លោកនាយករដ្ឋមន្ត្រី ហ៊ុន សែន ប្រកាសធ្វើកំណែទម្រង់ស្ថាប័នរដ្ឋដោយលុបចោលការិយាល័យថ្នាក់ស្រុករបស់ក្រសួងមួយចំនួន និងបង្រួមក្រសួងខ្លះចូលគ្នា ដោយថា ដើម្បីជំរុញប្រសិទ្ធភាពការងារ និងបង្កើនកំណើនសេដ្ឋកិច្ចជាតិ។
ក្នុងពិធីជួបសំណះសំណាលជាមួយកម្មករ នៅខេត្តកំពត នាថ្ងៃនេះ លោកនាយករដ្ឋមន្ត្រី ហ៊ុន សែន ថ្លែងថា នៅពេលខាងមុខការិយាល័យរបស់ក្រសួងមួយចំនួននៅតាមស្រុកនឹងត្រូវលុបចោល ដោយទុកតែការិយាល័យ អប់រំ សុខាភិបាល នគរបាល យោធា និងដែនដី ដោយថា ការិយាល័យទាំងអស់នេះ មានតួនាទីសំខាន់ក្នុងការបម្រើសេវាដល់ប្រជាពលរដ្ឋ។
លោកថា៖ «ក្រៅពីក្រសួង មានអគ្គនាយក មាននាយកដ្ឋាន មានការិយាល័យ ហើយមានមន្ទីរនៅតាមខេត្ត និងមានការិយាល័យនៅតាមស្រុក នៅពេលខាងមុខនឹងលុបចោលការិយាល័យនៃអង្គភាពនៅក្រសួងមួយចំនួន នៅថ្នាក់ស្រុកតែម្ដង។ របស់ដែលត្រូវទុកតំបន់ប្រតិបត្តិការ គឺផ្នែកកងទ័ព ទុក នគរបាលត្រូវទុក ខាងសុខាភិបាលត្រូវទុក អប់រំត្រូវទុក រៀបចំដែនដីត្រូវទុក ព្រោះអាហ្នឹង វាសំខាន់គ្រប់គ្រង់ដីធ្លី កើតទំនាស់ច្រើនណាស់ ក្រៅពីនោះយកមករៀបចំ ជាកញ្ចប់របស់វា»។
ក្រៅពីលុបការិយាល័យក្រសួងមួយចំនួននៅតាមស្រុក លោក ហ៊ុន សែន ថ្លែងថា ក្រសួងមួយចំនួនក៏ត្រូវដាក់បញ្ចូលគ្នាដែរ ដូចជា ក្រសួងកសិកម្ម ក្រសួងធនធានទឹក អភិវឌ្ឍន៍ជនបទ ក្រសួងឧស្សាហកម្ម ក្រសួងរ៉ែថាមពល ហើយក្រសួងសង្គមកិច្ច និង វប្បធម៌ ជាដើម ។ លោកបន្តថា ការលុបការិយាល័យនៅតាមស្រុក និងការបង្រួមក្រសួងនេះ ដើម្បីជំរុញប្រសិទ្ធភាពការងារឲ្យកាន់តែប្រសើរជាមុន និងបង្កើនកំណើនសេដ្ឋកិច្ចជាតិផងដែរ។
បើតាមបញ្ជីឈ្មោះក្រសួង និងស្ថាប័នជាតិនៃរាជរដ្ឋាភិបាល បច្ចុប្បន្ននេះ មានចំនួនសរុប ២៨ ក្រសួង និងរដ្ឋលេខាដ្ឋាន ៕