ការិយាល័យអ្នកនាំពាក្យរដ្ឋាភិបាលព្រមានថា ខ្លួននឹងចាត់វិធានការគ្រប់រូបភាពលើអ្នកឆ្លើយឆ្លងព័ត៌មានទាក់ទិន្នទៅនឹងការ ប្រើពាក្យពេចន៍ លើរឿងវិធានការដកប្រព័ន្ធអនុគ្រោះពន្ធរបស់សហភាពអឺរ៉ុប ដោយថា ដើម្បីថែរក្សាសតិអារម្មណ៍សាធារណៈ និងពង្រឹងកិច្ចសហប្រតិបត្តិការគ្រប់ជ្រុងជ្រោយជាមួយដៃគូអភិវឌ្ឍន៍ ។
សេចក្តីថ្លែងការណ៍ចេញថ្ងៃព្រហស្បតិ៍ម្សិលមិញ ការរិយាល័យអ្នកនាំពាក្យ លើកឡើងថា រដ្ឋាភិបាលមិនយល់ស្របចំពោះការប្រើពាក្យសហភាពអឺរ៉ុបទុកច្រកឲ្យរដ្ឋាភិបាលកម្ពុជាឬពាក្យដទៃទៀតជាដើម ដែលថា ជាពាក្យមិនសមស្របទៅនឹងចរិតការងាររបស់រដ្ឋាភិបាល ក្នុងភាពជាដៃគូអភិវឌ្ឍពិតប្រាកដជាមួយសហភាពអឺរ៉ុបនោះឡើយ។
រដ្ឋាភិបាលចាត់ទុកថា ពាក្យទាំងនេះ ស្ថិតក្នុងបំណងញុះញង់ឬប្រឆាំងនឹងភាពជាដៃគូរវាងកម្ពុជានិងសហភាពអឺរ៉ុប។
សេចក្តីថ្លែងការណ៍នេះឲ្យដឹងទៀតថា៖ «រដ្ឋាភិបាលនៃប្រជាជាតិអធិបតេយ្យ សូមអំពាវនាវដល់រាល់បណ្តាអង្គភាព ឬបុគ្គលពាក់ព័ន្ធសូមរក្សាភាពថ្លៃថ្នូរ និងក្រមសីលធម៌ប្រកបដោយវិជ្ជាជីវៈខ្ពស់ ក្នុងកិច្ចរក្សាដំណើរការពិភាក្សានេះ ប្រកបដោយភាពវិជ្ជមាននិងស្ថិតក្នុងភាពជាដៃគូអភិវឌ្ឍន៍ដោយមិនបង្កការភាន់ច្រឡំជាយថាហេតុណាមួយ ដែលកើតចេញពីការបង្កើតព័ត៌មានញុះញង់ ឬក្លែងក្លាយ»។
រដ្ឋាភិបាលក៏បានបញ្ជាក់ពីការប្តេជ្ញាក្នុងការចាត់វិធានការ៖ « រដ្ឋាភិបាលនឹងចាត់វិធានការដោយម៉ឺងម៉ាត់ និងគ្រប់រូបភាព ក្នុងកិច្ចរក្សាសតិអារម្មណ៍សាធារណៈ និងកិច្ចសហប្រតិបត្តិការគ្រប់ជ្រុងជ្រោយ ប្រឆាំងនិងព័ត៌មានមិនពិត (Fake News)។»
សហភាពអឺរ៉ុប កំពុងដំណើរការព្យួរ ឬដកប្រព័ន្ធអនុគ្រោះពន្ធ «អ្វីៗគ្រប់យ៉ាងលើកលែងតែសព្វាវុធ» (EBA ) ពីកម្ពុជាវិញ ដោយថា បើរដ្ឋាភិបាល មិនស្តារប្រជាធិបតេយ្យឡើងវិញ តាមលក្ខខណ្ឌរបស់ខ្លួន ។ ក្រុមប្រទេសប្លុកលោកសេរីមួយនេះ បានទុកពេលឲ្យរដ្ឋាភិបាលកែស្ថានការណ៍ ៦ខែពីរដង ដែលដំណាក់ទី១ត្រឹមខែមីនា ឆ្នាំ២០១៩នេះ។
