រដ្ឋមន្ត្រីពាណិជ្ជកម្មកម្ពុជា លោក ប៉ាន សូរស័ក្តិ បានអះអាងថា អាមេរិកគឺជាទីផ្សារធំលំដាប់ទី២សម្រាប់ទំនិញកម្ពុជា ក្រោយពីទំហំពាណិជ្ជកម្មទ្វេភាគីកម្ពុជា-អាមេរិក បានកើនឡើងដល់តម្លៃ ៣.៣១ពាន់ដុល្លារកាលពីឆ្នាំ២០១៨កន្លងមកនេះ។ នេះបើតាមទំព័រហ្វេសប៊ុករបស់ក្រសួងពាណិជ្ជកម្មផ្សព្វផ្សាយនៅថ្ងៃនេះ។
ទំព័រហ្វេសប៊ុកក្រសួងពាណិជ្ជកម្ម បានដកស្រង់សម្ដី់លោក ប៉ាន សូរស័ក្តិ ដែលបានថ្លែងបែបនេះនៅក្នុងពិធីបើកកិច្ចប្រជុំក្រុមប្រឹក្សាចម្រុះលើកទី ៥ ស្ដីពីកិច្ចព្រមព្រៀងក្របខណ្ឌវិនិយោគ និងពាណិជ្ជកម្មរវាងកម្ពុជា និងអាមេរិក នៅឯខេត្តសៀមរាប នៅថ្ងៃនេះ។
រដ្ឋមន្ត្រីពាណិជ្ជកម្មកម្ពុជារូបនេះ ត្រូវបានដកស្រង់សម្ដីដែលបានថ្លែងថា ទំហំពាណិជកម្មទ្វេភាគីកម្ពុជា-អាមេរិក មានតម្លៃដល់ទៅ ៣.៣១ពាន់លានដុល្លារកាលពីឆ្នាំ២០១៨កន្លងមក ដោយមានកំណើនដល់ទៅ ២៧ភាគរយ បើធៀបនឹងទំហំ ២.៦១ពាន់លានដុល្លារកាលពីឆ្នាំ២០១៧។
លោក ប៉ាន សូរស័ក្តិ ត្រូវបានដកស្រង់សម្ដីដែលថ្លែងបន្តថា ទំហំនៃការនាំចេញទំនិញកម្ពុជាទៅកាន់ទីផ្សារអាមេរិក មានតម្លៃដល់ទៅ ២.៨៨ពាន់លានដុល្លារ ខណៈដែលកម្ពុជានាំចូលទំនិញពីអាមេរិកវិញ មានតម្លៃតែ ៤២៦លានដុល្លារអាមេរិកប៉ុណ្ណោះ។
តាមរយៈទំហំពាណិជ្ជកម្មទ្វេភាគីបែបនេះ រដ្ឋមន្ត្រីពាណិជ្ជកម្មកម្ពុជាបានចាត់ទុកអាមេរិកជាទីផ្សារធំលំដាប់ទី ២ សម្រាប់ទំនិញនាំចេញពីកម្ពុជា។
ក្រៅពីបង្ហាញឲ្យដឹងពីទំហំពាណិជ្ជកម្មកម្ពុជា-អាមេរិក លោក ប៉ាន សូរស័ក្តិ ក៏បានឲ្យដឹងផងដែរថា ទំហំនៃការនាំចេញទំនិញកម្ពុជាទៅកាន់ទីផ្សារអន្តរជាតិ បានកើនតម្លៃដល់ជាង ១២.១ពាន់លានដុល្លារអាមេរិក ដោយបានកើនឡើងដល់ទៅ ១០ភាគរយកាលពីឆ្នាំ២០១៨កន្លងមកនេះ បើធៀបទៅនឹងតួលេខកាលពីមួយឆ្នាំមុន ហើយទំហំនៃការនាំចេញទំនិញកម្ពុជាទៅទីផ្សារអន្តរជាតិនេះ ត្រូវបានរំពឹងថា នឹងកើនឡើងដល់ ១៣ពាន់លានដុល្លារនៅឆ្នាំនេះ៕