សមាជិកព្រឹទ្ធសភាពីររូបរបស់សហរដ្ឋអាមេរិក បានស្នើទៅប្រធានាធិបតីរបស់ខ្លួន ឲ្យពិចារណាដកប្រព័ន្ធអនុគ្រោះពាណិជ្ជកម្មពីកម្ពុជាវិញ ក្រោមហេតុផលថា រដ្ឋាភិបាលប្រទេសនេះ បរាជ័យក្នុងការជំរុញគោលការណ៍គោរពសិទ្ធិមនុស្ស និងលទ្ធិប្រជាធិបតេយ្យ។
ក្នុងសេចក្តីថ្លែងការណ៍ចុះថ្ងៃទី៩ ខែមករាម្សិលមិញនេះ សមាជិកព្រឹទ្ធសភាអាមេរិក លោក ថេដ គ្រូស (Ted Cruz) និងលោក គ្រីស ឃូនស៍ (Chris Coons) បានស្នើទៅរដ្ឋបាលលោកប្រធានាធិបតី ដូណាល់ ត្រាំ ឲ្យសើរើច្បាប់ពាណិជ្ជកម្មជាមួយកម្ពុជា ឬដកហូតប្រព័ន្ធអនុគ្រោះពាណិជ្ជកម្ម GSP ពីកម្ពុជា ខណៈប្រទេសមហាអំណាចមួយនេះ បានសម្រេចពន្យាពន្ធអនុគ្រោះនេះដល់កម្ពុជារួចហើយនោះកាលពីខែមេសាឆ្នាំមុន។
លោក ថេត គ្រូស បានលើកឡើងក្នុងសេចក្តីថ្លែងការណ៍ថា៖ «នាយករដ្ឋមន្ត្រីកម្ពុជា លោក ហ៊ុន សែន បានកេងប្រវ័ញ្ចពីប្រព័ន្ធអនុគ្រោះពន្ធនេះ ដែលផ្តល់ឲ្យដោយសហរដ្ឋអាមេរិក និងសហគមន៍អឺរ៉ុប។ គាត់បានបរាជ័យមិនគោរពតាមនិយាមសិទ្ធិការងារ មើលស្រាលដល់សុច្ចរិតភាពនៃការបោះឆ្នោតនៅកម្ពុជា ហើយបានងាកទៅរកប្រទេសចិន»។
ចំណែកសមាជិកព្រឹទ្ធសភា លោក គ្រីស ឃូនស៍ បានចោទសួរថា តើកម្ពុជាគួរតែបន្តទទួលបានប្រព័ន្ធអនុគ្រោះពន្ធនេះដើម្បីនាំទំនិញចូលទីផ្សារសហរដ្ឋអាមេរិកទៀតដែរឬទេ?
សមាជិកព្រឹទ្ធសភាអាមេរិករូបនេះ លើកឡើងទៀតថា៖ «ប្រទេសដែលមើលស្រាលដល់លទ្ធិប្រជាធិបតេយ្យ មិនយកចិត្តទុកដាក់និយាមពលកម្ម មិនគោរពសិទ្ធិមនុស្ស និងមិនយកចិត្តទុកដាក់ការពារកម្មសិទ្ធិបញ្ញា មិនគួរទទួលបានបុព្វសិទ្ធិពាណិជ្ជកម្មពិសេសនេះទេ»។
លោក គ្រីស ឃូនស៍ ថ្លែងបន្តថា៖ «អំឡុងពេលគ្រប់គ្រងអំណាច ៣៤ឆ្នាំនេះ លោក ហ៊ុន សែន បានបង្ហាញការមិនគោរពនីតិរដ្ឋ និងសិទ្ធិមូលដ្ឋាននៅកម្ពុជា»។
អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ ប្រាប់ថា លោកមិនចាប់អារម្មណ៍ទៅនឹងការលើកឡើងនេះទេ ដោយថា វាមិនឆ្លុះបញ្ចាំងពីឆន្ទៈរបស់ប្រធានាធិបតីអាមេរិក លោក ដូណាល់ ត្រាំ ។
លោកថា៖ «អ្នកនយោបាយអាមេរិក ទោះមានតួនាទីជាសមាជិកព្រឹទ្ធសភា ឬក៏តំណាងរាស្ត្រអាមេរិកជាប់ឆ្នោតដោយប្រជាពលរដ្ឋអាមេរិក គួរតែបម្រើសហរដ្ឋអាមេរិកខ្លួនឯង គួរដើរតាមលោក ដូណាល់ ត្រាំ ដែលគាត់កំពុងបម្រើឲ្យពលរដ្ឋអាមេរិកកាំង។ ដូច្នេះយើងមិនយកទស្សនៈនយោបាយបុគ្គល អ្នកនយោបាយនីមួយៗមកចាប់អារម្មណទេ បាទ!»។
ក្នុងកិច្ចសម្ភាសជាមួយ VOD កាលសប្ដាហ៍មុន អ្នកវិភាគនយោបាយ លោក ឯម សុវណ្ណារ៉ា បានព្រមានថា សេដ្ឋកិច្ចកម្ពុជាអាចប្រឈមនឹងវិបត្តិ ប្រសិនបើកម្ពុជាមិនស្ដារលំហប្រជាធិបតេយ្យឡើងវិញ ដូចដែលសហគមន៍អន្តរជាតិបានជំរុញទេនោះ ដោយលោកថា ដង្ហើមសេដ្ឋកិច្ចកម្ពុជាមួយផ្នែកធំ នៅពឹកផ្អែកលើប្រទេសលោកសេរីនៅឡើយ។
សមាជិកព្រឹទ្ធសភាអាមេរិកទាំងពីររូបនេះ បានស្នើឲ្យសើរើពាណិជ្ជកម្មជាមួយកម្ពុជាបែបនេះ ក្រោយពីពួកគេមើលឃើញថា កម្ពុជាពុំបានស្ដារលំហប្រជាធិបតេយ្យ និងសិទ្ធិសេរីភាពឡើងវិញឡើយនៅក្នុងឆ្នាំ២០១៨កន្លងមកនេះ។
កម្ពុជាទទួលបានពន្ធអនុគ្រោះ GSP ពីសហរដ្ឋអាមេរិកនៅឆ្នាំ១៩៩៧ ពោលក្រោយពីមានកិច្ចព្រមព្រៀងសន្តិភាពទីក្រុងប៉ារីស ហើយសហរដ្ឋគឺជាទីផ្សារធំលំដាប់ទីពីរបន្ទាប់ពីសហគមន៍អឺរ៉ុប សម្រាប់ទំនិញនាំចេញពីកម្ពុជាដែលមានតម្លៃដល់ទៅជាង ៣ពាន់លានដុល្លារក្នុងមួយឆ្នាំ។
ក្រៅពីសហរដ្ឋអាមេរិក សហភាពអឺរ៉ុបដែលជាទីផ្សារធំបំផុតនៃទំនិញនាំចេញពីកម្ពុជានោះ ក៏បានដំណើរការដកហូតប្រព័ន្ធអនុគ្រោះពន្ធ (EBA) ពីកម្ពុជាផងដែរ ខណៈដែលប្រព័ន្ធអនុគ្រោះពន្ធពីសហគមន៍អឺរ៉ុប ជួយឲ្យកម្ពុជានាំចេញទំនិញដោយរួចពន្ធមានតម្លៃដល់ទៅជិត ៧០០លានដុល្លារក្នុងមួយឆ្នាំ៕