គណបក្សប្រជាជនកម្ពុជា បាននឹងកំពុងតែងតាំងយុវជនជំនាន់ថ្មីដែលជាកូនៗរបស់ខ្លួនជាច្រើននាក់ ចូលក្នុងជួរថ្នាក់ដឹកនាំគណបក្សនិងរដ្ឋាភិបាល ប៉ុន្តែអ្នកវិភាគនយោបាយបានមើលឃើញថា ពួកគាត់មិនមានគំនិតអ្វីថ្មីឬជាគំនិតប្រជាធិបតេយ្យគោរពសិទ្ធិមនុស្សនោះទេ។
អ្នកវិភាគនយោបាយ មួយចំនួនបានមើលឃើញថា នេះជាផែនការយុទ្ធសាស្រ្តរបស់គណបក្សកាន់អំណាចដើម្បីឲ្យមានការស្នងតំណែង លើកកូនៗរបស់ពួកគាត់ឡើង និងដើម្បីថែរក្សាការពារទុកនូវសមិទ្ធិផលនានាដែលអ្នកចាស់ៗបានសាងមក។
លោកបណ្ឌិត ឡៅ ម៉ុងហៃ អ្នកវិភាគឯករាជ្យនៅកម្ពុជា បាននិយាយថា បើទោះបីជាអ្នកជំនាន់ថ្មីដែលចូលកាន់តំណែងក្នុងជួររដ្ឋាភិបាលមានការអប់រំខ្ពស់ក៏ដោយ លោកពុំទាន់ឃើញអ្វីជា «គំនិតថ្មី ទូលាយបើកចំហរ លក្ខណ:ប្រជាធិបតេយ្យ» នៅឡើយទេ។
បណ្ឌិត ឡៅ ម៉ុងហៃ បានមានប្រសាសន៍ថា៖ «ឈាមថ្មី ក៏ប៉ុន្តែជាសកម្មភាពទាំងអស់ហ្នឹងគឺការគ្រប់គ្រងរដ្ឋ ការពារអ្វីៗដែលមានស្រាប់។ អត់បញ្ចូលគំនិតថ្មី ប្រជាធិបតេយ្យ គំនិតគោរពសិទ្ធិមនុស្ស។”
លោកបណ្ឌិតបានប្រៀបធៀបការតែងតាំងកូនៗរបស់ខ្លួនចូលក្នុងតំណែងរដ្ឋនៅកម្ពុជាទៅនឹងអ្វីដែលបានកើតឡើងរួចហើយនៅប្រទេសជប៉ុន មុនវត្តមានអាមេរិកនៅចុងសតវត្សទី១៩ ដែលមានលក្ខណ: «យោធា តត្រកូល» ដែលពេលនោះ មេទ័ពជប៉ុនដែលមានអំណាចខ្លាំង ហ្សូគុន (Shōgun) ជានាយករដ្ឋមន្រ្តីនិងអគ្គមេបញ្ជាការកងទ័ពដាវសាមូរ៉ៃផងដែរ។
លោកបណ្ឌិត ឡៅ ម៉ុងហៃ បានមានប្រសាសន៍ដូច្នេះថា៖ «ការតែងតាំងជាបណ្តើរៗនៅពេលប៉ុន្មានឆ្នាំនេះគឺកូនរបស់មេដឹកនាំ ក៏បញ្ជាក់ថារបបហ្នឹងជារបបតត្រកូល។ នេះគឺមិនមានអីថ្មីនៅក្នុងប្រវត្តិសាស្រ្តនៅក្នុងពិភពលោកទេ»។
អ្នកវិភាគនយោបាយលោក គឹម សុខ បាននិយាយថា អ្នកជំនាន់ថ្មីមិនមានបទពិសោធន៏ទំនាក់ទំនងអន្តរជាតិនៅឡើយទេ ក្នុងការធ្វើការងារ ហើយជាពិសេសពួកគេគ្មានទំនាក់ទនងល្អជាមួយបណ្តាប្រទេសកាន់លទ្ធិប្រជាធិបតេយ្យ។
លោក គឹម សុខ បានមានប្រសាសន៍ថា៖ «រឿងជាឧបសគ្គធំមួយទៀតសំរាប់ពួកគេ គឺទំនាក់ទំនងខាងក្រៅ។ តើអ្នកជំនាន់ក្រោយទាំងនោះជាពិសេសក្រុមកូនលោក ហ៊ុន សែន មានទំនាក់ទំនងល្អជាមួយនឹងបណ្តាប្រទេសណាហើយឬនៅ? បើនិយាយពីពិភពប្រជាធិបតេយ្យគឺសូន្យហើយបើនិយាយពីចិនក៏កំពុងតែស្ទាបផ្លូវប៉ុណ្ណោះ»។
