លោកនាយករដ្ឋមន្ត្រី ហ៊ុន សែន និងជានាយឧត្តមសេនីយផុតលេខផ្កាយមាស៥ គំរាមថា នឹងកម្ទេចចោលចំពោះកងកម្លាំងទាំងឡាយណាប្រឆាំងនឹងដ្ឋាភិបាល ដោយថា កងទ័ពជាកម្លាំងជាតិ មានតួនាទីការពាររដ្ឋាភិបាលកើតចេញពីការបោះឆ្នោត។
ការថ្លែងបែបនេះរបស់លោក ហ៊ុន សែន ធ្វើឡើងក្នុងពិធីប្រារព្ធខួប ២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ដែលធ្វើឡើងក្នុងខណ្ឌពោធិ៍សែនជ័យ ក្នុងរាជធានីភ្នំពេញ នាថ្ងៃទី២៤មករានេះ។
លោក លោក ហ៊ុន សែន ក្នុងពិធីនោះ ក្រៅពីរំឭកតួនាទីកងទ័ពថា ត្រូវចូលរួមទប់ស្កាត់បទលើ្មសមួយចំនួន រួមទាំងប្រឆាំងអំពើភារវកម្មផងនោះ បានថ្លែងថា កងព័ទជាកម្លាំងរបស់ជាតិត្រូវតែស្មោះត្រង់ និងការពារដ្ឋាភិបាលកើតចេញពីការបោះឆ្នោត តាមរដ្ឋធម្មនុញ្ញរបស់កម្ពុជា។
លោក ហ៊ុន សែន គំរាមថា លោកមិនខ្លាចនឹងចេញបទបញ្ជា ឲ្យកម្ទេចចោលនូវរាល់កម្លាំងណាក៏ដោយ ដែលប៉ុនប៉ងផ្តួលរំលំរដ្ឋាភិបាលស្របច្បាប់កើតចេញពីការបោះឆ្នោតនោះទេ។
លោកថា៖ «កងទ័ពដែលការពាររាជរដ្ឋាភិបាល គ្មានអ្វីខុសទេ។ កងទ័ពប្រឆាំងរាជរដ្ឋាភិបាលទេគឺជាការខុស ដែលត្រូវតែកម្ទេច។ នៅវេណេស៊ូអេឡា ការបាស់បោត្រូវបានបង្ក្រាបជាបន្ទាន់ភ្លាម គេមិនអនុញ្ញាតិទេរឿងនេះ»។
មេបញ្ជាការកងទ័ពជើងគោក លោក ហ៊ុន ម៉ាណែត ជាកូនប្រុសបង្កើតរបស់លោក ហ៊ុន សែន ផងនោះ បានប្តេជ្ញាអំឡុងឡើងធ្វើសេចក្តីរាយការណ៍ក្នុងពិធីនោះថា ក្នុងនាមជាមេបញ្ជាការ មេបញ្ជាការរង និងយោធិនទាំងមូល កងទ័ពជើងគោគ ប្ដេជ្ញាស្មោះត្រង់ដាច់ខាតចំពោះជាតិ ការពារព្រះមហាក្សត្រ ការពាររដ្ឋធម្មនុញ្ញ និងការពាររដ្ឋាភិបាលស្របច្បាប់។
លោកថា៖ «ប្តេជ្ញាវាយកម្ទេចរាល់ការឃុបឃិតប៉ុនប៉ងបំផ្លាញសន្តិភាព ឧបាយកលបង្កើតឲ្យមានបដិវត្តព៌ណលើទឹកដីកម្ពុជា និងប្រឆាំងដាច់ខាតចំពោះការជ្រៀតជ្រែកកម្ពុជាពីមជ្ឈដ្ឋានខាងក្រៅ»។
បើតាមសេចក្តីរាយការណ៍របស់លោក ហ៊ុន ម៉ាណែត បញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ត្រូវបានបង្កើតឡើងនៅថ្ងៃទី២៤ ខែមករា ឆ្នាំ១៩៩៩ មានរចនាសម្ព័ន្ធចាត់តាំង និងយោធិនជិត ១១ម៉ឺននាក់ មាន ៦យោធភូមិភាគ ១៨ក្បាលកងពលធំ ៥កងពលតូច ៤កងវរសេនាធំ ៤កងវរសេនាតូច មាន ២៤ប្រតិបត្តិការសឹកខេត្ត-ក្រុង និងអង្គភាពទ័ពជំនាញចំណុះជាច្រើនទៀត។
អ្នកវិភាគវ័យក្មេង លោក ហង្ស វិទូ វិភាគថា មេដឹកនាំមួយចំនួនលើវិភពលោកដែលក្រាញអំណាចយូរ ច្រើនតែជួបប្រទះនឹងការបះបោរពីពលរដ្ឋ ឬពីស្ថាប័នកងកម្លាំង បង្ខំឲ្យមេដឹកនាំចុះចេញពីតំណែង ពេលប្រទេសជាតិជួបវិបត្តិអ្វីមួយដោះស្រាយមិនចេញ។
ប៉ុន្តែ អ្នកវិភាគវ័យក្មេងរូបនេះ វិភាគថា នៅកម្ពុជាមិនទាន់ឃើញសញ្ញាបែបនេះកើតចេញទេ តែថា សារព្រមាននេះ អាចជាក្ដីបារម្ភកើតពីចលនាណាមួយ។
លោកថា៖ «ខ្ញុំមើលទៅសម្រាប់គណបក្សប្រជាជនកម្ពុជា គឺមានភាពរឹងមាំមែនទែនសម្រាប់ការក្តោបក្តាប់កម្លាំង និងអំណាច។ អញ្ចឹង ករណីនេះ វាកកើតឡើងដោយកម្រណាស់ ប៉ុន្តែ សួរថា តើស្ថានការណ៍សព្វថ្ងៃគួរឲ្យមេដឹកនាំព្រួយបារម្ភទេ។ ខ្ញុំគិតថា ធ្វើឲ្យគាត់ព្រួយបារម្ភដែរ»។
អង្គការឃ្លាំមើលសិទ្ធិមនុស្ស Human Rights Watch បានលើកឡើងនៅក្នុងរបាយការណ៍របស់ខ្លួនកាលពីដើមឆ្នាំ២០១៥ថា ស្ថិតក្នុងអំណាចជាង ៣ទសវត្សរ៍ លោកនាយករដ្ឋមន្ត្រី ហ៊ុន សែន តែងតែប្រើប្រាស់ម្ដងហើយម្ដងទៀតនូវអំពើហិង្សានយោបាយ ការបង្ក្រាប និងអំពើពុករលួយ ដើម្បីរក្សាអំណាច។
Human Rights Watch បានចាត់ថ្នាក់លោក ហ៊ុន សែន គឺជាមេដឹកនាំកាន់អំណាចយូរជាងគេបំផុតលំដាប់ទី៦ នៅក្នុងចំណោមមេដឹកនាំកាន់អំណាចយូរបំផុតនៅលើពិភពលោក ដោយស្ថិតនៅពីក្រោយមេដឹកនាំផ្ដាច់ការហ្ស៊ីបាវ៉េ លោក រ៉ូប៊ឺត មូហ្គាបេ ដែលត្រូវបានពួកយោធាទម្លាក់ពីអំណាចកាលពីចុងឆ្នាំ២០១៧កន្លងមក៕