ក្នុងពិធីសម្ពោធរឿង «អន្ទងវិញ្ញាណ» កាលពីល្ងាចថ្ងៃទី២២ ខែមករា នៅផ្សារទំនើបអ៊ីអន២ តួឯកស្រីភាពយន្តនេះ បានអះអាងថា ខ្លួនពិតជាភរិយាផលិតករ និងជាស្រ្តីមានកូន ហើយការអះអាងរបស់តារារូបនេះមិនបារម្ភពីការបាត់បង់ប្រជាប្រិយភាពក្នុងវិស័យសិល្បៈនោះទេ។
តារាភាពយន្ត អ្នកនាង លីងលីង បានប្រកាសជាសាធារណថា អ្នកនាងមិនមែនជាតារានៅលីវនោះទេ ហើយអ្នកនាងមិនស្ដាយនោះដែរ បើមហាជនមិនគាំទ្រសម្រាប់ការសម្ដែងរបស់ខ្លួននៅពេលដឹងថាអ្នកនាងមិនមែននៅលីវ ដ្បិតអ្នកនាងមិនអាចដោយសារតែសិល្បៈ ហើយសុខចិត្តលាក់បាំងរឿងរ៉ាវសុភមង្គលរបស់ខ្លួនឡើយ។
អ្នកនាង លីងលីង បានប្រាប់ឲ្យដឹងថា ខ្លួនប្រើសមត្ថភាពមកសម្ដែងទាំងច្រៀង និងសម្ដែង ដោយមុនត្រូវបានស្វាមីជ្រើសឲ្យសម្ដែងជាតួឯក គឺអ្នកនាងរកបានអ្នកគាំទ្របានច្រើនមកហើយ ជាពិសេសនៅក្នុងអាជីពចម្រៀង។
អ្នកនាង លីងលីង បានថ្លែងបញ្ជាក់ថា មុនសម្ដែងនៅក្នុងភាពយន្ តអ្នកនាងគឺជាតារាចម្រៀង ដោយបានបញ្ចេញបទចម្រៀងជាច្រើននៅលើយូធូប និងដាក់លក់នៅតាមបណ្ដាភាពយន្តមួយចំនួនរួចហើយ ក្រោយពីបទចម្រៀងទាំងនោះទទួលបានជោគជ័យ ហើយស្របគ្នាដែលនាងក៏មានចំណូលចិត្តចង់សម្ដែងក៍ត្រូវផលិតករ លោក សែម វិសាល ជាស្វាមីផ្ដល់ឱកាសអោយសម្ដែងក្នុងរឿង «ស្នូរជើងអ្នកណា» ខណៈដែលភាពយន្តនោះបានក្លាយជារឿងដែលទទួលបានចំណូលខ្ពស់ប្រចាំឆ្នាំ២០១៩។
អ្នកនាងថា ហេតុផលដែលអ្នកនាងបានសម្ដែងក្នុងរឿង «អន្ទងវិញ្ញាណ» ជាតួឯកលើកទី២ មិនមែនដោយសារតែហេតុផលស្វាមីគឺជាផលិតករនោះទេ ប៉ុន្តែដោយសារតែអ្នកនាងទទួលបានការគាំទ្រភ្លូកទឹកភ្លូកដីក្នុងស្នាដៃភាពយន្តទី១ ទើបអ្នកនាងត្រូវបានជ្រើសឲ្យសម្ដែងក្នុងភាពយន្តថ្មីនេះ។
អ្នកនាង លីងលីង អះអាងថា ខ្លួនមិនមែនសម្ដែងដោយសារតែចង់ល្បីល្បាញនោះទេ ប៉ុន្តែដោយសារតែអ្នកនាងគឺជាតារាចម្រៀងដែលយល់ថាខ្លួនឯងសម្ដែងបាន ហើយចូលចិត្តបំផុតសម្រាប់ភាពយន្តរន្ធត់ៗ ទើបអ្នកនាងទទួលសម្ដែងក្នុងរឿង «អន្ទងវិញ្ញាណ»។
អ្នកនាងថា ខ្លួនមានមិនត្រឹមតែមានស្វាមីនោះទេ ប៉ុន្តែក៏មានកូនប្រុសស្រី២នាក់ និងមានវ័យប្រមាណជាង៣០ឆ្នាំមកហើយ ប៉ុន្តែអ្នកនាងថា អត់ខ្វល់រឿងទស្សនិកជនដឹងថាអ្នកនាងមានប្ដី មានកូន ហើយឈប់គាំទ្រនោះទេ ដោយសារតែអ្នកនាងមិនមែនប្រឡូកសិល្បៈ ដោយសារតែចង់ល្បីឈ្មោះ។ អ្នកនាងជាគ្រូពេទ្យជំនាញទូទៅ ដែលមានការងាររាប់មិនអស់ ប៉ុន្តែហេតុផលដែលអ្នកនាងសម្រេចចិត្តចូលសម្ដែងគឺដោយសារតែយល់ថាចង់បញ្ចេញសមត្ថភាពដែលខ្លួនមានតាំងពីកំណើត ដើម្បីបន្សល់ស្នាដៃក្នុងអាជីពសិល្បៈរបស់ខ្លួនប៉ុណ្ណោះ ដោយមិនមែនចង់ប្រឡូកដើម្បីឲ្យល្បីខ្ទរខ្ទាយ ហើយសុខចិត្តលាក់បាំងរឿងរ៉ាវឯកជនរបស់ខ្លួន ដោយសូម្បីតែដំណឹងមានប្ដី មានកូនក៏មិនហ៊ានទម្លាយនោះឡើយ។
អ្នកនាង លីងលីង បានបន្ថែមថា ក្រោយបង្ហាញខ្លួនបានមួយរឿងក្នុងរឿង«ស្នូរជើងអ្នកណា» អ្នកនាងត្រូវបានផលិតករបរទេសមួយទាក់ទងឲ្យសម្ដែងដូចគ្នា ប៉ុន្តែដោយសារតែអ្នកនាងចង់សម្ដែងតែរឿងរន្ធត់ៗ និងមមាញឹកខ្លាំងជាមួយការងារជាពេទ្យទូទៅរបស់ខ្លួនផង ទើបអ្នកនាងមិនដែលបានសម្ដែងក្រៅពីអោយផលិតកម្ម Wonderfilm Cambodia ។
អ្នកនាងរំពឹងស្នាដៃរឿង «អន្ទងវិញ្ញាណ» នឹងជោគជ័យខ្លាំងជាងភាពយន្តទី១ ដោយសារតែរឿងមួយនេះក្រៅពីផលិតដោយប្រើក្រាហ្វិក និងប្លង់ល្អៗក៏ជារឿងដែលពោរពេញដោយឈុតឆាកភ័យរន្ធត់ និងជាស្នាដៃដែលគ្រោងនឹងចេញប្រជែងទីផ្សារនៅតាមប្រទេសជិតខាតផង៕