វិរៈសិល្បការិនីជើងចាស់ល្បីឈ្មោះ អ្នកគ្រូ គង់ ណារី បានទទួលមរណភាពយ៉ាងគួរឲ្យសោកស្ដាយបំផុត កាលពីរសៀលថ្ងៃទី២០ ខែមករា ឆ្នាំ២០១៩ បន្ទាប់ពីបានចូលសង្គ្រោះបន្ទាន់នៅក្នុងមន្ទីរពេទ្យព្រះកុសុមៈអស់ច្រើនថ្ងៃ ដោយជំងឺក្រិនថ្លើម និងទាចទឹក។
អ្នកគ្រូ គង់ ណារី បានទទួលមរណភាពដោយមិនបានសម្រេចបំណងប្រាថ្នាតូចមួយ ដែលអ្នកគ្រូទទូចចង់ធ្វើឲ្យខានតែបាន មុនពេលទទួលមរណភាព។
លោក សន សុវណ្ណារ៉ា កូនសិស្សជំនិតរបស់អ្នកគ្រូ គង់ ណារី ដែលត្រូវគេដឹងថា ចេញចូលមើលថែជំងឺអ្នកគ្រូតាំងពីមុនអ្នកគ្រូទទួលមរណភាព បានអះអាងថា មុលពេលចែកឋានអ្នកគ្រូរមែងទទូចចង់ទៅវត្ត ដោយអ្នកគ្រូប្រាប់ថា ចង់យកចង្ហាន់ទៅប្រគេនព្រះសង្ឃ យ៉ាងហោចឲ្យបានម្ដងពេលមុនផុតដង្ហើម។ លោកថា អ្នកគ្រូរំអុកហើយរំអុកទៀត រឿងចង់ទៅវត្ត ដោយក្រៅពីប៉ងចង់យកចង្ហាន់ទៅប្រគេនព្រះសង្ឃ ក៏ចង់ថ្វាយផ្កានៅចំពោះមុខព្រះពុទ្ធបដិមាផងដែរ។
លោក សន សុវណ្ណារ៉ា យល់ថា គឺជារឿងសោកស្ដាយដែលអ្នកគ្រូមិនអាចសម្រេចបំណងប្រាថ្នានេះ។ មុនពេលទទួលមរណភាព អ្នកគ្រូនៅមានស្មារតីរឹងប៉ឹងប៉ុណ្ណោះ ដោយលោកបានទាំងរំពឹងថា អ្នកគ្រូនឹងអាចធូរស្រាលបានបន្តិច ហើយអាចទៅវត្តបានម្ដងមុនដង្ហើមចុងក្រោយ ព្រោះតែបំណងប្រាថ្នានោះ លោកថាគឺជារឿងតូចតាច សំខាន់ឲ្យតែអ្នកគ្រូក្រោកបានបន្តិច។ លោកថា អ្នកគ្រូអត់មានកូនចៅទេ គឺមានតែប្អូនៗ ខណៈដែលលោកក៏ត្រូវអ្នកគ្រូបណ្ដាំផ្ញើឲ្យចេញមុខជំហរធ្វើបុណ្យឲ្យផង នៅពេលដែលអ្នកគ្រូបាត់បង់ជីវិត។
មិនខុសគ្នាដែរ លោក កែន ឧត្តមវាសនា ដែលជាតារាសម្ដែង និងជាកូនសិស្សរបស់អ្នកគ្រូមួយរូបដែរ បានអះអាងថា កាលពីប៉ុន្មានថ្ងៃមុន លោកទើបតែបានចូលទៅសួរសុខទុក្ខអ្នកគ្រូនៅក្នុងមន្ទីរពេទ្យប៉ុណ្ណោះ ហើយអ្នកគ្រូបានទទូចសុំដូចគ្នាសុំឲ្យលោកជូនអ្នកគ្រូទៅវត្ត ដោយលោកបានទាំងសន្យាថា នឹងដឹកអ្នកគ្រូយកទៅវត្តតាមការស្នើសុំ នៅពេលអ្នកគ្រូមានកម្លាំងកំហែងបានបន្តិច។ លោកថា ជារឿងសោកស្ដាយដែលបំណងប្រាថ្នាតូចមួយមិនអាចសម្រេចអោយអ្នកគ្រូបាន ក្នុងពេលដែលលោកក៏មិនចង់ជឿថាអ្នកគ្រូ គង់ ណារី ដែលមានស្មារតីរឹងប៉ឹង និងមិនសូវទ្រុឌទ្រោមខ្លាំងមុនទទួលមរណភាព ស្រាប់តែផុតដង្ហើមលឿនដល់ម្លឹង។
គួរបញ្ជាក់ផងដែរថា អ្នកគ្រូ គង់ ណារី គឺជាអតីតគ្រូបង្ហាត់សិល្បៈប្រចាំនៅក្នុងវិទ្យាល័យវត្តកោះ ដោយអ្នកគ្រូមានជំនាញបង្ហាញផ្នែករបាំ ពិធីករ ចម្រៀង និងកំណាព្យ ហើយបានបណ្ដុះតារាសិល្បៈជាច្រើនរូបឲ្យក្លាយជាតារាដែលមានកេរ្តិ៍ឈ្មោះបោះសំឡេងជាពិសេសលើជំនាញចម្រៀង និងពិធីករ ដូចជា កញ្ញា ទូច ស៊ុននិច អ្នកនាង ម៉េង កែវពេជ្ជតា និងលោក អ៊ឹង រដ្ឋា ហៅនាយទុយជាដើម។ អ្នកគ្រូធ្លាក់ខ្លួនឈឺធ្ងន់ច្រើនខែមកហើយ ដោយទើបតែមានសភាពធ្ងន់កាលពីរង្វង់២ខែចុងក្រោយ ហើយទទួលមរណភាពកាលពីរសៀលថ្ងៃទី២០ ខែមករា ខណៈដែលសពអ្នកគ្រូនឹងកំណត់បូជានៅថ្ងៃពុធទី២៣ ខែមករា វេលាម៉ោង៩យប់ នៅបរិវេណវត្តស្រះចក៕