មានការចាប់អារម្មណ៍មិនតិចទេ បន្ទាប់ពីតួអង្គម្ដាយ២រូបដែលត្រូវគេកត់សម្គាល់ថា មានស្នាដៃសម្ដែងរឿងរាប់មិនអស់ប្រមាណជាង២០ឆ្នាំមកហើយ ដែលបានអះអាងថា នៅពីក្រោយខ្នងនៃការសម្ដែងខ្លួនកម្សត់ដាច់ឆ្ងាយពីក្នុងសាច់រឿង ដោយពុំមានផ្ទះសម្បែងផ្ទាល់ខ្លួន។
តារាសម្ដែងអ្នកស្រី ញឹម សុខា និងអ្នកស្រី អ៊ឹម ផល្លារ បញ្ជាក់ថា ខ្លួនសម្ដែងប្រមាណជាង២០ឆ្នាំ បានត្រឹមតែល្អមើលប៉ុណ្ណោះ ដែលបញ្ហានេះ គឺដោយសារតែតម្លៃខ្លួនដែលបានទទួលពីការសម្ដែងមិនត្រូវបានផលិតករផ្ដល់ឲ្យខ្ពស់។
អ្នកស្រី ញឹម សុខា ដែលទើបបញ្ចប់ការសម្ដែងភាពយន្តរឿង «កញ្ញាជើងខ្លាំង» របស់ស្ថានីយទូរទស្សន៍ប៉ុស្ដិ៍លេខ៥ បានអះអាងក្នុងពិធីជប់លៀងបិទសកម្មភាពរឿងនេះ កាលពីយប់ថ្ងៃទី១៩ មករា ថា អ្នកស្រីគ្រាន់តែជាតួសម្ដែងមួយរូបដែលរស់នៅផ្ទះជួលក្នុងតម្លៃ៧០–៨០ដុល្លារ នៅម្ដុំបឹងសាឡាង ហើយខែខ្លះរកតែលុយបង់ថ្លៃបន្ទប់មិនគ្រាន់ផង។ អ្នកស្រីរស់ក្នុងសភាពបែបនេះប្រមាណ១៥ឆ្នាំហើយ ដោយក្រៅពីចិញ្ចឹមខ្លួន ក៏មានបន្ទុកជួយចិញ្ចឹមកូនចៅមួយចំនួនផង។
អ្នកស្រី ញឹម សុខា ពន្យល់ថា ហេតុផលដែលខ្លួនសម្ដែងច្រើនឆ្នាំ តែនៅតែពិបាក គឺមិនមែនដោយសារខ្ជះខ្ជាយទេ ប៉ុន្តែគឺបណ្ដាលមកពីការសម្ដែងកន្លងមកបានថោកសឹងមិនអាចនិយាយបាន។ អ្នកស្រីថា ជាង១០ឆ្នាំកន្លងមក ផលិតករឲ្យថ្លៃថតមួយថ្ងៃតែ១០ដុល្លារ និងខ្លះ៥ម៉ឺនរៀល ឬ២០ដុល្លារប៉ុណ្ណោះ ដោយឲ្យតែហ៊ានតែសុំឡើងជាងនេះ គឺមិនយកឲ្យថតតែម្ដង ទើបអ្នកស្រីដែលត្រូវការលុយដើម្បីបង្គ្រប់កង្វះខាតផង គឺបានប៉ុន្មានក៏ត្រូវតែថត។ អ្នកស្រីថា ខ្លួនទើបតែមានឱកាសថតបានមួយរឿង៥០០ដុល្លារ ទៅ១ពាន់ដុល្លារ ក្នុងប៉ុន្មានរឿងចុងក្រោយឲ្យប៉ុស្ដិ៍លេខ៥ប៉ុណ្ណោះ ខណៈដែលតម្លៃដែលត្រូវទទួលបាននេះ គឺទាល់តែ៣ទៅ៤ខែទើបបាន។ អ្វីដែលសំខាន់គឺតម្លៃមិនខ្ពស់ដែលអ្នកស្រីធ្លាប់ទទួលបាននេះ មិនត្រូវបានផលិតករភាគច្រើនហៅឲ្យថតទៀត ដោយផលិតករខ្លះសុខចិត្តយកតួថ្មីៗ ឲ្យតែងខ្លួនធ្វើចាស់ ដោយអះអាងថា គេស៊ីថ្លៃទាបជាងតួជំនាន់អ្នកស្រី។
