ក្រុម១០០រាត្រី អះអាងថា កំពុងព្រួយបារម្ភពីសុវត្ថិភាពផ្ទាល់ខ្លួន ក្រោយពីដឹងថា មន្ត្រីរដ្ឋាភិបាល បានគំរាមពួកគេថា ប្រយ័ត្នជាប់គុកទាក់ទិននឹងការចេញរបាយការណ៍បង្ហាញថា វៀតណាមរំលោភយកដីកម្ពុជារាប់រយហិកតានៅស្រុកចន្ទ្រា ខេត្តស្វាយរៀង។
កាលពីចុងខែធ្នូ ឆ្នាំ២០១៨ ក្រុម១០០រាត្រីបានបង្ហាញរបាយការណ៍មួយ ដោយថា តាមរយៈចុះអង្កេត និងសម្ភាសពលរដ្ឋនៅតាមព្រំដែនខ្លួនរកឃើញថា វៀតណាមបានរំលោភយកដីខ្មែររាប់រយហិកតានៅតំបន់ជំពុះទា ត្រង់ចន្លោះបង្គោលព្រំដែនលេខ ១៩៤ ដល់ ១៩៩ ស្ថិតក្នុងឃុំចន្ទ្រា ស្រុកចន្ទ្រា ខេត្តស្វាយរៀង ។
ប៉ុន្តែ របាយការណ៍នេះ ត្រូវបានប្រធានគណៈកម្មាធិការព្រំដែន លោក វ៉ា គឹមហុង និងប្រធានរាជ្យបណ្ឌិត្យសភាកម្ពុជា លោក សុខ ទូច ប្រតិកម្មច្រានចោល។
ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាសមាជិកក្រុម ១០០រាត្រី លោក មួង សូនី ឲ្យVODដឹងថា សមាជិកក្រុមការងាររបស់លោកខ្លះ បានប្រកាសដកខ្លួន ឈប់បន្តកិច្ចការ ១០០រាត្រីនេះទៀត ដោយថា ពួកគេបារម្ភពីសុវត្ថិភាពផ្ទាល់ខ្លួន។
លោក មួង សូនី ឲ្យដឹងទៀតថា របាយការណ៍របស់ក្រុមលោក ត្រូវបានលោក វ៉ា គឹមហុង បាននិយាយជាមួយសារព័ត៌មានក្នុងស្រុក ដោយគំរាមថា ប្រយ័ត្នរត់ចោលស្រុក។ លោកថា ចំណែកលោកបណ្ឌិត សុខ ទូច វិញបានគំរាមថា ប្រយ័ត្នជាប់គុក។
លោកថា៖ «គាត់គំរាមពីរឿងគុក និងគំរាមប្រយ័ត្នរត់ចោលស្រុក មិនមែនជារឿងធម្មតាទេ [..] ហើយយើងគិតយ៉ាងម៉េច ព្រោះពួកខ្ញុំជាយុវជន ជាពលរដ្ឋស្លូតត្រង់ ហើយទន់ខ្សោយបំផុត។ ដល់ថ្នាក់ព្រមានចាប់ចងហើយ វាជាឧបសគ្គយ៉ាងធំហើយសម្រាប់ក្រុម ១០០រាត្រីនោះ»។
សមាជិកក្រុម១០០រាត្រីម្នាក់ទៀត គឺលោក ពិសិទ្ធ បង្ហាញការខកចិត្ត ដោយថា រដ្ឋាភិបាលគួរតែលើកទឹកចិត្តពួកគេដែលបានចំណាយទាំងកម្លាំងកាយចិត្ត និងទ្រព្យសម្បត្តិ ស្វែងរកបញ្ហានៅតាមព្រំដែន មកប្រាប់រដ្ឋាភិបាល ដើម្បីចាត់វិធានការពារបូរណភាពទឹកដី ប៉ុន្តែ លោកថា ទីបំផុតកិច្ចខិតខំប្រឹងប្រែងនោះ ទទួលរងនូវការគំរាមកំហែងទៅវិញ។
លោកថា៖ «ខ្ញុំខ្លាច ខ្ញុំខ្លាចស្លាប់ ព្រោះមនុស្សចៀសមិនផុតទេការស្លាប់នោះ ប៉ុន្តែ គ្រាន់ថា ខ្ញុំទ្រាំ តែឆន្ទៈធ្វើ ខ្ញុំនៅតែធ្វើ តែធ្វើតាមលទ្ធភាពដែលខ្ញុំអាចធ្វើទៅបាន»។
VOD មិនអាចសុំអត្ថាធិប្បាយពីលោក វ៉ា គឹមហុង បានទេ ដោយលោកថា កំពុងជាប់រវល់ ខណៈដែលលោកបណ្ឌិត សុខ ទូច អះអាងថា លោកគ្មានគម្រោងប្តឹងក្រុម ១០០រាត្រីទេ ប៉ុន្តែ លោកថា អ្វីដែលលោកបានផ្តល់បទសម្ភាសន៍ជាមួយអ្នកសារព័ត៌មានកន្លងទៅ លោកថា គ្រាន់តែជាការក្រើនរំឭកខ្លាចពួកគេប្រឈមនឹងផ្លូវច្បាប់តែប៉ុណ្ណោះ។
លោកថា៖ «ខ្ញុំទៅប្តឹងធ្វើអី គ្រាន់ថា ខ្ញុំអាណិត ក្រែងគេចាប់គាត់សួរ ឆ្លើយមិនរួច ក្រែងជាប់គុកទៀត ព្រោះខ្ញុំធ្លាប់ប្រាប់ទៅម្នាក់ហើយដែលគាត់ជាបេក្ខជនបណ្ឌិត ដែលគាត់លើកផែនទី ខ្ញុំថា លើកខុសហើយ ផែនទីហ្នឹងមិនមែននៅស្រុកខ្មែរទេ ពីដើមស្រុកខ្មែរមែនហើយដាឡាត់នោះ តែនៅសម័យអាណានិគមនិយមបារាំងគេកាត់ឲ្យទៅវៀតណាមហើយ»។
ការបោះបង្គោលព្រំដែនកម្ពុជា-វៀតណាម ត្រូវបានអតីតបក្សប្រឆាំងអះអាងថា កម្ពុជាបានខាតបង់ទឹកដីទៅប្រទេសវៀត ដោយសារតែរដ្ឋាភិបាលយកតាមសន្ធិសញ្ញាបំពេញបន្ថែមឆ្នាំ២០០៥។
គណៈកម្មាព្រំដែនកម្ពុជា លោក វ៉ា គឹមហុង ធ្លាប់ប្រាប់ VOD ការបោះបង្គោលព្រំដែនជាមួយវៀតណាមបាន ៨៤ភាគរយហើយលើចំណុចបានឯកភាពគ្នា តែថា នៅ១៦ភាគរយទៀតដែលមិនទាន់ត្រូវរ៉ូងគ្នា និងបន្តបោះលុះណាភាគីបារាំងផ្តល់ផែនទីចម្លងតាមមាត្រដ្ឋានពី ១ លើ ១០០ពាន់ មកខ្នាត ១លើ៥០ពាន់វិញ តាមកិច្ចព្រមព្រៀងកម្ពុជា និងវៀតណាម។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយភាគីទាំងពីរបានព្រមព្រៀងគ្នាបោះបង្គោលសរុបចំនួន ៣១៤ ដើម្បីកំណត់ខ្សែបន្ទាត់ព្រំដែនរវាងគ្នានិងគ្នា៕