ក្រសួងពាណិជ្ជកម្ម អំពាវនាវផលិតករឬអ្នកនាំទំនិញចេញទៅអឺរ៉ុប មកដាក់ពាក្យសុំចុះឈ្មោះក្នុងប្រព័ន្ធចុះបញ្ជីអ្នកនាំចេញរបស់សហភាពអឺរ៉ុបនៅនាយកដ្ឋាននាំចេញនាំចូលរបស់ក្រសួង ចាប់ពីដើមឆ្នាំ២០១៩នេះតទៅ។
សេចក្តីជូនដំណឹងកាលពីថ្ងៃទី៣១ ខែធ្នូ ឆ្នាំ២០១៨ ក្រសួងពាណិជ្ជកម្មបានអំពាវនាវដល់ផលិតករឬអ្នកនាំទំនិញគ្រប់ប្រភេទពីកម្ពុជាទៅកាន់សហភាពអឺរ៉ុបក្រោមគម្រោង«ការអនុគ្រោះពន្ធលើគ្រប់មុខទំនិញទាំងអស់ លើកលែងតែគ្រឿងសព្វាវុធ (EBA)» មកដាក់ពាក្យសុំចុះឈ្មោះក្នុងប្រព័ន្ធចុះបញ្ជីអ្នកនាំចេញរបស់សហភាពអឺរ៉ុប នៅនាយកដ្ឋាននាំចេញនាំចូលរបស់ក្រសួងពាណិជ្ជកម្មចាប់ពីថ្ងៃទី១ ខែមករា ឆ្នាំ២០១៩ តទៅ។ សេចក្តីប្រកាសព័ត៌មានដដែលនេះក៏បានបញ្ជាក់ដែរថា ទំនិញដែលនាំទៅប្រទេសណ័រវេស ប្រទេសស្វីស និងប្រទេសទួរគី ក្រោមប្រព័ន្ធអនុគ្រោះពន្ធទូទៅ(GSP) ក៏ត្រូវមកដាក់ពាក្យសុំចុះឈ្មោះដូចគ្នាដែរ។
សេចក្តីប្រកាសព័ត៌មាននេះ ក៏បានឲ្យដឹងទៀតថា ការកែសម្រួលនីតិវិធីក្នុងការបំពេញបែបបទនាំចេញនំទំនិញទៅក្រៅប្រទេសនេះ គឺក្នុងគោលបំណងសម្រួលពាណិជ្ជកម្មនិងកាត់បន្ថយចំណាយរបស់អ្នកនាំចេញ។
កាលពីខែតុលាឆ្នាំមុន សហភាពអឺរ៉ុបបានបញ្ជាក់ប្រាប់ពីដំណើរការដកប្រព័ន្ធអនុគ្រោះពន្ធ ដោយថាកម្ពុជាមានបញ្ហារំលោភសិទ្ធិមនុស្ស និងសិទ្ធិការងារធ្ងន់ធ្ងរ។ ទោះយ៉ាងណា លោកនាយករដ្ឋមន្ត្រី ហ៊ុន សែន បញ្ជាក់ថា ការដកប្រព័ន្ធអនុគ្រោះពន្ធនេះ មិនប៉ះពាល់ដល់កម្ពុជានោះទេ។
របាយការណ៍របស់គណៈកម្មការអឺរ៉ុបចេញផ្សាយកាលពីខែមេសាឆ្នាំកន្លងទៅបង្ហាញថា កម្ពុជាបាននាំចេញទំនិញទៅសហគមន៍អឺរ៉ុបក្នុងឆ្នាំ២០១៧ មានទំហំជាសាច់ប្រាក់ជាង៦ពាន់លានដុល្លារ។ ទំនិញទាំងនោះភាគច្រើនជាផលិតផលសម្លៀកបំពាក់កាត់ដេរ ហើយក្នុងលក្ខខណ្ឌ EBA កម្ពុជាទទួលបានផលចំនេញដោយមិនបង់ពន្ធជិត៧០០លានដុល្លារ។