លោកនាយករដ្ឋមន្ត្រី ហ៊ុន សែន បានសម្រេចកាត់ឆ្វៀលដីទំហំជាង ១៣ហិកតា កាត់ចេញពីដែនគម្របព្រៃឈើ ស្ថិតនៅក្នុងខេត្តព្រះសីហនុ ឲ្យទៅក្រុមហ៊ុន ផាន អ៊ីម៉ិច របស់អ្នកស្រី ស៊ុយ សុផាន។ នេះបើតាមអនុក្រឹត្យមួយចេញកាលពីដើមខែវិច្ឆិកាឆ្នាំមុន។
ការសម្រេចនេះ គឺធ្វើឡើងតាមសំណើរបស់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ដែលបានស្នើទៅលោកនាករដ្ឋមន្ត្រី ហ៊ុន សែន ដើម្បីកាត់ឆ្វៀលដីទំហំជាង ១៣៨ ៦៧៨ម៉ែត្រក្រឡា ចេញពីដែនគម្របព្រៃឈើឆ្នាំ២០០២ ដោយធ្វើអនុបយោគជាដីឯកជនរបស់រដ្ឋ ផ្ដល់ឲ្យទៅអ្នកស្រី ស៊ុយ សុផាន កាន់កាប់ជាកម្មសិទ្ធិ។
ម្ចាស់ក្រុមហ៊ុន ផាន អ៊ីម៉ិច អ្នកស្រី ស៊ុយ សុផាន សុំមិនធ្វើអត្ថាធិប្បាយចំពោះរឿងនេះទេ ដោយអ្នកស្រីជំរុញឲ្យទៅសួរទៅក្រសួងដែនដី និងអាជ្ញាធរខេត្តព្រះសីហនុវិញ។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា មានប្រសាសន៍ថា លោកជាប់រវល់ប្រជុំ។ ចំណែកអ្នកនាំពាក្យក្រសួងលោក សេង ឡូត ទូរសព្ទចូលគ្មានអ្នកទទួល។
ប្រធានមន្ទីររៀបចំដែនដី នគរូបនីយកម្ម និងសំណង់ប្រចាំខេត្តព្រះសីហនុ លោក ចេង ស្រុង បានទទួលស្គាល់អំពីការកាត់ឆ្វៀលដីនៅក្នុងដែនគម្របព្រៃឈើនេះ ប៉ុន្តែ លោកពុំបានដឹងថា តើក្រុមហ៊ុនរបស់អ្នកស្រី ស៊ុយ សុផាន យកដីទៅអភិវឌ្ឍអ្វីនោះឡើយ។
លោកថា៖ «រាជរដ្ឋាភិបាលបានសម្រេចរួចហើយតើ បានចេញអនុបយោគអីឲ្យអស់ហើយតើ។ បាទ! អាហ្នឹង បើយើងមានគោលការណ៍ហើយ អាហ្នឹងយើងត្រូវចុះបញ្ជីចុះអី ចេញប័ណ្ណជូនគាត់។ ខ្ញុំមិនទាន់ដឹងថា គាត់យកដីនោះទៅអភិវឌ្ឍធ្វើអីៗទេ យើងអត់ដឹងដែរ»។
លោក ចេង ស្រុង បានឲ្យដឹងថា ដែនគម្របព្រៃឈើ ស្ថិតនៅភូមិគគីរ ឃុំបិតត្រាំ ស្រុកព្រៃនប់ ត្រូវបានរដ្ឋាភិបាលដាក់បញ្ជូលជាដីដែនគម្របព្រៃឈើនៅក្នុងឆ្នាំ២០០២ ។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា បច្ចុប្បន្ននេះ ដីដែនគម្របព្រៃឈើត្រូវបានប្រជាពលរដ្ឋ និងក្រុមហ៊ុនអ្នកមានអំណាច កំពុងទន្ទ្រានយកធ្វើជាកម្មសិទ្ធិ បន្ទាប់តម្លៃដីធ្លីនៅក្នុងខេត្តជាប់តំបន់ឆ្នេរសមុទ្រមួយនេះ បានឡើងថ្លៃបន្តបន្ទាប់នោះ។
អ្នកស្រីថា៖ «[អ្នកទន្ទ្រានដី]មានចម្រុះទាំងអស់ អ្នកតូច អ្នកធំអី មានទាំងអស់ ប៉ុន្តែ ភាគច្រើនជាប់គុកតែអ្នកក្រទេ។ អ្នកក្រជាប់គុកអស់ហើយ វាអយុត្តិធម៌សម្រាប់ប្រជាពលរដ្ឋ»។
អ្នកស្រី ស៊ុយ សុផាន បានកាន់កាប់ដីធ្លី ២កន្លែងធំៗ នៅក្នុងខេត្តកណ្ដាល និងដីតំបន់សហគមន៍បុរីកីឡា ដែលមានជម្លោះដីធ្លីរហូតមកដល់សព្វថ្ងៃនេះ៕
