ទាហាន ៨នាក់ បានរងរបួសក្នុងគ្រោះថ្នាក់ចរាចរណ៍នៅស្រុកឧត្តុង្គ ខេត្តកំពង់ស្ពឺ ពេលធ្វើដំណើរត្រលប់មកពីចូលរួមខួប២០ឆ្នាំនៃការបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ។
ប្រធានការិយាល័យចរាចរណ៍ខេត្តកពង់ស្ពឺ លោក ស៊ិន សុវណ្ណធី ប្រាប់ VOD ឲ្យដឹងថា កាលពីម៉ោង៥ព្រឹកមិញនេះ មានរថយន្តដឹកខ្សាច់១គ្រឿងរបស់ក្រុមហ៊ុនស្រាបៀរអង្គរ បានវ៉ារថយន្តដឹកឥដ្ឋ១គ្រឿង ដែលកំពុងធ្វើដំណើរស្របទិសគ្នា ហើយបានជ្រុលទៅបុករថយន្ត១គ្រឿងរបស់ទាហានភូមិភាគ៥។
លោក ស៊ិន សុវណ្ណធី បន្តឲ្យដឹងថា គ្រោះថ្នាក់ចរាចរណ៍នេះបណ្តាលឲ្យទាហាន៨នាក់រងរបួស ដែលក្នុងនោះរបួសធ្ងន់២នាក់ និងស្រាល៦នាក់ រីឯរថយន្តរងការខូខខាតធ្ងន់ទាំងពីរ។ អ្នករបួសទាំងអស់ត្រូវបានបញ្ជូនទៅមន្ទីរពេទ្យរួចហើយ។
កាលពីម្សិលមិញ រដ្ឋាភិបាលបានប្រារព្ធពិធីខួប២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ ដែលធ្វើឡើងក្នុងខណ្ឌពោធិ៍សែនជ័យ ក្នុងរាជធានីភ្នំពេញ៕
