ក្រសួងព័ត៌មានគ្រោងបង្កើតកម្មវិធីផ្សាយផ្ទាល់នៅលើទូរទស្សន៍ជាតិកម្ពុជា ដោយថាដើម្បីប្រឆំាងព័ត៌មានក្លែងក្លាយ និងទប់ស្តាត់កុំអោយប្រជាពលរដ្ឋភ័ណ្ឌច្រលំខុសពីការពិត នាំឲ្យមានចលាចលក្នុងសង្គម។
ក្នុងកិច្ចប្រជុំប្រចាំសប្តាហ៍របស់ថ្នាក់ដឹកនាំក្រសួងព័ត៌មាននៅថ្ងៃទី២១ ខែមករា រដ្ឋមន្រ្តីក្រសួងព័ត៌មានលោក ខៀវ កាញារីទ្ធមានប្រសាសន៍ថា ក្រសួងនឹងបង្កើតកម្មវិធីពិសេសផ្សាយផ្ទាល់នៅទូរទស្សន៍ជាតិកម្ពុជាក្នុងរយៈពេលមួយម៉ោង ដោយអញ្ជើញវាគ្មិនពាក់ព័ន្ធមកបកស្រាយពន្យល់រាល់ព័ត៌មិនពិតក្លែងបន្លំទំាងឡាយ ដែលធ្វើឲ្យចលាចលនៅក្នុងសង្គម។ លោកបញ្ជាក់ថា ដើមចមដែលនាំឲ្យក្រសួងបង្កើតកម្មវិធីនេះ ដោយសារបច្ចុប្បន្នព័ត៌មានមិនពិតបានកើតឡើងច្រើន ជាពិសេសក្រុមអ្នកប្រឆាំងមួលបង្កាច់ បង្ខូច មកលើរដ្ឋាភិបាល ធ្វើឲ្យប្រជាពលរដ្ឋយល់ខុសពីការពិត នឹងឲ្យប៉ៈពាល់ដល់កិត្តិយសអ្នកដ៏ទៃជាដើម។
ទោះជាយ៉ាងណារដ្ឋមន្ត្រីក្រសួងព័ត៌មានរូបនោះ មិនបានកំណត់ពីប្រភេទព័ត៌មានបែបណា ដែលថាមិនពិត ឬក្លែងក្លាយនោះទេ។
អ្នកនាំពាក្យក្រសួងព័ត៌មាន លោក អ៊ុក គឹមសេង មានប្រសាសន៍បន្ថែមថា អំឡុងខែកុម្ភៈ ក្រសួងនឹងចាប់ផ្តើមដំណើរការកម្មវិធីផ្សាយផ្ទាល់នៅលើទូរទស្សន៍ជាតិកម្ពុជា ដើម្បីបង្កើតជាសារអប់រំ ពន្យល់ប្រជាពលរដ្ឋ ជាពិសេសអ្នកសារព័ត៌មាន ឲ្យបានទូលំទូលាយ ដើម្បីបញ្ចៀសឲ្យផុតពីការផ្សាយព័ត៌មានមិនពិត និងក្លែងក្លាយ។ លោកបញ្ជាក់ថា ព័ត៌មានបែបណាពិត ឬក្លែងក្លាយ អាស្រ័យលើការពិនិត្យលើសកម្មភាពកើតឡើងជាក់ស្តែង។
លោកមានប្រសាសន៍ថា៖ «ឲ្យយើងថាមួយណាជាព័ត៌មានពិត មួយណាជាពត៌មានពិត មួយណាជាព័ត៌មានក្លែងក្លាយ ត្រង់ថា វាមានឥទ្ធិពលរបៀបម៉េច ឧទាហរណ៍ដូចជា ប៉ុន្មានថ្ងៃមុនគេមានសារមួយបង្ហោះថា មានការពាក់ព័ន្ធនឹងការចាប់ខ្លួនឧកញ៉ា គិត ម៉េង ចឹងទៅ។ ឲ្យយើងកំណត់ថា បែបនេះ ឬបែបនោះ ទៅមើលចរិតនៃសារនោះ នៃរូបភាពហ្នឹងបានយើងកំណត់បាន»។
សាស្ត្រាចារ្យផ្នែកព័ត៌មាននៅសាកលវិទ្យាល័យកម្ពុជា លោក មឿន ឈានណារិទ្ធ មានប្រសាសន៍ថា ក្រសួងគួរតែកំណត់ប្រភេទនៃព័ត៌មានក្លែងក្លាយ និងព័ត៌មានមិនពិតជាសាធារណៈ ដើម្បីបញ្ជៀសបញ្ហាប្រឈមនានាដល់អ្នកសារព័ត៌មាន និងអ្នកចែករំលែកព័ត៌មានបន្ត។
