មន្រ្តីការពារសិទ្ធិមនុស្ស អះអាងថា យ៉ាងហោចណាស់ពលរដ្ឋម្នាក់ បានរងរបួសធ្ងន់ និងម្នាក់ទៀតរងរបួសស្រាល ហើយត្រូវបញ្ជូនទៅសង្គ្រោះនៅឯមន្ទីរពេទ្យនៅភ្នំពេញ ក្រោយប៉ះទង្គិចគ្នាក្នុងការតវ៉ាដុតកង់ឡានប្រប្រឆាំងនឹងក្រុមកម្លាំងសមត្ថកិច្ចចម្រុះខេត្តព្រះសីហនុ ដែលបានចុះការអនុវត្តសាលដីកាវាស់វែងដីធ្លីឲ្យជាមួយឧកញ៉ាម្នាក់នៅថ្ងៃនេះ។
មន្រ្តីសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជាប សុធារី ប្រាប់វីអូឌីនៅរសៀលថ្ងៃនេះថា ក្នុងហេតុការណ៍ប៉ះទង្គិចរវាងក្រុមពលរដ្ឋ និងក្រុមសមត្ថកិច្ចនៅថ្ងៃនេះ បុរសម្នាក់ បានរងរបួសធ្ងន់ដោយត្រូវគ្រាប់កាំភ្លើង និងម្នាក់ទៀតរងបួសស្រាលដោយត្រូវនឹងដំបង។
មន្រ្តីការងារសិទ្ធិមនុស្សរូបនេះឲ្យដឹងថា ពលរដ្ឋម្នាក់ដែលគ្រប់កាំភ្លើងនោះ ត្រូវបានខាងមន្ទីរពេទ្យខេត្តព្រះសីហនុ បញ្ជូនមក ព្យាបាលនៅភ្នំពេញហើយ។
អ្នកស្រីបន្ថែមថា៖ «មួយនាក់របួស ២នាក់ មានក្មេងម្នាក់របួសស្រាល ក្រោយព្យាបាលនៅមន្ទីរពេទ្យរួចបានត្រឡប់ទៅផ្ទះវិញហើយម្នាក់ទៀតត្រូវគ្រប់កាំភ្លើងរបស់ធ្ងន់ ខាងគ្រូពេទ្យពិនិត្យអការៈក៏បានបញ្ជូនទៅព្យាបាលនៅមន្ទីរពេទ្យតេកុមាលា ដើម្បីធ្វើការវះ កាត់។ គាត់ត្រូវគ្រាប់ស្មាខាងឆ្ងេងទៅបុកសន្ទះទ្រូងបៀមគ្រាប់ជាប់សួត។ កាលដំបូងហ្នឹង អាចនិយាយបាន ប៉ុន្តែ ក្រោយមក គាត់ពិបាកនិយ ដោយថា ចេះតែហត់ៗ»។
អ្នកមានជម្លោះដីធ្លីរាប់រយនាក់មកពីភូមិគគីរ ស្ថិតក្នុងឃុំបិតត្រាង បានបន្តនាំគ្នាពង្រាយកង់ឡានដុតបិទផ្លូវនៅថ្ងៃព្រហស្បតិ៍នេះ ខណៈកម្លាំងចម្រុះរបស់អាជ្ញាធររាប់រយនាក់ដែលប្រដាប់ដោយកាំភ្លើង ខែល គ្រឿងចក្រ រួមទាំងឡានទឹកផង ត្រូវបានដាក់ពង្រាយ និងត្រៀមទប់ទល់នឹងពលរដ្ឋដែលចេញតវ៉ាប្រឆាំងការចុះអនុវត្តសាលដីកាវាស់វែងដីធ្លីឲ្យឧកញ៉ាម្នាក់ ដែលអ្នកភូមិប្រាប់ថាឈ្មោះ ស៊ីវ គង់ទ្រីវ និងភរិយាឈ្មោះ ហុង សួន នៅចំណុចភូមិគគីរ។
មន្រ្តីសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជាប សុធារី ដែលចុះឃ្លាំមើលករណីនេះ បានប្រាប់វីអូឌីថា ក្នុងហេតុការណ៍នោះ ក្រុមអ្នកភូមិបាននាំគ្នាដុតកង់ឡានបិទផ្លូវ មានការគប់ដុំថ្ម ដបសាំងផងដែរ ហើយក្រោយប្រឈមមុខដាក់គ្នាជាច្រើនម៉ោង ក្រុមសមត្ថកិច្ចបានផ្ទុះអាវុធជាច្រើនគ្រាប់ និងចាប់ពលរដ្ឋ ៦នាក់ រួមទាំងសម្ភារៈមួយចំនួនផងដែរ។
កាលពីថ្ងៃព្រហស្បតិ៍សប្តាហ៍មុន ក្រុមកម្លាំងសមត្ថកិច្ចចម្រុះខេត្តព្រះសីហនុ ក៏បានចុះទៅវាស់វែងដីឲ្យលោកស្រី ហុង សួន ភរិយារបស់ឧកញ៉ា ស៊ីវ គង់ទ្រីវ ម្តងរួចមកហើយ ប៉ុន្តែ មិនបានសម្រេច បន្ទាប់ពីក្រុមអ្នកភូមិរាប់រាយនាក់ បាននាំគ្នាពង្រាយកង់ឡានដុតតវ៉ាមិនឲ្យវាស់វែង៕