ក្រសួងមហាផ្ទៃ ណែនាំដល់ប្រជាពលរដ្ឋឲ្យចៀសវៀងការប្រើប្រាស់ Wifi សាធារណៈដើម្បីការពារការលួចយកព័ត៌មានផ្ទាល់ខ្លួន និងលេខសំងាត់ពីគណនីផ្សេងៗ។
នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ កាលពីម្សិលមិញ បង្ហោះលើទំព័រហ្វេសប៊ុករបស់ខ្លួន ដោយក្រើនរំលឹកដល់អ្នកដែលប្រើប្រាស់បណ្តាញសង្គម ជាពិសេសអ្នកដែលចូលចិត្តប្រើប្រាស់ Wifi សាធារណៈឲ្យមានការប្រុងប្រយ័ត្នពីការលួចយកគណនីផ្ទាល់ខ្លួន លេខសំងាត់ និងការចែកចាយមេរោគ (Virus Malware) ជាដើម។
ប្រភពដដែល ឲ្យដឹងបន្តថា ដើម្បីការពារសុវត្ថិភាព អ្នកប្រើប្រាស់អ៊ីនធឺណិត គួរតែចៀសវាងការប្រើប្រាស់ Wifi ដែលគ្មានប្រភពច្បាស់លាស់។ នាយកដ្ឋានប្រឆាំងបទល្មើសបច្ចេកវិទ្យា ក៏បានអំពាវឲ្យអ្នកប្រើប្រាស់ ចៀសវៀងការចូលទៅក្នុងគណនីសំខាន់ៗដូចជា iCloud និង Email នៅពេលដែលប្រើ Wifi សាធារណៈ ហើយត្រូវបិទប្រព័ន្ធ Wi-Fi បើពុំត្រូវការប្រើប្រាស់វា។
ប្រធាននាយកដ្ឋានប្រឆាំងបទល្មើសបច្ចេកវិទ្យា លោក ជា ពៅ បានលើកឡើងប្រាប់ VOD បន្ថែមថា ការផ្សព្វផ្សាយដល់ពលរដ្ឋនាពេលនេះ ដោយសារមានលួចគណនីតាមរយៈការប្រើប្រាស់ Wifi សាធារណៈជាបន្តបន្ទាប់។
លោក ជា ពៅ មានប្រសាសន៍ថា៖ «រឿងហ្នឹង វាកើតឡើងយូរហើយ តែគេអត់ទាន់យល់រឿងហ្នឹង។ យើងផ្សព្វផ្សាយនេះដោយសារវាមានរឿងហេតុកើតឡើង ណាមួយពេលគេ registration(ចុះឈ្មោះ) គេឃើញអញ្ចឹងទើបគេទប់ស្កាត់ឲ្យហើយទៅ។»
លោក ជា ពៅ បានជំរុញឲ្យពលរដ្ឋប្រើប្រាស់អ៊ិនធឺណិតដែលមាន ពោលគឺអ៊ិនធឺណិត និងWi-Fi ផ្ទាល់។
អនុប្រធានសមាគមបណ្តាញយុវជនកម្ពុជា លោក សរ ម៉ូរី បានប្រាប់ VOD ថាការប្រើប្រាស់ Wifi សាធារណៈ គឺមានហានិភ័យជាច្រើនរួមមាន ការតាមដានទំនាក់ទំនង ការលួចយកគណនីទៅប្រើប្រាស់ក្នុងន័យទុច្ចរិត ដូចជា ការកេងប្រវ័ញ្ច ការគំរាមគំហែង និងការឆបោកយកប្រាក់ជាដើម។
លោក មានប្រសាសន៍ថា៖ « កន្លងមក មានករណីនេះកើតឡើងច្រើន[…] ដូច្នេះជាអនុសាសន៍ សម្រាប់បងប្អូនដែលប្រើ Wifi សាធារណៈ គាត់ត្រូវតែមានវិធីសាស្ត្រក្នុងការការពារ ហើយមួយវិញទៀត ពួកគាត់គួរតែពិនិត្យមើលលក្ខខណ្ឌមុននឹងប្រើប្រាស់ Wifi នោះ។»
របាយការណ៍របស់និយ័តករទូរគមនាគមន៍កម្ពុជា ឲ្យដឹងបច្ចុប្បន្នប្រជាពលរដ្ឋខ្មែរជាង១១លាននាក់មានលទ្ធភាពប្រើប្រាស់ប្រព័ន្ធអ៊ីនធឺណិត ក្នុងនោះគណនីហ្វេសប៊ុកមានជិត៧លានគណនី៕
ដោយ៖ កញ្ញា ស៊ីម ដាណេ និង កញ្ញា ហេង សុខលីន
