រដ្ឋាភិបាលជាថ្មីទៀតបានគំរាមចាប់ខ្លូន លោក សម រង្ស៊ី បើអតីតមេដឹកនាំបក្សប្រឆាំងដែលកំពុងនិរទេសខ្លួនរូបនេះចូលកម្ពុជាវិញ ក្នុងរូបភាពនយោបាយពាក់ព័ន្ធគណបក្សសង្គ្រោះជាតិ ដែលតុលាការរំលាយកាលពីចុងឆ្នាំ២០១៧។
ការិយាល័យអ្នកនាំពាក្យរាជរដ្ឋាភិបាលឲ្យដឹងតាមសេចក្តីថ្លែងការណ៍ចុះថ្ងៃទី២២ ខែមករានេះ ថា ការធ្វើមាតុភូមិនិវត្តន៍របស់ សម រង្ស៊ី គឺជារឿងបុគ្គល ប៉ុន្តែចង់បង្កើតជារូបភាពនយោបាយ។
ការិយាល័យអ្នកនាំពាក្យលើកឡើងទៀតថា៖ «ការប្រើប្រាស់មាតុភូមិនិវត្តន៍របស់ សម រង្ស៊ី ទោះបីជាតាមរយៈក្រុម ឬអង្គការណាក៏ដោយ ដើម្បីបង្កើតជារូបភាពនយោបាយពាក់ព័ន្ធទៅនឹងសកម្មភាពនៃអតីតគណបក្ស ដែលត្រូវបានរំលាយចោលទៅហើយនោះ តាមអំណាចសាលដីការបស់តុលាការកំពូល កាលពីថ្ងៃទី១៦ ខែវិច្ឆិកា ២០១៧ ត្រូវបានចាត់ទុកជាអំពើប្រឆាំងនឹងអំណាចតុលាការពិតប្រាកដ ដែលច្បាប់បានកំណត់ និងហាមប្រាម»។
រដ្ឋាភិបាលព្រមានថា ក្នុងរឿងនេះបើមានការស្នើសុំណាមួយពីតុលាការ រដ្ឋាភិបាល ក៏ដូចជាសមត្ថកិច្ចពាក់ព័ន្ធនឹងចាត់វិធានការអនុវត្តន៍តាមអំណាចផ្លូវច្បាប់។
អ្នកនាំពាក្យតុលាការកំពូល លោក នៅ មុនីជោត សុំមិនធ្វើអត្ថាធិបត្ថាធិប្បាយ ពេលសួរថា តើតុលាការកំពូល នឹងស្នើសុំទៅរដ្ឋាភិបាលឲ្យចាប់ខ្លួនលោក សម រង្ស៊ី ជុំវិញសាលដីកាថ្ងៃទី១៦ ខែវិច្ឆិកា ឆ្នាំ២០១៧ ដែលប្រកាសរំលាយគណបក្សសង្គ្រោះជាតិនោះដែរឬទេ។
សារព្រមានចាត់វិធានការ របស់ការិយាល័យអ្នកនាំពាក្យរដ្ឋាភិបាលលើលោក សម រង្ស៊ី នេះធ្វើឡើង១ថ្ងៃ ក្រោយពីអតីតសមាជិកគណៈកម្មាធិការអចិន្ត្រៃយគណបក្សនេះ មួយចំនួនបើកកិច្ចប្រជុំនៅសហរដ្ឋអាមេរិក សម្រេចយល់ព្រមលើយុទ្ធសាស្ត្រ៣ចំនុច ក្នុងនោះមានទំាងត្រៀមកញ្ចប់ថវិកាសម្រាប់ការវិលត្រឡប់ចូលប្រទេសវិញរបស់លោក សម សង្ស៊ី ផងដែរ។
កាលពីចុងឆ្នាំ២០១៨ លោក សម រង្ស៊ី ក៏បានប្រកាសថា នឹងវិលចូលកម្ពុជាវិញ ឲ្យលោកនាយករដ្ឋមន្ត្រី ហ៊ុន សែន ចាប់ខ្លួន បើលោកផ្នាល់ចាញ់លោក ហ៊ុន សែន ករណីដោះលែង ឬមិនដោះលែងលោក កឹម សុខា ដោយថា ការវិលត្រឡប់របស់លោកអំឡុងខែមិនា ឆ្នាំ២០១៩ខាងមុខនេះ។
