របាយការណ៍របស់សារព័ត៌មានអន្តរជាតិមួយ បានបន្ដចាត់ថ្នាក់កម្ពុជាថា មានស្ថានភាពប្រជាធិបតេយ្យធ្លាក់ចុះ និងឆ្ពោះទៅរករបបផ្ដាច់ការ បន្ទាប់ពីកម្ពុជាបញ្ចប់ការបោះឆ្នោតដ៍ចម្រូងចម្រាស់មួយ និងការរឹតត្បឹតផ្នែកនយោបាយ។
របាយការណ៍ស្ដីពី «សន្ទស្សន៍ប្រជាធិបតេយ្យសម្រាប់ឆ្នាំ២០១៨» ចេញដោយស្ថាប័នស្រាវជ្រាវផ្នែកសេដ្ឋកិច្ចមួយឈ្មោះ «Economist Intelligence Unit» របស់សារព័ត៌មាន The Economist ដែលមានមូលដ្ឋាននៅអង់គ្លេស កាលពីថ្ងៃម្សិលមិញនេះ បានទម្លាក់ចំណាត់ថ្នាក់កម្ពុជានៅលេខរៀង ១២៥ ក្នុងចំណោមប្រទេស ១៦៧ លើពិភពលោក ឬទទួលបានពិន្ទុ ៣.៥៩ ដែលធ្លាក់ចុះមួយលេខថែមទៀត បើធៀបនឹងចំណាត់ថ្នាក់ឆ្នាំ២០១៧ និងធ្លាក់ចុះ ១៣លេខ បើធៀបនឹងរបាយការណ៍កាលពីឆ្នាំ២០១៦។
ស្ថាប័នស្រាវជ្រាវមួយនេះ បានលើកឡើងថា កម្ពុជាកំពុងប្រែក្លាយជារបបផ្ដាច់ការ ដោយថា កម្ពុជាទទួលបានពិន្ទុទាបនៅក្នុងការចូលរួមផ្នែកនយោបាយ សិទ្ធិសេរីភាព ដំណើរការបោះឆ្នោតតាមបែបលទ្ធិប្រជាធិបតេយ្យសេរីពហុបក្ស វប្បធម៌នយោបាយ និងការដឹកនាំរដ្ឋាភិបាល។
អ្នកនាំពាក្យកាន់អំណាច លោក ឈឹម ផលវរុណ បានច្រានចោលលទ្ធផលរកឃើញនៃរបាយការណ៍នេះ ដោយថា រដ្ឋាភិបាលដឹកនាំដោយគណបក្សប្រជាជនកម្ពុជា មិនចាប់អារម្មណ៍នឹងរបាយការណដែលចេញដោយបរទេសណាមួយឡើយ។
លោកបន្ដថា៖ «អង្គការឯកជនរបស់បរទេស កម្ពុជាមិនទៅឈឺក្បាលអីជាមួយនឹងអង្គការឯកជនទេ គេធ្វើអីធ្វើទៅ ចង់ដាក់ពិន្ទុអី ស្រេចតែគេទៅ»។
ប្រធានផ្នែកស៊ើបអង្កេតអង្គការលីកាដូ លោក អំ សំអាត មានប្រសាសន៍ថា របាយការណ៍នេះមានភាពប្រហាក់ប្រហែលគ្នាទៅនឹងក្ដីកង្វល់របស់សហគមន៍អន្ដរជាតិ ដែលចង់ឲ្យកម្ពុជាកែលម្អបញ្ហាសិទ្ធិមនុស្ស និងលទ្ធិប្រជាធិបតេយ្យរបស់ខ្លួន។ លោកថា កម្ពុជានឹងទទួលរងហានិភ័យផ្សេងៗ ប្រសិនបើរដ្ឋាភិបាលមិនអើពើចំពោះក្ដីកង្វល់ទាំងអស់នេះទេនោះ។
លោកបន្ដថា៖ «ថ្មីៗនេះ យើងឃើញហើយថា សូម្បីសហគមន៍អឺរ៉ុប និងសហរដ្ឋអាមេរិក ក៏មានការរិះគន់អំពីការព្រួយបារម្ភនៃការធ្លាក់ចុះនៃបញ្ហាលទ្ធិប្រជាធិបតេយ្យ និងសិទ្ធិមនុស្ស […] ការវិភាគទៅលើសេដ្ឋកិច្ច ហើយគេចេញជារបាយការណ៍ វាអាចធ្វើឲ្យមានការប៉ះពាល់មួយចំនួន ដែលធ្វើឲ្យអ្នកវិនិយោគគេពិចារណា ពីព្រោះវាពាក់ព័ន្ធការវាយតម្លៃលើបញ្ហាសេដ្ឋកិច្ច និងផ្សាភ្ជាប់ទៅនឹងលទ្ធិប្រជាធិបតេយ្យ និងការគោរពសិទ្ធិមនុស្ស»។
ចាប់ពីតាំងឆ្នាំ២០១៦មក របាយការណ៍របស់ក្រុមអង្គការអន្ដរជាតិ និងក្រុមប្រទេសលោកសេរី បានវាយតម្លៃទាបចំពោះស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ជាពិសេសចាប់តាំងពីការរំលាយគណបក្សសង្គ្រោះជាតិ នៅមុនការបោះឆ្នោត ឆ្នាំ២០១៧។
នៅក្នុងរបាយការណ៍ដែលដាក់ជូនទៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីខែកញ្ញា ឆ្នាំ២០១៨ អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត បានបង្ហាញក្ដីកង្វល់របស់ខ្លួនផងដែរពាក់ព័ន្ធនឹងបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា នៅអំឡុងពេល និងក្រោយពេលការបោះឆ្នោត កាលពីខែកក្កដាឆ្នាំមុន។
ក្នុងរបាយការណ៍នោះ លោកស្រី រ៉ូណា ស្មីត អះអាងថា ការបោះឆ្នោតជ្រើសតាំងតំណាងរាស្ដ្រនីតិកាលទី៦ កាលពីថ្ងៃទី២៩ កក្កដា ឆ្នាំ២០១៧ គឺពោរពេញដោយរឹតត្បិត និងបង្ខិតបង្ខំពលរដ្ឋឲ្យចេញទៅបោះឆ្នោត ការយាយីលើក្រុមអង្គការសង្គមស៊ីវិល ការគ្រប់គ្រងបណ្ដាញសារព័ត៌មាន និងការរំលាយអតីតបក្សប្រឆាំងមិនឲ្យចូលរួមបោះឆ្នោត ដោយថា ការបោះឆ្នោតបែបនេះ គឺគ្មានភាពសេរី ត្រឹមត្រូវ និងយុត្តិធម៌ឡើយ៕
