អាជ្ញាធររាជធានីភ្នំពេញ បានឃាត់ខ្លួនជនជាតិចិនម្នាក់ដែលជាបុគ្គលិកផ្នែកគិតលុយនៃមន្ទីរពេទ្យវ៉ិចតូរៀ បន្ទាប់ពីក្រសួងសុខាភិបាលសម្រេចបិទមន្ទីរពេទ្យនេះកាលពីម្សិលមិញ។
គេហទំព័រនគរបាលជាតិ ឲ្យដឹងថា សមត្ថកិច្ចខណ្ឌទួលគោក បានសម្រេចឃាត់ខ្លួនបុរសជនជាតិចិនឈ្មោះ LI ZHI អាយុ ៣៧ឆ្នាំ ដែលជាបុគ្គលិកផ្នែកគិតប្រាក់ នៃមន្ទីរពេទ្យវ៉ិចតូរៀ ដែលត្រូវបានសង្ស័យថា បានបង្ខាំងមនុស្សដោយខុសច្បាប់។
ជនសង្ស័យជាជនជាតិចិនរូបនេះ ត្រូវបានចាប់ខ្លួនក្រោយពីមានករណីចាប់បង្ខំនារីអ្នកជំងឺម្នាក់ឱ្យវះកាត់ និងបង្ខាំងនាងនិងម្ដាយដើម្បីជាថ្នូរឲ្យរកប្រាក់បង់ថ្លៃសេវាព្យាបាលនៅមន្ទីរពេទ្យ វ៉ិចតូរៀ កាលពីសប្ដាហ៍មុន។
កាលពីថ្ងៃម្សិលមិញនេះ សមត្ថិចរាជធានីភ្នំពេញ បានចុះធ្វើការសាកសួរ និងបិទមន្ទីរពេទ្យវ៉ិចតូរៀ ដែលមានទីតាំងក្នុងសង្កាត់បឹងកក់២ ខណ្ឌទួលគោក បន្ទាប់ពីផ្ទុះរឿងបង្ខាំងមនុស្សទារប្រាក់ថ្លៃព្យាបាលកាលពីថ្ងៃអាទិត្យសប្ដាហ៍មុន៕
