ក្រសួងការពារជាតិបានប្រកាសថ្កោលទោសលោក សម រង្ស៊ី ចំពោះការអំពាវនាវដល់កងទ័ពទាំងអស់ឲ្យប្រឆាំងរដ្ឋាភិបាលក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។
អ្នកនាំពាក្យក្រសួងការពារជាតិចេញសេចក្តីប្រកាសព័ត៌មាននៅថ្ងៃនេះ ថ្កោលទោសការអំពាវនាវរបស់លោក សម រង្ស៊ី កាលពីថ្ងៃទី២៥ ខែមករា។
ក្រសួងការពារជាតិ៖ « យើងចាត់ទុកថា រាល់សកម្មភាពណាដែលគាំទ្រទៅនឹងការអំពាវនាវរបស់ទណ្ឌិត សម រង្ស៊ី គឺជាអំពើខុសច្បាប់។ យើងទាំងអស់គ្នាប្តេជ្ញាចិត្តបង្ក្រាបដាច់ខាត ដើម្បីថែរក្សាសន្តិសុខ សណ្តាប់ធ្នាប់សង្គម និងសន្តិភាពជូនជាតិមាតុភូមិ។»
កាលពីថ្ងៃទី២៥ ខែមករា លោក សម រង្ស៊ី បានអំពាវនាវដល់កងទ័ពកុំឲ្យស្តាប់តាមការបញ្ជារបស់លោកនាយករដ្ឋមន្ត្រី ហ៊ុន សែន។
លោក សម រង្ស៊ី៖ «សូមអំពាវនាវដល់កងកម្លាំងប្រដាប់អាវុធ សូមកុំស្តាប់បញ្ជាពីនាយករដ្ឋមន្ត្រីខុសច្បាប់ ហ៊ុន សែន ដែលជាចោរប្លន់អំណាចពីប្រជារាស្ត្រ។ ថ្មីៗនេះ ជនផ្តាច់ការ ហ៊ុន សែន នេះបានណែនាំកងកម្លាំងប្រដាប់អាវុធ ឲ្យចាប់រូបខ្ញុំ នៅពេលដែលខ្ញុំវិលត្រឡប់មកប្រទេសកម្ពុជាវិញក្នុងឆ្នាំ ២០១៩ នេះ ហើយឲ្យបង្ក្រាបអ្នកប្រជាធិបតេយ្យ និងអ្នកស្នេហាជាតិ ដែលនឹងងើបឈរឡើង ដើម្បីទាមទារឲ្យមានការផ្លាស់ប្តូរជាវិជ្ជមាន ដោយសន្តិវិធី តាមបែបបទប្រជាធិបតេយ្យ គឺតាមរយៈការបោះឆ្នោត ដោយសេរី ត្រឹមត្រូវ និងយុត្តិធម៌។»
ក្នុងពិធីរំឭកខួប២០ឆ្នាំនៃការបង្កើតបញ្ជាការដ្ឋានកងទ័ពជើងគោកកាលពីថ្ងៃទី២៤ ខែមករា លោកនាយករដ្ឋមន្ត្រី ហ៊ុន សែនក៏បានព្រមានកម្ចេទកងទ័ពណាដែលប្រឆាំងរដ្ឋាភិបាល។
