មន្ត្រីរដ្ឋាភិបាលអះអាងថា វិសោធនកម្មមាត្រាមួយចំនួននៃច្បាប់ស្តីពីការបោះឆ្នោតក្រុមប្រឹក្សារាជធានី-ខេត្ត និងក្រុមប្រឹក្សាស្រុក-ខណ្ឌ ត្រូវបានធ្វើឡើងឲ្យស្របតាមច្បាប់បោះឆ្នោតផ្សេងទៀត ដើម្បីជាប្រយោជន៍ដល់ប្រជាពលរដ្ឋ។
រដ្ឋសភាដែលមានសមាជិកសុទ្ធតែមកពីគណបក្សកាន់អំណាច នៅព្រឹកថ្ងៃនេះ បានសម្រេចលុបចោលជំពូក ៣ និងជំពូក ៥ និងបទប្បញ្ញត្តិចំនួន ៥មាត្រា នៃច្បាប់ស្ដីពីការបោះឆ្នោតក្រុមប្រឹក្សារាជធានី-ខេត្ត និងក្រុមប្រឹក្សាស្រុក-ខណ្ឌ។
រដ្ឋមន្ត្រីក្រសួងមហាផ្ទៃ លោក ស ខេង ដែលបានដឹកនាំវិសោធនកម្មច្បាប់មួយនេះ បានថ្លែងក្រោយកិច្ចប្រជុំរដ្ឋសភាថា ច្បាប់មួយនេះ ត្រូវបានរដ្ឋាភិបាលស្នើឲ្យកែប្រែ ដើម្បីឲ្យស្របតាមច្បាប់បោះឆ្នោតផ្សេងទៀត រួមជាមួយការផ្ទេរសិទ្ធិអំណាចពេញលេញទៅឲ្យអាជ្ញាធរថ្នាក់ជាតិ និងថ្នាក់ក្រោមជាតិ និងការបម្រើផលប្រយោជន៍ជូនប្រជាពលរដ្ឋប្រកបដោយប្រសិទ្ធភាពខ្ពស់។
លោក ស ខេង ថ្លែងប្រាប់សារព័ត៌មានថា៖ «យើងមានបំណងដើម្បីផ្ទេរអំណាចតាមបែបវិមជ្ឈការ ក្នុងនោះក៏មានវិសហមជ្ឈការដែរ ក្នុងការផ្ទេរសិទ្ធិ ផ្ទេរធនធាន ដែលមានទាំងធនធានថវិកា ធនធានមនុស្សទៅឲ្យរដ្ឋបាលថ្នាក់ក្រោមជាតិរាជធានី-ខេត្ត ក្រុង-ស្រុក-ខណ្ឌ ដើម្បីឲ្យរដ្ឋបាលដែលនៅជិតប្រជាពលរដ្ឋ មានសិទ្ធិក្នុងការអនុវត្តកិច្ចការរបស់ខ្លួន បម្រើផលប្រយោជន៍ប្រជាពលរដ្ឋ»។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស ចាត់ទុកវិសោធនកម្មមាត្រាមួយចំនួននៃច្បាប់នេះថា គ្រាន់តែធ្វើឲ្យល្អមើលតែប៉ុណ្ណោះ ដោយសារ អ្នកចូលរួមអនុម័ត ១០៨សំឡេង សុទ្ធតែជាតំណាងរាស្ត្របក្សកាន់អំណាច។
លោក កន សាវាង្ស ប្រាប់ថា៖ «ការធ្វើច្បាប់នីមួយៗ មិនអាចមានតែជ្រុងតែមួយសម្រេច ឬក៏មតិភាគច្រើនទាំងអស់សុទ្ធតែសម្រេចអ្វីបាន ទៅតាមអ្វីដែលយើងចង់ទាំងអស់នោះទេ ត្រូវតែមានការថ្លឹងថ្លែង យ៉ាងហោចណាស់ក៏មានការផ្តល់យោបល់ពីភាគីពាក់ព័ន្ធដែរ។ យើងឃើញថា ការធ្វើវិសោធនកម្មច្បាប់នេះ វាបានត្រឹមតែធ្វើ ប៉ុន្តែ ការអនុវត្តជាក់ស្តែង វាអត់មានអ្វីប្រែប្រួលទេ វានៅតែដដែល។ ច្បាប់នេះអត់ទាន់បានផ្តល់ព័ត៌មានជាមុនដល់ភាគីពាក់ព័ន្ធ ឬសិក្សាអ្វី យើងអត់មានឃើញការលើកឡើងពីមុនមកទេ»។
រដ្ឋាភិបាល និងរដ្ឋសភា ដែលកាន់កាប់ និងដឹកនាំដោយគណបក្សប្រជាជនកម្ពុជា បានសម្រេចកែប្រែច្បាប់មួយនេះ ៥ខែមុនការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ ដែលត្រូវបានរដ្ឋាភិបាលសម្រេចយកថ្ងៃអាទិត្យ ទី២៦ ខែឧសភា ក្នុងឆ្នាំនេះ។
យោងតាមច្បាប់មួយនេះ ការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ ត្រូវបានធ្វើឡើងជាអសកល ពោលគឺមានតែសមាជិកជាប់ឆ្នោតមកពីក្រុមប្រឹក្សាឃុំ-សង្កាត់តែប៉ុណ្ណោះ មានសិទ្ធិចូលរួមក្នុងការបោះឆ្នោតមួយនេះ។
ប៉ុន្តែ សមាជិកជាប់ឆ្នោតមកពីគណបក្សសង្គ្រោះជាតិ បានបាត់បង់សិទ្ធិបោះឆ្នោតរបស់ពួកគេទៅហើយ បន្ទាប់ពីអតីតគណបក្សប្រឆាំងមួយនេះ ត្រូវបានតុលាការកំពូលសម្រេចរំលាយចោលកាលពីចុងឆ្នាំ២០១៧កន្លងមក ហើយអាសនៈជាប់ឆ្នោតរបស់ពួកគេ ត្រូវបានដកហូតយកទៅបែងចែកឲ្យគណបក្សដទៃទៀត៕