ម្ចាស់អាជីវកម្មមួយចំនួននៅរាជធានីភ្នំពេញអះអាងថា តម្លៃអង្ករដែលពួកគេលក់សព្វថ្ងៃមានតម្លៃធម្មតា មិនមានអ្វីប្រែប្រួលទេ បើទោះបីជាសហភាពអឺរ៉ុបបានសម្រេចយកពន្ធពីកម្ពុជាលើផលិតផលនេះក៏ដោយ។
កាលពីថ្ងៃទី១៦ ខែមករា សហភាពអឺរ៉ុបបានសម្រេចយកពន្ធអង្ករនាំចូលពីប្រទេសកម្ពុជា និងប្រទេសភូមា នៅរយៈពេល ៣ឆ្នាំជាប់គ្នា ទៅតាមសំណើបណ្ដាសមាជិកដែលជាប្រទេសផលិតអង្កររបស់ខ្លួន ដោយចាប់ផ្ដើមអនុវត្តចាប់ពីថ្ងៃទី១៨ ខែមករានេះតទៅ។
ក្រោយការសម្រេចរបស់សហភាពអឺរ៉ុប កសិករ ឈ្មួញទិញស្រូវ និង អ្នកស្រាវជ្រាវមួយចំនួនបានបង្ហាញពីការព្រួយបារម្ភពីការធ្លាក់ចុះតម្លៃស្រូវ។ កសិករនៅតាមបណ្តាខេត្តមួយចំនួនបានប្រាប់វីអូឌីថា តម្លៃស្រូវពួកគាត់លក់បានតម្លៃថោកគឺពី៧០០រៀលទៅ១០០០រៀល។
ទោះយ៉ាងណាក្រុមការងាររបស់ វីអូឌី បានចុះទៅសាកសួរកន្លែងលក់អង្ករមួយចំនួនក្នុងរាជធានីភ្នំពេញនៅថ្ងៃសុក្រនេះ ពួកគាត់តម្លៃអង្ករមិនមានអ្វីប្រែប្រួលទេ។
ម្ចាស់ហាងលក់អង្ករបោះដុំ និងរាយនៅជិតរ៉ារទេះភ្លើង ស្ថិតនៅខណ្ឌដូនពេញ រាជធានីភ្នំពេញ លោក សុខ ចំរើន បានរៀបរាប់ថា អង្ករផ្កាផ្ញី រំដួល និងផ្កាម្លិះទម្ងន់៥០គីឡូក្រាម (មួយបេ) តម្លៃចន្លោះពី៣០ទៅ៤០ដុល្លារ គឺតម្លៃធម្មតា។
លោកមានប្រសាសន៍ថា៖ «បច្ចុប្បន្ននេះអត់មានអ្វីជ្រួលច្របល់ទេ គឺអ្នកហូប អ្នកញាំធម្មតា ម៉ូយតាមផ្ទះ ធម្មតាដល់ខែគាត់ហៅ អស់អង្ករបានហៅ ហើយតម្លៃថ្លៃថ្នូរ ក៏យើងអត់ឡើងខ្ពស់ច្រើនដែរ ខុសត្រូវតែមួយដុល្លារ ពីរដុល្លារចឹង»។
អ្នកលក់អង្ករនៅផ្សារធំថ្មី អ្នកស្រី សេង ងីម និយាយថា កន្លែងគាត់តម្លៃនៅធម្មតា ហើយអ្នកស្រីស្នើឲ្យមានការប្រែប្រួលនាំឲ្យពិបាកទាំងអ្នកទិញ និងអ្នកលក់ដូចជារូបគាត់។
អ្នកស្រីនិយាយថា៖ «ធ្វើម៉េចឲ្យសមរម្យទៅ ងាយស្រួលឲ្យយើងរកស៊ី ងាយស្រូលភ្ញៀវមក គ្នាទិញក៏មានទឹកចិត្តចង់ទិញដែរ ខ្ញុំនៅពេលឡើងថ្លៃរហូត ខ្ញុំក៏ពិបាកលក់ដែរ»។
ឈរទិញអង្ករនៅម្តុំផ្សារថ្មី អ្នកស្រី ថន សារ៉េន បានរៀបរាប់ថា គាត់មិនចាប់អារម្មណ៍នឹងប្រទេសលោកសេរីកាត់ផ្តាច់ប្រព័ន្ធអនុគ្រោះពន្ធនាំអង្ករពីកម្ពុជាទៅក្រៅប្រទេសទេ ប៉ុន្តែអ្នកស្រីស្នើរដ្ឋាភិបាលធានាតម្លៃអង្ករឲ្យបានសមរម្យងាយស្រួលដល់អ្នកទិញដូចជារូបគាត់ និងកសិករអ្នកដាំដុះ។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ស្រី វុឌ្ឍី មានប្រសាសន៍ថា កម្ពុជាបានតៀមរួចហើយដើម្បីទប់ទល់នឹងការគិតពន្ធអង្កររបស់សហភាពអឺរ៉ុបនេះ ដើម្បីកុំប៉ះដល់ទីផ្សារក្នុងស្រុកនិងទីផ្សារនាំចេញ។ លោកថា វិធីសាស្ត្រនោះរួមមាន ការសម្លឹងរកទីផ្សារបន្ថែម ការពង្រឹងប្រព័ន្ធធារាសាស្ត្រ បញ្ចុះតម្លៃអគ្គិសនី និងរៀបចំហេដ្ឋារចនាសម្ព័ន្ធផ្លូវថ្នល់ជាដើម។
លោកថា៖ «កន្លងមកអាមេរិកធ្លាប់កាត់ GSP កាត់អីអស់ ហើយគេប៉ាន់ថា កម្ពុជាហ្នឹងដួលហើយ ការពិតមិនមែនដួលឯណា។ មកដល់ថ្ងៃនេះនៅឈររឹងតើ! ហើយខ្ញុំគិតថា កាលណាយើងទោរទន់ទៅលើអ្វីដែលគេជួយហ្នឹង យើងអត់រឹងមាំទេ »។
សហព័ន្ធស្រូវអង្ករកម្ពុជាបានលើកឡើងកាលពីចុងខែវិច្ឆិកាកន្លងទៅថា ការសម្រេចយកពន្ធនាំ ចូលអង្ករពីកម្ពុជានេះ វានឹងធ្វើឲ្យប៉ះពាល់ដល់ជីវភាពរបស់កសិករកម្ពុជាប្រមាណ៣លាននាក់ និងធ្វើឲ្យប៉ះពាល់ដល់វិស័យឧស្សាហកម្មមួយចំនួនទៀតផងដែរ។