណតរថយន្ត ដោយលោកថា ដើម្បីដោះស្រាយបញ្ហាសណ្ដាប់ធ្នាប់ចរាចរណ៍។
ក្នុងសេចក្ដីសម្រេចចុះថ្ងៃទី២ ខែសីហា ឆ្នាំ២០១៨ ដែល VOD ទើបទទួលបាន រដ្ឋលេខាធិការទីស្ដីការគណៈរដ្ឋមន្ត្រី ដែលបានចុះហត្ថលេខាជំនួសរដ្ឋមន្ត្រី លោក ប៊ិន ឈិន នោះ បានប្រាប់ទៅរដ្ឋមន្ត្រីដែនដី លោក ជា សុផារ៉ា និងរដ្ឋមន្ត្រីសេដ្ឋកិច្ច លោក អូន ព័ន្ធមុនីរ័ត្ន ថា លោកនាយករដ្ឋមន្ត្រី ហ៊ុន សែន បានឯកភាពទៅតាមសំណើរបស់សាលារាជធានីភ្នំពេញតាំងពីខែមិថុនាមកម៉្លេះ ដែលបានស្នើកាត់ដីបឹងតាមោក ២០ហិកតា សម្រាប់សាងសង់ផ្សារបន្លែ និងចំណតរថយន្ត។
អភិបាលរាជធានីភ្នំពេញ លោក ឃួង ស្រេង បានប្រាប់ វី.អូ.ឌី នៅថ្ងៃនេះថា គម្រោងសាងសង់ផ្សារបន្លែនៅលើបឹងតាមោកមួយនេះ មានគោលបំណងបញ្ចៀសការកកស្ទះចរាចរណ៍ ខណៈមានប្រជាពលរដ្ឋជាច្រើនកំពុងលក់បន្លែ និងអាជីវកម្មនៅលើផ្លូវនៅផ្សារដើមគរនាពេលសព្វថ្ងៃនេះ។
លោកថា៖ «រឿងខ្ញុំយកទៅដាក់នៅទីតាំងណា ជារឿងខ្ញុំទេ .. គឺធ្វើនេះ ដើម្បីរៀបចំសណ្ដាប់ធ្នាប់សាធារណៈជូនប្រជាជនក្នុងរាជធានី និងខេត្ត ដែលធ្វើដំណើរមកប្រកបមុខរបរអាជីវកម្មក្នុងរាជធានីភ្នំពេញ ឲ្យមានចរាចរណ៍ទូលំទូលាយ ព្រោះបច្ចុប្បន្ន ឃើញស្រាប់ហើយ នៅទីក្រុងភ្នំពេញ មានបញ្ហាប្រឈមដូចជាក្រុងអភិវឌ្ឍន៍នានាលើពិភពលោក គឺបញ្ហាចរាចរណ៍។ អញ្ចឹង យើងត្រូវរៀបចំសណ្ដាប់ធ្នាប់ចរាចរណ៍ ជាពិសេស ការលក់ដូរ សណ្ដាប់ធ្នាប់យើងត្រូវគិតគូរអាហ្នឹង បន្ទាប់ពីហ្នឹង សាលារាជធានីភ្នំពេញ នឹងគិតមើលពីសណ្ដាប់ធ្នាប់នៅក្នុងរាជធានី ដើម្បីកាត់បន្ថយការកក់ស្ទះចរាចរណ៍»។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជាបានចេញអនុក្រឹត្យស្ដីពីការកំណត់ផ្ទៃបឹងតាមោកជាសម្បតិ្តរបស់រដ្ឋដែលមានផ្ទៃដីសរុបប្រមាណ ៣២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ។
បឹងធំៗចំនួន ៤ មានបឹងពោងពាយ បឹងកក់ បឹងទំពុន និងបឹងជើងឯក ដែលនៅក្នុងនិងជាយរាជធានីភ្នំពេញ គឺត្រូវបានរដ្ឋាភិបាលវិនិយោគឲ្យក្រុមហ៊ុនធ្វើការអភិវឌ្ឍសម្រាប់ធ្វើជាតំបន់ពាណិជ្ជកម្ម និងទីក្រុងរណបជាដើម៕