មន្ត្រីសុខាភិបាលនៅឃុំជ័យឧត្ដម ស្រុកលំផាត់ ខេត្តរតនគិរី បានឲ្យដឹងថា មណ្ឌលសុខភាពលំផាត់ នឹងមិនបិទទ្វារនោះឡើយនៅថ្ងៃស្អែកនេះ ក្រោយពីវិវាទដីធ្លីពាក់ព័ន្ធនឹងមណ្ឌលសុខភាពមួយនេះ ត្រូវបានដោះស្រាយរួចរាល់ហើយនៅថ្ងៃនេះ។
លិខិតសរសេរដោយដៃមួយដែលមានស្នាមមេដៃបុគ្គលិកមណ្ឌលសុខភាពលំផាត់ផងនោះ បានឲ្យដឹងថា បុគ្គលិកក្នុងមណ្ឌលសុខភាពស្ថិតក្នុងស្រុកលំផាត់មួយនេះ បានសម្រេចមិនទៅធ្វើការ និងបិទទ្វារមណ្ឌលសុខភាពមួយនេះ នៅថ្ងៃទី២៥ ខែមករា។
បើតាមលិខិតដដែលនោះ ក្រុមបុគ្គលិកសុខភិបាលទាំងនោះ បានសម្រេចដូច្នេះ ដោយថា ពលរដ្ឋលោក គង់ សុជា បានរំលោភយកដីរបស់មណ្ឌលសុខភាព ហើយមន្ត្រីគ្រប់គ្រងពុំបានដោះស្រាយបញ្ហានេះឡើយ។
លិខិតនោះ ត្រូវបានសរសេរថា៖ «ចាប់ផ្ដើមបិទទ្វារពីថ្ងៃទី២៥ ខែមករា ឆ្នាំ២០១៩នេះតទៅ រហូតទាល់តែថ្នាក់លើមានដំណោះស្រាយជូនពួកយើងខ្ញុំ ទើបបុគ្គលិកទាំងអស់គ្នា នឹងព្រមចូលបម្រើការងារវិញ»។
ប្រធានមណ្ឌលសុខភាពលំផាត់ លោក ប៊ុន នី ប្រាប់វីអូឌីនៅថ្ងៃនេះថា មន្ទីរសុខាភិបាលខេត្តបានចុះទៅសម្របសម្រួលហើយ បន្ទាប់ការតវ៉ាពីបុគ្គលិកនៅក្នុងមណ្ឌលសុខភាពមួយនេះ។
លោកបន្តថា មណ្ឌលសុខភាពលំផាត់ ត្រូវបានសាងសង់ឡើងតាំងឆ្នាំ១៩៦៩ ហើយប្រជាពលរដ្ឋដែលទៅសេវាព្យាបាលនៅមណ្ឌលសុខភាពនេះ ក្នុងមួយខែមានចំនួន ៥០០ ទៅ ៦០០នាក់៕