ក្រុមធ្វើយុទ្ធនាការម្រាមដៃស្អាត៣នាក់នៅក្នុងខេត្តបាត់ដំបង់ ដែលប្រឆាំងការបោះឆ្នោតអាណត្តិទី៦កាលពីឆ្នាំ២០១៨ បានបង់ប្រាក់ផាកពិន័យទៅឲ្យ គ.ជ.ប កាលពីថ្ងៃទី១៨ ខែមករា ឆ្នាំ២០១៩។
យោងតាមសេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតបានចុះផ្សាយកាលពីម្សិលមិញ បានឲ្យដឹងថា លោក ជា ជីវ លោក គ្រុយ គឹមសាំង និងលោក ថោង សារឿនបានយល់ព្រមបង់ប្រាក់ពិន័យ ដោយសារពួកគេបានធ្វើយុទ្ធនាការម្រាមដៃស្អាតក្នុងអំឡុងពេលបោះឆ្នោតជ្រើសតាំងតំណាងរាស្រ្តនីតិកាលទី៦។
ចំនួននៃការបង់នេះគឺឈ្មោះ ជា ជីវ បង់១០លានរៀល ចំណែកឈ្មោះ គ្រុយ គឹមសាំង និងឈ្មោះ ថោង សារឿន ម្នាក់ៗបង់ចំនួន៥លានរៀល។ ពួកគេបញ្ជាក់ថា លុយទាំងនេះបានសប្បុរសជននៅក្រៅប្រទេស។
អតីតប្រធានគណបក្សសង្រ្គោះជាតិខេត្តបាត់ដំបង ដែលត្រូវ គ.ជ.ប ពិន័យជាប្រាក់១០លានរៀល លោក ជា ជាវ បានប្រាប់សារព័ត៌មាន វី.អូ.ឌី ថា បើសិនលោកមិនបង់ប្រាក់ពិន័យនោះ លោកនឹងប្រឈមមុខជាមួយតុលាការ។ លោកបញ្ជាក់ថា លោកមិនមានជំនឿលើប្រព័ន្ធតុលាការនោះទេ ហើយថវិកាដែលលោកយកទៅបង់នេះ គឺបានមកពីសប្បុរសជនដែលរស់នៅក្រៅប្រទេស។
លោកមានប្រសាសន៍ថា៖ «បើសិនជាយើងមិនបង់ប្រាក់ពិន័យនេះទេ គេនឹងចាត់វិធានការណ៍ផ្លូវច្បាប់គឺប្រព័ន្ធតុលាការ ដូច្នេះខ្ញុំពុំមានសង្ឃឹមសូម្បីតែ១ភាគរយ ថាតុលាការរបស់គេនឹងមានភាពឯករាជ្យនោះទេ»។
លោក គ្រុយ គឹមសាំង ដែលត្រូវពិន័យប្រាក់៥លានរៀលមានប្រសាសន៍ស្រដៀងគ្នាថា បើសិនលោកមិនបង់ប្រាក់ពិន័យទៅតាមការកំណត់ គ.ជ.ប នឹងមានវិធានការណ៍ដាក់ទៅតុលាការចាត់ការតាមផ្លូវច្បាប់អាចនឹងជាប់ពន្ធាគារពី១ឆ្នាំ ទៅ២ឆ្នាំ។
លោកមានប្រសាសន៍ថា៖ «បើសិនយើងមិនបង់ឲ្យ គេមានវិធានការណ៍ដាក់ទៅតុលាការអាចចាប់យើងដាក់ពន្ធាគារពី១ឆ្នាំទៅ២ឆ្នាំ ហើយថវិកានេះបានពីប្រធានប្រតិបត្តិការខេត្តរៃអង្គាសពីបងប្អូនមួយចំនួន»។
ចំណែកលោក ថោង សារឿន ក៏អះអាងថា មូលហេតុដែលលោកព្រមបង់ប្រាក់នេះមានមូលហេតុដូចលោក ជា ជីវ និងលោក គ្រុយ គឹមសាំង ដែរ។
មន្ត្រីជាន់ខ្ពស់អង្គការខុមហ្វ្រែល លោក កន សាវ៉ាង្ស លើកឡើងថា ការផាកពិន័យលើអ្នកបញ្ចេញមតិនេះបង្ហាញពីសេរីភាពមានការរឹតត្បិត។
ក្រុមប្រឹក្សាធម្មនុញ្ញកាលពីថ្ងៃទី១៥ សីហាបានតម្ដល់សេចក្ដីសម្រេចរបស់គណៈកម្មការជាតិរៀបចំការបោះឆ្នោត គ.ជ.ប កាលពីថ្ងៃទី៨ ខែសីហា របស់ក្រុមប្រឹក្សាជំនុំជម្រះ គ.ជ.ប បានសម្រចផ្ដន្ទាទោសអតីតអ្នកគាំទ្រគណបក្សសង្រ្គោះជាតិ៣នាក់ដែលក្នុងនោះមាន លោក ជា ជីវ ត្រូវពិន័យប្រាក់១០លានរៀល លោក គ្រុយ គឹមសាំង និងលោក ថោង សារឿន ត្រូវបង់ពិន័យ៥លានរៀលក្នុងម្នាក់ ទាក់ទងនឹងសំណុំរឿងយុទ្ធនាការម្រាមដៃស្អាតក្នុងអំឡុងពេលបោះឆ្នោតនីតិកាលទី៦ ឆ្នាំ២០១៨។