បើទោះជាមានការបារម្ភថាការសម្ដែងក្នុងរឿង «ពិសស្នេហ៍» ដែលតម្រូវអោយខ្លួនសម្ដែងជាតួរបាំ ហើយត្រូវគ្រងឈុតបុរាណ និងត្រូវផាត់មុខអោយសក្បុសដូចតួថ្លុកក្ដី ក៏តារាសម្ដែងកញ្ញា ព្រះកាយ ច័ន្ទ បានអះអាងថា នាងមានអារម្មណ៍សប្បាយចិត្តដោយបានចាត់ទុកថា នេះជាភាពយន្តទី១ ដែលនាងបានសម្ដែងដូចក្ដីសុបិន្តរបស់ខ្លួន ព្រោះតែមុនជោគជ័យនៅក្នុងវិថីសិល្បៈ នាងក៏ជាអ្នករបាំ។
នាងថាខ្លួនចង់សម្ដែងក្នុងភាពយន្តមួយ ដែលបង្ហាញពីទេពកោសល្យជាអ្នករបាំរបស់ខ្លួនបែបនេះជាយូរមកហើយ ប៉ុន្តែ មកពីមិនដែលមានភាពយន្តណាដែលមានសាច់រឿងទាក់ទងនឹងអ្នករបាំ ហើយមិនដែលមានការផ្ដល់ឱកាសអោយនាងបានសម្ដែងជាអ្នករបាំបែបនេះ ទើបនាងយល់ថាភាពយន្តរឿង «ពិសស្នេហ៍» គឺជាអ្វីដែលជួយសម្រេចបំណងអោយខ្លួន។
កញ្ញា ព្រះកាយច័ន្ទ និយាយថា តាំងពីតូចមកម្ល៉េះដែលនាងគឺជាសិស្សផ្នែករបាំបុរាណ ដោយមានរបាំជាច្រើនដែលនាងចេះរាំបានស្ទាត់ ខណៈដែលនាង ក៏បានបញ្ចប់ការសិក្សានៅសាលាភូមិន្ទវិចិត្រសិល្បៈលើជំនាញយ៉ាងជោគជ័យ ប៉ុន្តែមនុស្សមិនច្រើនបានដឹង ព្រោះដឹងត្រឹមតែថានាងគឺជាពិធីការិនី និងជាតារាសម្ដែង។
នាងថា ខ្លួនពិតជាសប្បាយ បន្ទាប់ពីត្រូវផលិតករថៃ និងក្រុមផលិតនៅ ប៉ុស្ដិ៍លេខ៥ ផ្ដល់ឱកាសឲ្យសម្ដែងជាតួឯកស្រីឈ្មោះ នាងរាជនីស្ងួន ដែលជាអ្នករបាំ ដែលការសម្ដែងជាតួអង្គនេះ គឺត្រូវនឹងជំនាញជាអ្នករបាំរបស់នាងប្រមាណជិត២០ឆ្នាំ នៅក្នុងសាលាវិចិត្រសិល្បៈតែម្ដង។
នាងថា ការសម្ដែងជាអ្នករបាំ មិនមានបញ្ហាចំពោះនាងទេ ប៉ុន្តែអ្វីដែលនាងបារម្ភគឺ ការប្រើប្រាស់សម្លៀកបំពាក់បុរាណ និងមកុដដែលនាងបារម្ភពីការលើកឡើងថាខុសរចនាបទ ឬខុសក្បូនខ្នាតជាដើម។ សាច់រឿងដែលនាងសម្ដែងនោះ គឺតម្រូវអោយនាងពាក់មកុដ ដែលជាប្រភេទមកុដរបស់នារីរបាំកាលពី១០០ឆ្នាំមុន ហើយត្រូវលាបមុខអោយស ដោយសារតែនាងគឺជាអ្នករបាំដែលមិនមែនជាមនុស្ស។
ព្រះកាយ ច័ន្ទ បានអះអាងថា រាល់ក្បាច់រចនារបស់មកុដ និងឈុត គឺត្រឹមត្រូវតាមទម្រង់បុរាណទាំងអស់ ប៉ុន្តែមកុដដែលខ្លួនប្រើមកថតនោះ គឺតូចជាងក្បាលបន្តិច ទើបនាងប្រាប់ថា បារម្ភខ្លាចរឿងអ្នកលើកឡើងពីស្ដង់ដារ។ ព្រះកាយច័ន្ទ ប្រកាសថា ខ្លួនស្វែងរកមកុដទម្រង់បុរាណនេះយ៉ាងលំបាកដើម្បីប្រើសម្រាប់ថត ដោយត្រូវស្វះស្វែងខ្ចីពីគ្រូ និងពីអ្នកអង្គម្ចាស់មួយរូបទម្រាំបាន។
ពាក់ព័ន្ធនឹងការរាំរបាំវិញ ព្រះកាយ ច័ន្ទ ប្រកាសថា នាងខានរាំរបាំ៧ឆ្នាំហើយ ប៉ុន្ដែនាងនៅតែគ្មានការបារម្ភចំពោះក្បាច់រាំរែក និងក្បាច់មូលដ្ឋាន ដែលសុទ្ធតែជាចំណុចសំខាន់នៅក្នុងសាច់រឿងនោះទេ ដោយសារតែនាងប្រកាសថារយៈពេលជាង១០ឆ្នាំក្នុងការសិក្សាគឺនាងចេះស្ទាត់។ នាងក៏បានប្រកាសថា នឹងខំប្រឹងប្រែងសម្ដែង នឹងហ្វឹកហាត់អោយបានល្អ ដើម្បីអោយការសម្ដែងជាតួអ្នករបាំផ្លូវការរបស់ខ្លួនទទួលបានការគាំទ្រពេញទំហឹង៕
