លោកនាយករដ្ឋមន្ត្រី ហ៊ុន សែន អះអាងថា កម្ពុជា រួចផុតពីអំណាចផ្តាច់ការ នឹងក្លាយជាទឹកដីនៃសេរីភាពតាមរយៈការដឹកនាំដឹកនាំរបស់គណបក្សប្រជាជនកម្ពុជា។
ក្នុងឱកាសប្រារព្ធពិធីអបអរសាទរ នៃទិវាជ័យជម្នះ៧មករា នាព្រឹកថ្ងៃទី០៧ ខែមករា ឆ្នាំ២០១៩នេះ លោកនាយករដ្ឋមន្ត្រី ហ៊ុន សែន ថ្លែងថា កាលពីឆ្នាំ១៩៧៥ ដល់១៩៧៩ កម្ពុជាជាវាលពិឃាត ក្រោមអំណាចផ្តាច់ការរបស់ ប៉ុល ពត បានសម្លាប់ខ្មែរជាង៣លាននាក់។ ករណីនេះលោកនាយករដ្ឋមន្ត្រីអះអាងថា កម្ពុជារួចផុតពីរបបផ្តាច់ការ នឹងក្លាយជាទឹកដីនៃសេរីភាពស្របតាមគោលការណ៍ប្រជាធិបេតេយ្យ សេរីពហុបក្ស រៀបចំការបោះឆ្នោតទៀងទាត់ ហើយពលរដ្ឋមានសិទ្ធិស្មើគ្នាចំពោះមុខច្បាប់។
លោកថ្លែងបែបនេះថា៖ «កម្ពុជា ដែលពីមុនជាវាលពិឃាត គ្របដណ្តប់ដោយអំណាចផ្តាច់ការ និងឧក្រិដ្ឋកម្មគួរឲ្យរន្ធត់បំផុត នៃរបបប្រល័យពូជសាសន៍ ឥឡូវបានក្លាយជាទឹកដីនៃសេរីភាព ដែលមានការគោរពយ៉ាងខ្ជាប់ខ្ជួននូវគោលការណ៍នៃលទ្ធិប្រជាធិបតេយ្យសេរី ពហុបក្ស តាមរយៈការរៀបចំនូវការបោះឆ្នោតយ៉ាងទៀតទាត់ ដោយសេរី ត្រឹមត្រូវ និងយុត្តិធម៌ និងជារដ្ឋដែលគោរពគោលការណ៍ច្បាប់ ឥតងាករេ ហើយប្រជាជនគ្រប់រូបមានសិទ្ធិស្មើភាពគ្នាចំពោះមុខច្បាប់»។
តំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន មានប្រសាសន៍ថា កម្ពុជាមិនទាន់មានសេរីភាពពេញលេញដូចការលើកឡើងរបស់លោកនាយករដ្ឋមន្ត្រីនោះទេ ដោយសារប្រជាពលរដ្ឋមួយចំនួននៅតែរងភាពអយុត្តិធម៌សង្គមនៅឡើយ។
ដោយឡែក ទាក់ទិនការបោះឆ្នោត លោកបញ្ជាក់ថា ផ្ទុយពីគោលការប្រជាធិបតេយ្យ ដោយសារស្ថាប័ន គ.ជ.ប ស្ថិតនៅក្រោមឥទ្ធិពលអ្នកនយោបាយ ខណៈអតីតគណបក្សសង្គ្រោះជាតិត្រូវបានផាត់ចេញពីឆាកនយោបាយជាដើម។
