សមត្ថកិច្ចចម្រុះ នឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទប្រចាំឆ្នាំ២០១៨ ចាប់ពីដើមខែក្រោយនេះតទៅ។
សេចក្តីជូនដំណឹងកាលពីម្សិលមិញ អគ្គនាយកដា្ឋនពន្ធដារឲ្យដឹងថា ក្រុមការងារចម្រុះរាជធានី-ខេត្ត ដឹកនាំដោយមន្ត្រីពន្ធដាររួមសហការជាមួយអាជ្ញាធរមានសមត្ថកិច្ចថ្នាក់ក្រោមជាតិ នឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទប្រចាំឆ្នាំ២០១៨ នៅតាមគោលដៅមួយចំនួនលើកំណាត់ផ្លូវ សំខាន់ៗចាប់ពីថ្ងៃទី១ ខែកុម្ភៈ ឆ្នាំ២០១៩ ខាងមុខនេះតទៅ។
សេចក្តីជូនដំណឹងបន្តថា អគ្គនាយកដា្ឋនពន្ធដារជំរុញឲ្យម្ចាស់យានយន្តដែលខកខាន រួសរាន់ទៅប្រកាសបង់ពន្ធនិងបង់ប្រាក់ផាកពិន័យតាមច្បាប់នៅទីតាំងមួយចំនួនដូចជា នៅអគ្គនាយកដា្ឋនពន្ធដារផ្ទាល់ សាខាពន្ធដារខេត្តខណ្ឌ សាខាធនាគារកាណាឌីយ៉ា សាខាធនាគារអេស៊ីលីដា សាខាធនាគារវឌ្ឍនៈ ឬនៅសាខាធនាគារកម្ពុជាសាធារណៈ៕