ប្រធានសហភាពចលនាកម្មករកម្ពុជា លោក ប៉ាវ ស៊ីណា ត្រូវបានតុលាការខេត្តកំពង់ស្ពឺ កោះហៅឲ្យចូលបំភ្លឺជុំវិញការចោទថា បានញុះញង់ឲ្យប្រព្រឹត្តបទឧក្រិដ្ឋកាលពីឆ្នាំមុន។
ក្នុងដីកាកោះចុះថ្ងៃទី៩ ខែមករា តុលាការខេត្តកំពង់ស្ពឺ តម្រូវឲ្យលោក ប៉ាវ ស៊ីណា ចូលទៅបំភ្លឺនៅថ្ងៃទី១៧ មករាខាងមុននេះ ដើម្បីឆ្លើយដោះសារពីការចោទប្រកាន់លើខ្លួន។
លោក ប៉ាវ ស៊ីណា បានបង្ហាញការខកចិត្តចំពោះតុលាការខេត្តកំពង់ស្ពឺដែលកោះហៅរូបលោកនេះ ដោយលោកថា វាជារឿងអយុត្តិធម៌បំផុតដែលរូបគាត់ជាជនរងគ្រោះក្នុងហេតុការណ៍នោះ ហើយត្រូវសមត្ថកិច្ច និងតុលាការបំភ្លៃឲ្យទៅជនបង្កទៅវិញ។
លោកបន្ថែមថា៖ «ខ្ញុំជាជនរងគ្រោះ ប៉ុន្តែ ផ្ទុយទៅវិញខាងមន្រ្តីនគរបាលយុត្តិធម៌ រួមទាំងតុលាការ គេបានបង្វែរសាច់រឿងពីយើងខ្ញុំជាជនរងគ្រោះទៅជាជនល្មើសទៅវិញ ហើយថែមទាំងកាត់ក្តីកំបាំងមុខកាលពីថ្ងៃទី៦ ខែ១២កន្លងទៅនេះ ដោយមិនបានកោះហៅ ដោយមិនបានអញ្ជើញខ្ញុំ និងមេធាវីខ្ញុំទៅសវនការអី គឺអត់ទាំងអស់។ ដូច្នេះ ខ្ញុំគិតថា របៀបធ្វើការបែបបាយឡុកបាយឡ គ្មានវិជ្ជាជីវៈបែបនេះ យើងមិនដឹងថា ទទួលបានយុត្តិធម៌ដូចម្តេច បើការធ្វើការបែបនេះ»។
ប្រធានសហភាពរូបនេះ បានឲ្យដឹងថា កាលពីឆ្នាំ២០១៦ ក្រុមកម្មករបម្រើការងារនៅរោងចក្រមួយក្នុងក្រុងច្បារមន ខេត្តកំពង់ស្ពឺ បានផ្ទុះការតវ៉ា ហើយក្រុមកម្មករទាំងនោះ បានស្វែងរកសហជីពរបស់លោក ឲ្យធ្វើជាតំណាងជួយដោះស្រាយវិវាទការងារនេះ។
លោក ប៉ាវ ស៊ីណា បន្តថា ពេលដែលទទួលបានពាក្យបណ្តឹង រូបលោក និងក្រុមការងារបានចុះទៅសម្របសម្រួល ប៉ុន្តែ ពេលទៅដល់រោងចក្រ ស្រាប់តែមានមនុស្សមួយក្រុមដែលក្រុមកម្មករប្រាប់ថា ជាមន្រ្តីទាហ៊ានចេញមកប្រើហិង្សាលើក្រុមការងាររបស់គាត់រហូតមានអ្នកខ្លះរបួសធ្ងន់ធ្ងរទៀតផង។
លោកបន្ថែមថា៖ «គ្រាន់តែទៅដល់មុខរោងចក្រភ្លាម ត្រូវបានក្រុមជនពាល ឬក្រុមដែលកាងឲ្យថៅកែហ្នឹង គេបានចេញមកសំពងពួកខ្ញុំយកតែម្តង មានសុទ្ធតែដំបងមាឌប៉ុណ្ណាណីៗ ដែលត្រូវបានកម្មករស្គាល់ថា ជាពួកកងកម្លាំងទាំងអស់ គ្រាន់តែស្លៀកពាក់ស៊ីវិលមកសំពងវាយប៉ងសម្លាប់ពួកខ្ញុំនៅមុខរោងចក្រ ខណៈពួកខ្ញុំមិនទាន់បានចុះពីលើម៉ូតូផង»។
យ៉ាងណាលោក ប៉ាវ ស៊ីណា អះអាងថា នៅថ្ងៃទី១៧ ខែមករាខាងនេះ លោកនឹងចូលទៅបំភ្លឺនៅសាលាដំបូងខេត្តកំពង់ស្ពឺតាមការកោះរបស់តុលាការមួយនេះ៕