អ្នកវិភាគនយោបាយរូបនេះបានភៀសខ្លួនចេញពីកម្ពុជាទៅហ្វាំងឡង់កាលពីខែកញ្ញាឆ្នាំមុនបន្ទាប់ពីការគំរាមកំហែងលើរូបលោក។
កាលពីខែតុលាឆ្នាំមុន លោក ហ៊ុន សែន បាននិយាយថា លោក ហ៊ុន ម៉ាណែត អាចជាមេដឹកនាំនាពេលអនាគតរបស់ប្រទេស ហើយបានថ្លែងការពារការតែងតាំងពួកគាត់ទៅកាន់តំណែងរដ្ឋាភិបាលជាន់ខ្ពស់ និងយោធា ដោយនិយាយថា ពួកគេទាំងអស់សុទ្ធតែមានសញ្ញាប័ត្របណ្ឌិតឬសញ្ញាប័ត្រអនុបណ្ឌិត។
លោក ហ៊ុន ម៉ាណែត បាននិយាយនៅក្នុងសៀវភៅរបស់លោក ឆាយ សុផល ដែលមានចំណងជើងថា «បងប្អូនប្រុសទាំងបី» ដែលទើបចេញផ្សាយថ្មីៗនេះថា លោកមិនទាន់បានគិតដល់រឿងចង់ធ្វើនាយករដ្ឋមន្រ្តីនោះទេ ហើយថាខ្លួននិងបន្តធ្វើការងារដែលកំពុងធ្វើរាល់សព្វថ្ងៃជាធម្មតា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បាននិយាយថា ការតែងតាំងមន្រ្តីណាម្នាក់ជាសិទ្ធិផ្តាច់មុខរបស់បក្សគាត់ ហើយថាបក្សប្រជាជនដាច់ខាតមិនតែងតាំងមន្ត្រីមកពីបក្សប្រឆាំងនិងមន្ត្រីមកជាជនអគតិនោះទេ។
លោក សុខ ឥសាន បានមានប្រសាសន៍ថា៖ «ពួកអ្នកវិភាគ ពួកអ្នកផ្សាយព័ត៌មាន និងអ្នកក្រៅ គ្មានសិទ្ធិលូកដៃក្នុងកិច្ចការងាមន្ត្រីរបស់គណបក្សប្រជាជនកម្ពុជាសោះឡើយ។ ជាការអត់ប្រយោជន៏ទេ ទោះអស់លោកនិយាយទាល់តែងាប់ខ្លួនទៀតក៏ដោយ ក៏គ្មានបានការដែរ»។
ក្រៅពីកូនប្រុសរបស់លោកនាយករដ្ឋមន្រ្តី ហ៊ុន សែន កូនចៅរបស់មន្រ្តីជាន់ខ្ពស់គណបក្សប្រជាជនកម្ពុជាមួយចំនួនទៀត ក៏ត្រូវបានតែងតាំងឲ្យកាន់តំណែងចាប់ពីរដ្ឋមន្រ្តី រដ្ឋលេខាធិការ និងអភិបាលខេត្ត ដែលក្នុងនោះកូនប្រុសលោក សាយ ឈុំ ត្រូវបានរក្សាដំណែងជារដ្ឋមន្រ្តីក្រសួងបរិស្ថានដដែល។ ចំណែកឯលោក ស សុខា ដែលជាអតីតតំណាងរាស្រ្តខេត្តព្រៃវែង ត្រូវបានតែងតាំងជារដ្ឋលេខាធិការក្រសួងអប់រំនៅអាណត្តិទី៦នេះ។ កាលពីខែវិច្ឆិកា ឆ្នាំ២០១៨ កន្លងទៅ កូនប្រុសលោក ជាម យៀប គឺលោក ជាម ច័ន្ទសោភ័ណ្ឌ ត្រូវបានព្រះមហាក្សត្រត្រាស់បង្គាប់តែងតាំង ត្រូវបានតែងតាំងជាអភិបាលខេត្តត្បូងឃ្មុំ។ ដោយឡែក កាលពីថ្ងៃទី៦ ខែធ្នូ ឆ្នាំ២០១៨ កន្លងទៅ លោក ទៀ សីហា ដែលជាកូនប្រុស របស់លោក ទៀ បាញ់ ត្រូវបានតែងតាំងជាអភិបាលខេត្តសៀមរាប ជំនួសលោក ឃឹម ប៊ុនសុង៕