លោកនាយករដ្ឋមន្ត្រី ហ៊ុន សែន រំឮកជាថ្មីទៀតឲ្យកងទ័ពចូលរួមទប់ស្កាត់បទល្មើសព្រៃឈើ ដោយថា ដើម្បីការពារធនធានធម្មជាតិនៅកម្ពុជា។
ក្នុងពិធីអបអរសាទរខួប ២០ឆ្នាំថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទនាព្រឹកថ្ងៃនេះ លោក ហ៊ុន សែន ថ្លែងថា រដ្ឋាភិបាលបញ្ជូនកងទ័ពមួយចំនួនឲ្យទៅឈរជើងនៅទូទាំងប្រទេស ជាពិសេសនៅខេត្តព្រះវិហារ ដើម្បីជួយការពារព្រៃឈើនៅទីនោះ ដោយថា មិនត្រូវឃុបឃិត ឬបើកដៃឲ្យឈ្មួញកាប់ផ្លាញព្រៃឈើនោះទេ។
លោកថ្លែងថា៖ «ខ្ញុំបញ្ជាក់ហើយថា មិនមែនបញ្ជូនអស់លោកមកកាន់ទីនេះ ដើម្បីមកកាប់ឈើនោះទេ ដូច្នេះ កងទ័ពទាំងអស់ត្រូវចូលរួមការពារព្រៃឈើ មិនត្រូវក្លាយទៅជាអ្នកកាប់ឈើ ឬទៅជាអ្នកការពារឈ្មួញកាប់ឈើនោះទេ»។
ប្រធានគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក សៅ សុខា មានប្រសាសន៍ថា ក្រុមការងាររបស់លោកកំពុងសហការជាមួយស្ថាប័នពាក់ព័ន្ធ ដើម្បីទប់ស្កាត់បទល្មើសព្រៃឈើតាមបញ្ជារបស់លោកនាយករដ្ឋមន្ត្រី ហ៊ុន សែន ប៉ុន្តែ លោកបញ្ជាក់ថា បទល្មើសព្រៃឈើពិបាកទប់ស្កាត់ ដោយសារពិបាកពិនិត្យមើលក្រុមហ៊ុនណាដឹកឈើស្របច្បាប់ ឬមិនស្របច្បាប់។
លោកមានប្រសាសន៍ថា៖ «រឿងផ្សព្វផ្សាយរាល់ថ្ងៃនេះ មានឈើដែលលួច ហើយឈើដែលត្រឹមត្រូវ វាពិបាកណាស់ មិនដូចគ្រឿងញៀនទេ ព្រោះគ្រឿងញៀនឲ្យតែឃើញកាន់ ឃើញដឹកខុសទាំងអស់ ដឹងតែឈើមានត្រូវ មានខុស។ និយាយឲ្យត្រង់ ខ្ញុំមិនដឹងថា អាណាខុស ឬត្រូវទេ ព្រោះខ្ញុំដឹងតែមានអ្នកប្រាប់ខ្ញុំជួយចាប់ឲ្យ ប៉ុន្តែ កំពុងតែដឹក ឲ្យខ្ញុំទៅចាប់គេតែម្តង គឺមិនដឹងថា មានច្បាប់ ឬមិនមានទេ ព្រោះមានច្បាប់គេបង់ពន្ធឲ្យរដ្ឋរួចហើយ»។
នៅអំឡុងពេលជួបសំណេះសំណាលជាមួយពលរដ្ឋខ្មែរនៅក្រុងញូវយ៉ក កាលពីថ្ងៃទី៣០ ខែកញ្ញាឆ្នាំមុន លោក ហ៊ុន សែន បានបន្ទោសការបាត់បង់ព្រៃឈើទៅ «ចោរ» និង «ពលរដ្ឋ» ដោយលោកថា «ចោរ» បានលួចកាប់ព្រៃឈើ ហើយចំនួន «ពលរដ្ឋ» កើនឡើងបានជំរុញឲ្យមានការចូលកាប់ឆ្ការព្រៃឈើយកដី។
អង្គការ Global Witness កាលពីឆ្នាំ២០១៨ បានចេញរបាយការណ៍ស៊ើបអង្កេតជាច្រើនស្ដីវិនាសកម្មព្រៃឈើនៅកម្ពុជា បានរកឃើញថា វិនាសកម្មព្រៃឈើបង្កឡើងដោយបុគ្គលមានអំណាច មានលុយ និងមានឥទ្ធិពល ហើយបុគ្គលទាំងនោះ សុទ្ធតែមានទំនាក់ទំនងជាមួយលោកនាយករដ្ឋមន្ត្រី ហ៊ុន សែន ផងដែរ។
របាយការណ៍នេះបញ្ជាក់ថា ព្រៃឈើត្រូវបានកាប់ និងដឹកជញ្ជូនចេញពីតំបន់ការពារ ឬតំបន់អភិរក្ស ដូចជា តំបន់ព្រៃឡង់ និងតំបន់ការពារស្ថិតនៅតាមបណ្ដាខេត្តភាគឦសានកម្ពុជា ជាប់នឹងព្រំដែនវៀតណាមជាដើម៕
