ទីភ្នាក់ងារព័ត៌មានម៉ាឡេស៊ី Bernama បានចុះផ្សាយថា នាយករដ្ឋមន្ត្រី លោក មហាធៀ មហាមេធ រំពឹងថា រដ្ឋាភិបាលម៉ាឡេស៊ី នឹងអាចកាត់បន្ថយទំហំបំណុលសាធារណៈរបស់ប្រទេសនេះបាន នៅក្នុងរយៈពេលពីរបីឆ្នាំខាងមុខនេះ។
ទីភ្នាក់ងារព័ត៌មានម៉ាឡេស៊ី បានចុះផ្សាយថា លោក មហាធៀ បានថ្លែងបែបនេះអំឡុងពេលលោកនិយាយនៅក្នុងកិច្ចពិភាក្សាមួយជាមួយសមាជិកនៃសមាគមអាស៊ី នៅឯទីក្រុងញូវយ៉ក កាលពីថ្ងៃម្សិលមិញនេះ។
លោក មហាធៀ បានថ្លែងថា រដ្ឋាភិបាលរបស់លោកនឹងផ្ដោតសំខាន់លើកិច្ចខិតខំប្រឹងប្រែងស្ដារឡើងវិញនូវសុខមាលភាពប្រជាជន និងសង្គ្រោះសេដ្ឋកិច្ចជាតិនៅក្នុងពេលបច្ចុប្បន្ននេះ។
នាយករដ្ឋមន្ត្រីម៉ាឡេស៊ីរូបនេះ បានថ្លែងថា ជាមេដឹកនាំរដ្ឋាភិបាល រឿងដំបូងដែលលោកត្រូវធ្វើនៅក្នុងរយៈពេលពីរបីឆ្នាំខាងមុខនេះ គឺត្រូវដោះស្រាយបញ្ហាដែលបន្សល់ទុកដោយរដ្ឋាភិបាលមុន ដែលជំពាក់បំណុលបរទេសក្នុងចំនួនដ៏មហិមាដល់ទៅ ២៤១ពាន់លានដុល្លារ។
ជាមួយទំហំបំណុលប្រទេសជាតិដ៏ធំមហិមាបែបនេះ លោក មហាធៀ បានថ្លែងថា គ្មានប្រទេសគេអនុញ្ញាតឲ្យមានទំហំចំណាយលើសចំណូលនោះឡើយ ហើយលោកថា លោកភ្ញាក់ផ្អើលដែលដឹងថា រដ្ឋាភិបាលមុនបានអនុញ្ញាតឲ្យបញ្ហានេះកើតឡើង។
ទីភ្នាក់ងារព័ត៌មានម៉ាឡេស៊ី បានដកស្រង់សម្ដីលោក មហាធៀ ដែលបានថ្លែងបន្តថា រដ្ឋាភិបាលរបស់លោកបានសម្រេចលុបចោល និងសើរើគម្រោងធំៗមួយចំនួន ដែលបានកាត់បន្ថយទំហំបំណុលទាំងមូល ចាប់តាំងពីលោកចូលកាន់តំណែងកាលពីខែឧសភាឆ្នាំមុនមក។
ក្រោយពីឡើងកាន់តំណែងសារជាថ្មីបានជាងកន្លះឆ្នាំមក រដ្ឋាភិបាលលោក មហាធៀ បានសម្រេចលុបចោលកាលពីថ្ងៃទី២១ ខែមករានេះ នូវគម្រោងរថភ្លើងដែលគាំទ្រហិរញ្ញវត្ថុដោយប្រទេសចិនមានតម្លៃដល់ទៅ ២០ពាន់លានដុល្លារ៕