សាស្ត្រាចារ្យរូបនោះជំរុញទៅអ្នកសារព័ត៌មាន និងអ្នកចែកចាយបន្តត្រូវប្រុងប្រយ័ត្នមុនធ្វើការផ្សព្វផ្សាយព័ត៌មាន ដើម្បីបញ្ចៀសហានិភ័យនានា។
លោកមានប្រសាសន៍ថា៖ «យើងត្រូវចេះធ្វើការវាយតម្លៃ ប្រភេទនៃព័ត៌មាន ហើយនឹងប្រភេទនៃប្រភពព័ត៌មាន ឲ្យដឹងថា ប្រភពដែលធ្លាប់ផ្តល់ព័ត៌មានឲ្យយើង ធ្លាប់ផ្តល់បទសម្ភាសន៍ឲ្យយើង គាត់ធ្លាប់និយាយខុសដែរឬអត់ គាត់ធ្លាប់និយាយកុហកយើងអត់? គាត់ធ្លាប់យកអ្នកសារព័ត៌មានធ្វើជាឈ្នាន់ដើម្បីវាយប្រហារទៅលើបុគ្គលណាម្នាក់ ឬស្ថាប័នណាមួយឬអត់ បើបុគ្គលនោះជាប្រភពព័ត៌មានដែលល្អ ដែលមិនធ្លាប់មានកំហុសឆ្គងកន្លងមក។ ខ្ញុំគិតថា យើងអាចជៀសវាងបាននៅប្រភេពពត៌មានក្លែងក្លាយនេះ»។
ប្រធានក្លឹបអ្នកកាសែតកម្ពុជា លោក ប៉ែន បូណា មានប្រសាសន៍ថា វិធានការរបស់ក្រសួងក្នុងការទប់ស្កាត់ការផ្សព្វផ្សាយព័ត៌មានក្លែងក្លាយ និងមិនពិត ជារឿងល្អដើម្បីឲ្យតម្រង់ទិសឲ្យអ្នកសារព័ត៌មានមានវិជ្ជាជីវៈ និងក្រមសីលធម៌ពិតប្រាកដ។ ប៉ុន្តែលោកជំរុញទៅក្រសួងចាត់វិធានការលើអ្នកដែលផ្តើមគំំនិតបង្កើតព័ត៌មានមិនពិត ឬក្លែងក្លាយ ជាជាងចាត់វិធានការលើអ្នកចែកចាយបន្ត។
លោកមានប្រសាសន៍ថា៖ «ក្រសួងមានសមត្ថកិច្ចផ្សេងៗ នៅពេលដែលមានវិធានការចំពោះអ្នកណា ប្រឌិត ដែលជាមេគំនិត បង្កើតព័ត៌មានក្លែងក្លាយ ដើម្បីបំផ្លាញសង្គម បំផ្លាញវិជ្ជាជីវៈព័ត៌មានឲ្យចំទៅអ្នកហ្នឹង។ បើយើងធ្វើបានទាំងអស់គ្នា យើងអាចទប់ស្កាត់បាន»។
កាលពីថ្ងៃសុក្រ ទី ១៨ ខែមករា ឆ្នាំ ២០១៨ ប្រធាននាយកដ្ឋានប្រឆាំងបទល្មើសបច្ចេកវិទ្យា លោក ជា ពៅ បានជួបប្រជុំជាមួយប្រធានផ្នែកគោលនយោបាយសាធារណៈ តំណាងក្រុមហ៊ុនបណ្តាញសង្គមហ្វេសប៊ុក (Facebook) ដែលមានមូលដ្ឋាននៅប្រទេសសិង្ហបុរី ដើម្បីជជែកពិភាក្សាគ្នាពីបញ្ហាមួយចំនួន។ ក្នុងកិច្ចប្រជុំនោះភាគីទាំងពីរ បានឯកភាពធ្វើកិច្ចសហការរួមគ្នាប្រយុទ្ធប្រឆាំងការចែកចាយព័ត៌មានមិនពិតដែលបង្កការប៉ះពាល់ដល់សន្តិសុខសង្គមជាតិ៕