លោក សម រង្ស៊ី ស្នើឲ្យតុលាការសាកសួររូបលោកក្នុងនាមជាសាក្សី ក្នុងសំណុំរឿងចាប់ឃុំខ្លួន និងចោទប្រកាន់លោក កឹម សុខា លើសំណុំរឿងចោទថា ក្បត់ជាតិ។
លោក សម រង្ស៊ី បានសរសេរលើទំព័រហ្វេសប៊ុករបស់លោកនៅថ្ងៃនេះថា អតីតឧត្ដមទីប្រឹក្សាគណបក្សសង្គ្រោះជាតិ លោក គង់ គាំ មិនគួរត្រូវបានតុលាការកោះហៅក្នុងនាមជាសាក្សីនោះទេ ដោយថា លោក គង់ គាំ គឺត្រឹមតែជាទីប្រឹក្សារបស់លោក និងមិនបានចូលរួមធ្វើសម្រេចចិត្តសំខាន់អ្វីនោះឡើយ។
បើតាមបណ្ដាញសង្គមហ្វេសប៊ុក លោក សម រង្ស៊ី លើកឡើងថា តុលាការគួរកោះហៅរូបលោកមកសាកសួរមុនគេដោយថា លោកទើបជាអ្នកដែលមានការទទួលខុសត្រូវខ្ពស់ក្នុងឋានៈលោកធ្លាប់ធ្វើជាប្រធានគណបក្សសង្គ្រោះជាតិនោះ។
លោក សម រង្ស៊ី អះអាងទៀតថា លោកយល់ព្រមឲ្យតុលាការសាកសួរតាមរយៈប្រព័ន្ធវីដេអូ Skype ដើម្បីផ្ដល់ព័ត៌មានបន្ថែមជុំវិញការចោទប្រកាន់លើលោក កឹម សុខា និងដើម្បីបើកការស៊ើបអង្កេតឲ្យបានស៊ីជម្រៅ។
លោក សម រង្ស៊ី បសរសេរលើទំព័រហ្វេសប៊ុកថា៖ « តុលាការអាយ៉ង ត្រូវតែហៅខ្មុំ សម រង្ស៊ី មកសាកសួរមុនគេបង្អស់។ ខ្ញុំយល់ព្រមផ្តល់ព័ត៌មានពាក់ព័ន្ធសំណុំរឿងលោក កឹម សុខា នេះ ជូនតុលាការអាយ៉ងតាមរយៈប្រព័ន្ធវីដេអូ Skype ពីសហរដ្ឋអាមេរិក ដែលខ្ញុំកំពុងតែស្ថិតនៅពេលនេះ»។
លោក សម រង្ស៊ី មិនបានបញ្ជាក់ថា មានព័ត៌មានអ្វីខ្លះដែលចង់ប្រាប់ទៅតុលាការនោះទេ។
ក្រៅពីទាត់ចោលសំណើរបស់ក្រុមមេធាវីការពារដែលសុំឲ្យទម្លាក់បទចោទប្រកាន់លើលោក កឹម សុខា នោះចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី បានកោះហៅលោក គង់ គាំ ឲ្យចូលបំភ្លឺជាសាក្សីនៅថ្ងៃទី២៣ មករាខាងមុខនេះ នៅក្នុងសំណុំរឿងដែលរដ្ឋាភិបាលចោទមេដឹកនាំអតីតបក្សប្រឆាំង លោក កឹម សុខា ថា បានប្រព្រឹត្ដអំពើ «ក្បត់ជាតិ»៕
