លោក សម រង្ស៊ី ដែលកំពុងនិរទេសខ្លួនដោយខ្លួនឯងនៅក្រៅប្រទេសអះអាងថា មុនពេលលោកវិលត្រឡប់ចូលកម្ពុជាមុនបោះឆ្នោតឆ្នាំ២០១៣ លោក ហ៊ុន សែន បានទាក់ទងទៅលោក ដើម្បីសម្របសម្រួលស្ថានការណ៍។
នៅព្រឹកថ្ងៃសៅរ៍នេះ លោក សម រង្ស៊ី សរសេរនៅលើហ្វេសប៊ុករបស់លោកថា មុនពេលលោកវិលមកកម្ពុជាវិញនៅឆ្នាំ២០១៩នេះ លោកលាតត្រដាងរឿងរ៉ាវពេលលោកប្រកាសវិលចូលកម្ពុជាក្នុងឆ្នាំ២០១៣ និង២០១៥។
លោក សម រង្ស៊ី បន្តថា នៅឆ្នាំ២០១៣ លោក ហ៊ុន សែន បានទាក់ទងទៅលោក សុំសម្របសម្រួលដើម្បីប្រយោជន៍ជាតិ។
លោក សម រង្ស៊ី៖ «តែ ២-៣ ថ្ងៃក្រោយពីការប្រកាសរបស់ខ្ញុំ ស្រាប់តែលោក ហ៊ុន សែន បានទាក់ទងខ្ញុំ នៅទីក្រុងប៉ារីស ដើម្បីប្រាប់ខ្ញុំថា “សូមឯកឧត្តមរង់ចាំបន្តិច មុននឹងអញ្ជើញមក ពីព្រោះខ្ញុំ (ហ៊ុន សែន) កំពុងតែលៃលកឲ្យព្រះមហាក្សត្រ លើកលែងទោសជូនឯកឧត្តម ក្នុងស្មារតីបង្រួបបង្រួមជាតិ”។»
ចំណែកការប្រកាសវិលត្រឡប់ចូលប្រទេសក្នុងឆ្នាំ២០១៥ លោកថា លោក ហ៊ុន សែន ព្រមានចាប់រូបលោក ចំណែកលោក ស ខេង និងឯកអគ្គរដ្ឋទូតអាមេរិកប្រចាំកម្ពុជា ទាក់ទងទៅលោកថា ឲ្យផ្អាកវិលចូលកម្ពុជា ព្រោះស្ថានការណ៍តានតឹងខ្លាំង។
ទោះយ៉ាងណានៅក្នុងសប្តាហ៍នេះ លោក ស ខេង បញ្ជាក់លើផេកហ្វេសប៊ុករបស់លោក នៅក្នុងសប្តាហ៍នេះថា លោកមិនបានទាក់ទងសម្របសម្រួលជាមួយលោក សម រង្ស៊ី ទេ។
ចំណែកលោក ហ៊ុន សែន ថ្លែងកាលពីម្សិលមិញថា លោកត្រៀមចាប់ខ្លួនលោក សម រង្ស៊ី ហើយអ្នកដែលអមដំណើរជាមួយលោក សម រង្ស៊ី ក៏អាចត្រូវចាប់ខ្លួនដែរ។
លោក សម រង្ស៊ី ប្រកាសថា នឹងវិលមកកម្ពុជាវិញនៅពេលឆាប់ៗនេះ ប៉ុន្តែមិនបានបញ្ជាក់ថា មកថ្ងៃណាឲ្យប្រាកដនោះទេ។