លោកនាយករដ្ឋមន្ត្រី ហ៊ុន សែន និងជានាយឧត្តមសេនីយ៍ផុតលេខផ្កាយមាស ៥ ផងនោះ បានគំរាមថា នឹងកម្ទេចចោលកងកម្លាំងទាំងឡាយណាដែលប្រឆាំងនឹងដ្ឋាភិបាល ដោយថា កងទ័ពជាកម្លាំងជាតិ មានតួនាទីការពាររដ្ឋាភិបាលកើតចេញពីការបោះឆ្នោត។
ការថ្លែងបែបនេះរបស់លោក ហ៊ុន សែន ធ្វើឡើងក្នុងពិធីប្រារព្ធខួប ២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ស្ថិតក្នុងខណ្ឌពោធិ៍សែនជ័យ រាជធានីភ្នំពេញ នាថ្ងៃទី២៤ ខែមករានេះ។
ក្រៅពីរំឭកតួនាទីកងទ័ពត្រូវចូលរួមទប់ស្កាត់បទលើ្មសមួយចំនួន រួមទាំងប្រឆាំងអំពើភារវកម្មផងនោះ លោក ហ៊ុន សែន បានថ្លែងថា កងព័ទជាកម្លាំងរបស់ជាតិ ត្រូវតែស្មោះត្រង់ និងការពាររដ្ឋាភិបាលកើតចេញពីការបោះឆ្នោតតាមរដ្ឋធម្មនុញ្ញរបស់កម្ពុជា។
នាយឧត្តមសេនីយផុតលេខផ្កាយមាស ៥រូបនេះ ថ្លែងរំឭកទៀតថា ប្រទេសមួយដែលសម្រេចជោគជ័យពីការធ្វើបដិវត្តព៌ណ លោកថា គេចាប់ផ្តើមពីការធ្វើអព្យាក្រឹតូបនីយកម្មកម្លាំងប្រដាប់អាវុធ។ ប៉ុន្តែ លោកថា កងទ័ពអព្យាក្រឹតបានតែចំពោះគណបក្សនយោបាយ និងរដ្ឋបាលស៊ីវិលតែប៉ុណ្ណោះ តែថា កងទ័ពត្រូវស្មោះត្រង់នឹងរដ្ឋាភិបាល។
លោក ហ៊ុន សែន ថ្លែងទៀតថា លោកមិនខ្លាចនឹងចេញបទបញ្ជាឲ្យកម្ទេចចោលនូវរាល់កម្លាំងណាក៏ដោយ ដែលប៉ុនប៉ងផ្តួលរំលំរដ្ឋាភិបាលស្របច្បាប់កើតចេញពីការបោះឆ្នោតនោះទេ។
លោក ហ៊ុន សែន ថ្លែងថា៖ «កងទ័ពដែលការពាររាជរដ្ឋាភិបាល គ្មានអ្វីខុសទេ។ កងទ័ពប្រឆាំងរាជរដ្ឋាភិបាលទេ គឺជាការខុស ដែលត្រូវតែកម្ទេច។ នៅវេណេស៊ូអេឡា ការបះបោរត្រូវបានបង្ក្រាបជាបន្ទាន់ភ្លាម គេមិនអនុញ្ញាតិទេរឿងនេះ»។
លោក ហ៊ុន សែន បានកាន់តំណែងជានាយករដ្ឋមន្ត្រីកម្ពុជាចាប់តាំងពីឆ្នាំ១៩៨៥មកម៉្លេះ ហើយលោកបានបន្តកាន់តំណែងមួយនេះជាថ្មីម្ដងទៀត ក្រោយពីការបោះឆ្នោតជាតិកាលពីចុងខែកក្កដាឆ្នាំមុន ដែលបានផ្ដល់ជ័យជម្នះទាំងស្រុងទៅដល់គណបក្សប្រជាជនកម្ពុជារបស់លោក។
អង្គការឃ្លាំមើលសិទ្ធិមនុស្ស Human Rights Watch បានលើកឡើងនៅក្នុងរបាយការណ៍របស់ខ្លួនកាលពីដើមឆ្នាំ២០១៥ថា ស្ថិតក្នុងអំណាចជាង ៣ទសវត្សរ៍ លោកនាយករដ្ឋមន្ត្រី ហ៊ុន សែន តែងតែប្រើប្រាស់ម្ដងហើយម្ដងទៀតនូវអំពើហិង្សានយោបាយ ការបង្ក្រាប និងអំពើពុករលួយ ដើម្បីរក្សាអំណាច៕
