រដ្ឋមន្រ្តីក្រសួងព័ត៌មានបានលើកឡើងក្នុងលិខិតមួយផ្ញើទៅរដ្ឋមន្រ្តីក្រសួងការបរទេសថា វិទ្យុ VOA និងវិទ្យុអាស៊ីសេរី អាចបើកការិយាល័យរបស់ខ្លួនឡើងវិញបាន ប៉ុន្តែត្រូវគោរពកាតព្វកិច្ចសារពើពន្ធជាមុនសិន។
ក្នុងលិខិតដដែលចេញផ្សាយនៅថ្ងៃនេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានប្រាប់រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ថា វិទ្យុសំឡេងសហរដ្ឋអាមេរិក(VOA) និងវិទ្យុអាស៊ីសេរី (RFA) បានធ្វើសកម្មភាពផ្សព្វផ្សាយព័ត៌មាននិងបើកការិយាល័យរបស់ខ្លួននៅកម្ពុជាជាយូរឆ្នាំមកហើយ ដោយពុំបានចុះបញ្ជីនៅក្រសួងព័ត៌មាននិងពុំបានអនុវត្តកាតព្វកិច្ចចុះបញ្ជីពន្ធដារស្របច្បាប់ និងបទប្បញ្ញត្តិស្តីពីពន្ធដារនោះទេ។
ប្រភពដដែល បញ្ជាក់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិកបានផ្តួចផ្តើមបិទការិយាល័យតំណាងរបស់ខ្លួនដោយខ្លួនឯង ដូច្នេះវិទ្យុទាំងពីរក៏មានសេរីភាពបើកការិយាល័យតំណាងរបស់ខ្លួនឡើងវិញបានដែរ។
វិទ្យុអាស៊ីសេរី បានបិទការិយាល័យរបស់ខ្លួននៅភ្នំពេញកាលពីថ្ងៃទី១២ ខែកញ្ញា ឆ្នាំ២០១៧៕