ប៉ុន្មានសប្តាហ៍បន្ទាប់ ពោលគឺនៅថ្ងៃទី២៦ ខែធ្នូ ឆ្នាំ២០១៨ លោក ហ៊ុន សែន ក្នុងពិធីជួបកម្មករបានព្រមានថា ខ្នោះ និងគុក នៅរងចាំការវិលត្រឡប់របស់លោក សម រង្ស៊ី ។
លោកថា៖ «សុំប្រាប់ទៀតថា ព្រលានយន្តហោះមាន៣សម្រាប់ចុះចត ១ទីក្រុងភ្នំពេញ ២សៀមរាម ៣ក្រុងព្រះសីហនុ អាចចុះចតបានទៅតាមបំណងរបស់អ្នកជិះ តែខ្នោះក៏វាទៅតាមទីកន្លែងនេះដែរ ហើយបើដាក់ខ្នោះ ដាក់តាមស្ទីលអាមេរិកកាំងហ្មង! ហើយស្ទីលអាមេរិកកាំងអត់មានដាក់ទៅមុខទេ ដាក់ទៅក្រោយ អាហ្នឹងសុំបញ្ជាក់ មានតែប៉ុណ្ណឹងទេ»។
អ្នកវិភាគនយោបាយ លោក ឯម សុវណ្ណារ៉ា មានប្រសាសន៍ថា ការដែលរដ្ឋាភិបាលព្រមានចាត់វិធានការផ្លូវច្បាប់ មិនមែនជារឿងចំណែកទេ ដោយថា ប្រទេសណាក៏គេអនុវត្តច្បាប់ដែរ។ ប៉ុន្តែលោកថា អ្វីដែលជាបញ្ហានៅត្រង់ថា តើស្ថាប័នតុលាការនៅកម្ពុជា មានជំហរឯករាជ្យកម្រិតណា។
អ្នកវិភាគរូបនេះ វិភាគថា ការដែលរដ្ឋាភិបាលព្រមានចាត់វិធានការម្តងហើយម្តងទៀត ពីព័ត៌មានដែលថាលោក សម រង្ស៊ី វិលចូលស្រុក ទាំងគ្មានការសម្របសម្រួលនយោបាយនេះ លោកថា បក្សកាន់អំណាចអាចព្រួយបារម្ភពីវត្តមានលោក សម រង្ស៊ី នៅក្នុងប្រទេស និងការកម្រើកឡើងវិញនៃចលនាគាំទ្របក្សប្រឆាំង ។
លោកថា៖ «ការអនុវត្តនេះវាមិនឆ្លើយតបទៅនឹងអ្វីដែលសហគមន៍អន្តរជាតិចង់បានទេ អញ្ចឹងហើយបានជាគណបក្សកាន់អំណាចហ្នឹង មិនចង់ឲ្យ [មេដឹកនាំ] គណបក្សប្រឆាំងហ្នឹង មានវត្តមានដែរ ទី១។ ទី២ លោក សម រង្ស៊ី លើកឡើងហ្នឹង ដើម្បីជាទឡ្ហីករណ៍ឲ្យអន្តរជាតិមើលឃើញកាន់តែខ្លាំងអំពីលំហសេរីភាពនៅកម្ពុជា គឺចង់លើកបញ្ហាហ្នឹងឲ្យអន្តរជាតិយកមកធ្វើជាលក្ខខណ្ឌចំបង ដើម្បីឲ្យរដ្ឋាភិបាលបើកមកវិញនូវមុនកាលបរិច្ឆេទចុងក្រោយនៃការព្យួរ EBA របស់សហគមន៍អឺរ៉ុបនៅចុងខែ៣នេះ»។
សហរដ្ឋអាមេរិក និងសហភាពអឺរ៉ុប ប្រកាសមិនទទួលស្គាល់លទ្ធផលបោះឆ្នោតថ្ងៃទី២៩ ខែកក្កដា ឆ្នាំ២០១៨ ដែលគ្មានបក្សប្រឆាំងចូលរួម។
ពេលនេះសហភាពអឺរ៉ុបកំពុងដំណើរការដកប្រព័ន្ធអនុគ្រោះពន្ធ EBA ពីកម្ពុជា ដោយក្រុមប្រទេសលោកសេរីមួយនេះ បានដាក់លក្ខខណ្ឌឲ្យរដ្ឋាភិបាលស្តារប្រជាធិបតេយ្យឡើងវិញ តាមរយៈសម្របសម្រួលនយោបាយ ឲ្យអតីតគណបក្សប្រឆាំងបានដំណើរការឡើងវិញ និងបោះឆ្នោតឆ្នោតឡើងវិញជាដើម។