អ្នកស្រី ញឹម សុខា មានប្រសាសន៍ថា៖ «តួគេក្មេងៗ គេសម្ដែងបានថ្លៃ ហើយមានគេអាណិតគេស្រឡាញ់ឧបត្ថម្ភនេះនោះ បើតួម៉ែៗដូចខ្ញុំមានអី គឺថតមួយថ្ងៃបានថោកៗហើយ ស្អីក៏ទិញខ្លួនឯងដែរ ដល់អញ្ចឹងចង់ភ័យខ្លាចតែឈឺទៅ អត់លុយមើលខ្លួនទេ បើរាល់ថ្ងៃបានតែរស់ និងបង់ថ្លៃផ្ទះជួលចឹង!»។
អ្នកស្រី អ៊ឹម ផល្លារ ដែលត្រូវគេឃើញច្រើនក្នុងតំណែងជាតួអ្នកបម្រើ និងមេដោះ រឹតតែបង្ហាញពីភាពកម្សត់ក្រោយឆាក។ អ្នកស្រីថា ជាង២០ឆ្នាំកន្លងមក អ្នកស្រីថតកុនសម្រាប់តែរកលុយមកជួលបន្ទប់តម្លៃ៥០ដុល្លារជាន់ខាងលើនៅផ្សារតាប៉ាង ដើម្បីរស់នៅប៉ុណ្ណោះ ខណៈដែលស្ថានភាពនេះបើកុំតែបានម្ចាស់ផ្ទះ យោគយល់ផង ប្រហែលជាត្រូវម្ចាស់ផ្ទះដេញចេញមិនដឹងមួយថ្ងៃប៉ុន្មានដងនោះទេ។
អ្នកស្រី អ៊ឹម ផល្លារ មានប្រសាសន៍ថា តួម្ដាយចាស់ៗដូចជាអ្នកស្រី សុំតម្លៃខ្លួនត្រឹមតែមួយថ្ងៃ៣៥ ឬ៤០ដុល្លារ គឺមិនបាននោះឡើយ ដោយផលិតករភាគច្រើនគ្រាន់តែអ្នកស្រីតវ៉ាសុំតម្លៃដែលបានបញ្ជាក់ខាងលើ គឺឈប់ហៅថតតែម្ដង។ អ្នកស្រីថា មានផលិតករនៅប៉ុស្ដិ៍លេខ៥ប៉ុណ្ណោះ ដែលអាណិតអ្នកស្រី ហើយហ៊ានឲ្យអ្នកស្រីក្នុងមួយថ្ងៃ៥០ដុល្លារ ប៉ុន្តែក៏ទើបតែបានថតក្នុងប៉ុន្មានរឿងចុងក្រោយដែរ ទើបអ្នកស្រីថា បើតម្លៃខ្លួនទទួលបាន៥០នេះ ហើយមានផលិតករហៅថតឲ្យច្រើនឲ្យញឹក គឺពិតជាអ្នកស្រីរស់បាន។
អ្នកស្រី អ៊ឹម ផល្លារ បានបន្តថា ខ្លួនចេញថតរាល់លើក គឺអាចរស់បានដោយសារតែមានបងប្អូនអ្នកសិល្បៈជូនលុយជូនកាក់ និងឲ្យខោអាវចាស់ៗស្លៀកថតប៉ុណ្ណោះ បើរំពឹងយកលុយពីការថតកុនមកទិញ គឺដឹងតែដាច់បាយតែម្ដង។ អ្នកស្រីទទូចអោយផលិតករជួយផ្ដល់ការងារអោយតួចាស់ៗអោយបានច្រើន ដោយអ្នកស្រីប្រកាសថា បើកុំតែបានផលិតករប៉ុស្ដិ៍លេខ៥ហៅអោយថតក្នុងប៉ុន្មានរឿងចុងក្រោយ គឺពិតជាដាច់បាយតែម្ដង។
ជាមួយនឹងការបង្ហើបឲ្យដឹងពីស្ថានភាពនៅក្រោយខ្នងនេះ ទើបគេកត់សម្គាល់ថា តារាសម្ដែងចាស់ៗ រមែងជួបបញ្ហាជីវភាព នៅក្រោយពេលធ្លាក់ខ្លួនឈឺ ហើយសម្ដែងលែងកើត៕
