សាលារាជធានីភ្នំពេញ អនុញ្ញាត្តឲ្យក្រុមហ៊ុនម៉ៅការសាងសង់ជប៉ុន យកផ្នែកមួយនៃសួនប្រជាធិបតេយ្យថ្មីប្រើប្រាស់រយៈពេល៣ឆ្នាំ ជាទីធ្លាសម្រាប់ទុកដាក់គ្រឿងសំណង់ក្នុងការអនុវត្តគម្រោងស្ដារប្រព័ន្ធប្រឡាយ-លូ ។
យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញចុះកាលពីម្សិលមិញបានឲ្យដឹងថា ក្រុមហ៊ុនម៉ៅការសាងសង់ជប៉ុន TOA Corporation បានឈ្នះការដេញថ្លៃអនុវត្តន៍គម្រោងការពារទឹកជំនន់ និងកែលម្អប្រព័ន្ធប្រឡាយ-លូ ជំហានទី៤ ដែលជាជំនួយឥតសំណងពីប្រទេសជប៉ុន។ ប្រភពដដែល បន្ថែមថា ក្រុមហ៊ុននេះ នឹងរៀបចំព័ទ្ធរបងស័ង្កសី ដើម្បីសាងសង់ការិយាល័យការដ្ឋាន ឃ្លាំង និងទីធ្លាទុកដាក់សំណង់នៅប៉ែកខាងជើងសួនប្រជាធិបតេយ្យថ្មីនៅខណ្ឌឫស្សីកែវ ចាប់ពីខែមករានេះតទៅ លើទំហំ ៤០៥០ម៉ែត្រការេដោយប្រើប្រាស់រយៈពេល៣ឆ្នាំ។
មន្រ្តីស៊ើបអង្កេតជាន់ខ្ពស់ផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក លោក ស៊ឹង សែនករុណាបានប្រាប់សារព័ត៌មានវី.អូ.ឌីថា ការផ្លាស់ប្ដូរទីលានប្រជាធិបតេយ្យទៅទីតាំងថ្មីនេះមានការមិនពេញចិត្តពីសង្គមស៊ីវិល និងប្រជាពលរដ្ឋរួចទៅហើយ បើដាក់ការដ្ឋានទុកដាក់សំណង់នៅទីនោះនឹងធ្វើឲ្យមានផលរំខានដល់ការជួបជុំរបស់ប្រជាពលរដ្ឋ និងអង្គការសង្គមស៊ីវិល។
លោកមានប្រសាសន៍ថា៖ «វាប៉ះពាល់បើសិនជាមានការជួបជុំ ការប្រមូលផ្ដុំមនុស្សច្រើនតែបែរជាមានការដាក់នូវសម្ភារៈផ្សេងៗ។ វាទើសទាល់ចង្អៀត មានការរំខានធ្វើឲ្យអ្នកចូលរួមមិនអាចបញ្ចេញមតិយោបល់ឲ្យបានល្អប្រសើរទេ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដីបានប្រាប់សារព័ត៌មានវី.អូ.ឌី ថា ការប្រើប្រាស់សួនប្រជាធិបតេយ្យថ្មី សម្រាប់ដាក់គ្រឿងសំណង់ទាំងនោះមិនមានផលប៉ះពាល់អ្វីទេ។ លោកបន្តថា សួននេះនៅតែអាចប្រើប្រាស់បានដដែល ដោយថាក្រុមហ៊ុនប្រើវាតែមួយផ្នែកប៉ុណ្ណោះ។
លោកមានប្រសាសន៍ថា៖ «ទីលាននេះនៅដំណើរការដដែល អត់មានអីទេគ្រាន់តែជាចំណែកមួយដើម្បីធ្វើទីតាំងបណ្ដោះអាសន្នសម្រាប់អនុវត្តគម្រោងការពារទឹកជំនន់ជំហាន៤»។
កាលពីឆ្នាំ២០១៧កន្លងទៅ សាលារាជធានីភ្នំពេញបានសាងសង់សួនប្រជាធិបតេយ្យថ្មីមួយដែលមានទីតាំងប្រមាណជាង៦គីឡូម៉ែត្រពីរាជធានីភ្នំពេញជំនួសកន្លែងចាស់ដើម្បីផ្ដល់លទ្ធភាពឲ្យមនុស្សច្រើនពាន់នាក់ប្រមូលផ្ដុំ និងសម្ដែងមតិ៕