នាយករដ្ឋមន្ត្រីកម្ពុជា លោក ហ៊ុន សែន អំពាវនាវឲ្យត្រៀមទប់ស្កាត់ការជ្រៀតជ្រែកណាមួយពីប្រទេសផ្សេងៗ ដើម្បីការពារសន្តិភាពនៅកម្ពុជា ដោយដាក់ការព្រួយបារម្ភថា ប្រទេសទាំងនោះអាចនឹងប្រើឥទ្ធិពលដូចនៅប្រទេសវេណេស៊ុយអេឡា ។
សហរដ្ឋអាមេរិក កាលពីថ្ងៃទី២៣ ខែមករា តាមរយៈក្រសួងការបរទេសរបស់ខ្លួន បានចេញសេចក្តីថ្លែងការណ៍ ប្រកាសទទួលស្គាល់ប្រធានរដ្ឋសភានិងជាមេដឹកនាំបក្សប្រឆាំងលោក ហ្សន់ ហ្កៃដូ ជាប្រធានាធិបតីប្រទេសវេណេស៊ុយអេឡាបណ្ដោះអាសន្ន ជំនួសប្រធានាធិបតីបច្ចុប្បន្នលោក នីកូឡាស ម៉ាឌូរ៉ូ ដោយថា ស្របតាមរដ្ឋនុញ្ញរបស់ប្រទេសនេះត្រង់មាត្រា២៣៣។
ប៉ុន្តែនាយករដ្ឋមន្ត្រីកម្ពុជា លោក ហ៊ុន សែន ក្នុងពិធីជួបកម្មករនៅខេត្តកំពត នៅថ្ងៃសុក្រនេះ បានបង្ហាញការខកចិត្តទៅនឹង ការសម្រេចចិត្តរបស់សហរដ្ឋអាមេរិកនេះ។
មេដឹកនាំកម្ពុជាបានថ្លែងថា លោកមិនយល់នូវអ្វីដែលកំពុងកើតនៅវេណេស៊ុយអេឡា ដោយថាប្រធានាធីបតីមួយជាប់ឆ្នោត ដែលកំពុងកាន់តំណែង បែរជាសហរដ្ឋអាមេរិក និងប្រទេសមួយចំនួនប្រកាសទទួលស្គាល់មេបក្សប្រឆាំងឲ្យធ្វើជាប្រធានាធិបតី ហើយស្បថចូលកាន់តំណែងខ្លួនឯង។
លោក ហ៊ុន សែន អះអាងថាបញ្ហានេះ នឹងជំរុញឲ្យប្រទេសវេណេស៊ុយអេឡា នឹងផ្ទុះសង្គ្រាមស៊ីវិលក្នុងពេលឆាប់ៗនេះ ដោយថា មេដឹកនាំបក្សកាន់អំណាចនៃប្រទេសនោះនឹងមិនដកថយឡើយ។
លោកបន្តថា៖ «តិចនៅកម្ពុជាគេ[អាមេរិក]ទារអញ្ចឹង?។ សុំអញ្ជើញធ្វើ។ បានតើ!ធ្វើទៅ!ប្រកាសទទួលស្គាល់នរណាមួយធ្វើនាយករដ្ឋមន្ត្រីទៅ! ជំនួសឲ្យព្រះមហាក្សត្រកម្ពុជាទៅ!។នៅឯណោះ ប្រធានាធិបតីអាមេរិក និងប្រទេសមួយចំនួនប្រកាសជំនួសប្រជាជនវេណេស៊ុយអេឡា អស់ឆ្ងល់ម៉ង។ ត្រង់ហ្នឹងហើយ ដែលខ្ញុំទាមទារឲ្យប្រយ័ត្នប្រយែងសម្រាប់សន្តិភាពរបស់កម្ពុជា មិនត្រូវឲ្យបរទេសលូកដៃជាមួយអ្នកដែលនៅខាងក្នុងប៉ុនប៉ងបំផ្លាញសន្តិភាពដែលយើងរកបានដោយលំបាក»។
អ្នកវិភាគនយោបាយ លោកបណ្ឌិត មាស នី បង្ហាញការព្រួយបារម្ភថា បើបរិបទនយោបាយនៅកម្ពុជា ធ្វើឲ្យស្ថានភាពសិទ្ធិមនុស្សកាន់តែធ្លាក់ចុះដុនដាបទៀតនោះ លោកថា កម្ពុជាអាចនឹងរងឥទ្ធិពលពីពួកបច្ចិមប្រទេសដូចវេណេស៊ុយអេឡាដែរ។
លោកថា៖ «ខ្ញុំគិតថា សព្វថ្ងៃនេះ រដ្ឋាភិបាលកម្ពុជាហ្នឹងចង់មិនចង់កំពុងតែតាមដាននយោបាយវិវឌ្ឍន៍នៅប្រទេសវេណេស៊ុយអេឡា ហ្នឹង យ៉ាងចិត្តដិតបំផុត ហើយនិងការការពារខ្លួន ពីឧបសគ្គនៃការបះបោរណាមួយដែលអាចកើតមានឡើង»។
យ៉ាងនេះក្តី មេបញ្ជាការកងទ័ពជើងគោកនៃកងយោធពលខេមរភូមិន្ទ លោក ហ៊ុន ម៉ាណែត ជាកូនប្រុសបង្កើតរបស់លោក ហ៊ុន សែន ផងនោះ ក្នុងពិធីរំឭកខួប២០ឆ្នាំនៃការបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមន្ទ កាលពីម្សិលមិញ បានប្តេជ្ញាថា នឹងកម្ទេចរាល់ឧបាយកលបង្កើតឲ្យមានបដិវត្តពណ៌លើទឹកដីកម្ពុជា និងប្រឆាំងដាច់ខាតចំពោះការជ្រៀតជ្រែកផ្ទៃក្នុងកម្ពុជាពីមជ្ឈដ្ឋានខាងក្រៅ។
សហរដ្ឋអាមេរិក ក៏បានអំពាវឲ្យមេដឹកនាំបក្សកាន់អំណាចវេណេស៊ុយអេឡា លោក ម៉ាឌូរ៉ូ ចុះចេញពីដំណែង ដោយថា ប្រជាជនវេណេស៊ុយអេឡា រងការឈឺចាប់យូរគ្រប់គ្រាន់ហើយ ក្រោមការគ្រប់គ្រងបែបផ្ដាច់ការរបស់លោក។ អាមេរិកថា ខ្លួនត្រៀមខ្លួនរួចជាស្រេចហើយក្នុងការជួយស្តារលទ្ធិប្រជាធិបតេយ្យនៅវេណេស៊ុយអេឡាឡើងវិញ ក៏ដូចជាការផ្ដល់ជំនួយមនុស្សធម៌នានាដល់ពលរដ្ឋប្រទេសនេះ៕