លោកមានប្រសាសន៍ថា៖ «កន្លងមកយើងឃើញមានបញ្ហា គ.ជ.ប ក្តោបក្តាប់ដោយបក្សកាន់អំណាចក្តី ជាពិសេសនៅអាណត្តិចុងក្រោយនេះ យើងឃើញថា គ្មានគណបក្សប្រឆាំង ដែលរាស្ត្រគាំទ្រពាក់កណ្តាលនគរចូលរួមទេ ហើយ គជប ក៏ស្ថិតនៅក្រោម ឥទ្ធិពលលនយោបាយដែរ ហេតុនេះធ្វើឲ្យប៉ះបាល់សិទ្ធិសេរីភាពរបស់ប្រជាពលរដ្ឋដែរ ដោយសារតែលុបបំបាត់ឆន្ទៈរាស្ត្រពាក់កណ្តាលនគរនោះ »។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា ការបោះឆ្នោតនៅកម្ពុជានៅមានកម្រិត ដោយសារមានការរិះគន់ពីអន្តរជាតិ ក្រោយពីមានការរំលាយបក្សប្រឆាំង។
លោក សាវាង្ស ផ្តល់ជាអនុសាសន៍ថា អ្នកនយោបាយទាំងអស់គួរតែជួបគ្នាជជែករកដំណោះស្រាយរួមមួយ ដោះស្រាយពីបញ្ហាប្រទេសជាតិ ទើបធ្វើឲ្យកម្ពុជារីកចំរើនជឿនលឿនដូចប្រទេសជិតខាង។
លោកផ្តល់ជាអនុសាសន៍ថា៖ «យើងគិតែពីរឿងទាស់គ្នា ខ្មែរគ្នាឯង ការអភិវឌ្ឍន៍ផ្សេងៗ យើងមិនអាចរត់រួចពីភាពក្រីក្រឲ្យបានលឿនដូចគេឯងនោះទេ សុំអ្នកនយោបាយគួរតែពិចារណា ដោះស្រាយវិបត្តិនយោបាយឲ្យបានល្អប្រសើរឡើងទៅ ដើម្បីលើកស្ទួយប្រទេសជាតិរបស់យើងឡើងវិញ »។
គួររំឮកថា គណបក្សប្រជាជនកម្ពុជា បានចាត់ទុកថ្ងៃ៧មករាថា ជាថ្ងៃរំដោះពលរដ្ឋចេញពីរបបខ្មែរក្រហម។ ប៉ុន្តែ ក្រុមអ្នកប្រឆាំងចាត់ទុកថ្ងៃនោះថា ជាថ្ងៃដែលវៀតណាមឈ្លានពានកម្ពុជា។
ក្នុងសេចក្ដីសម្រេច ដែលធ្វើឡើងក្នុងកិច្ចប្រជុំមួយនៅទីក្រុងស្ត្រាសបួរ ប្រទេសបារាំង កាលពីថ្ងៃ១៣ ខែកញ្ញា ឆ្នាំ២០១៨ សភាសហភាពអឺរ៉ុបបានប្រកាសថ្កោលទោសថា ការបោះឆ្នោតជ្រើសតាំងតំណាងរាស្ដ្រនីតិកាលទី៦ កាលពីថ្ងៃទី២៩ ខែកក្កដា គ្មានភាពសេរី ត្រឹមត្រូវ និងយុត្តិធម៌នោះទេ។
សភាសហភាពអឺរ៉ុបក៏ទាមទារឲ្យរដ្ឋាភិបាលថ្មីរបស់កម្ពុជាបញ្ឈប់នូវរាល់ការរឹតត្បិតសិទ្ធិសេរីភាពលើក្រុមអង្គការសង្គមស៊ីវិល អ្នកសារព័ត៌មាន អ្នកការពារសិទ្ធិមនុស្ស មេដឹកនាំសហជីព និងទម្លាក់ការចោទប្រកាន់ទាំងស្រុងលើលោក កឹម សុខា ដែលត្រូវបានរដ្ឋាភិបាលចោទថា «ក្បត់ជាតិ» និងអតីតប្រធានគណបក្សសង្គ្រោះជាតិ លោក សម រង្ស៊ី ដែលបាននិរទេសខ្លួននៅក្រៅប្រទេស៕
