មន្ត្រីនគរបាលខេត្តកំពង់ស្ពឺ បានឲ្យដឹងថា មនុស្សម្នាក់បានស្លាប់ ហើយ ៨នាក់ផ្សេងទៀត បានរងរបួសក្នុងហេតុការណ៍រថយន្តដាច់ហ្វ្រាំងបុករះនៅជិតជ្រោះពេជ្រនិលនៅថ្ងៃនេះ។
ស្នងការនគរបាលខេត្តកំពង់ស្ពឺ លោក សម សាមួន បានប្រាប់VOD ថា ហេតុការណ៍នេះកើតឡើងនៅម៉ោង ២និង ៣០នាទីរសៀលថ្ងៃនេះ នៅលើកំណាត់ផ្លូវជាតិលេខ៤ ជិតជ្រោះពេជ្រនិល ក្នុងឃុំត្រែងត្រយឹង ស្រុកភ្នំស្រួច។
លោក សាមួន បានឲ្យដឹងថា គ្រោះថ្នាក់ចរាចរណ៍នេះ បង្ករឡើងដោយរថយន្តដឹកថ្មធុនធ្ងន់ដាច់ហ្វ្រាំងបុករះ បណ្ដាលឲ្យមនុស្សម្នាក់ស្លាប់ ៨នាក់ទៀតបានរងរបួស និងខូចខាតរថយន្ត២០គ្រឿង។
លោកថា ទាំងអ្នកស្លាប់ និងរបួសត្រូវបានបញ្ជូនទៅមន្ទីរពេទ្យខេត្តហើយ ចំណែកជនបង្កបានរត់គេចខ្លួន៕