ក្រុមហ៊ុនចិនដែលបានទទួលសិទ្ធិវិនិយោគបន្តពីក្រុមហ៊ុនកូរ៉េខាងត្បូងក្នុងការសាងសង់អគារ Golden Tower កម្ពុស់ ៤២ជាន់នោះ បានអះអាងថា អគារមួយនេះនឹងត្រូវសាងសង់បញ្ចប់ទាំងស្រុងនៅដើមឆ្នាំ២០២០ខាងមុខ បន្ទាប់ពីបញ្ចប់ការចាក់បេតុងនៅថ្ងៃនេះ។
ក្នុងពិធីបញ្ចប់ការសាងសង់គ្រោងអគារនាថ្ងៃនេះ ប្រធានក្រុមប្រឹក្សាក្រុមហ៊ុន HTWM លោក យ៉ូ លៀនស៊ី បានឲ្យដឹងថា ក្រុមហ៊ុនចិនមួយនេះ គ្រោងបញ្ចប់ការសាងសង់អគារមួយនេះ ឲ្យបានចប់ទាំងស្រុងនៅត្រឹមឆ្នាំក្រោយនេះ។
បើតាមវិនិយោគិនចិនរូបនេះ ក្រុមហ៊ុន HTWM គ្រោងនឹងបញ្ចប់ការសាងសង់ផ្នែកខាងក្រៅអគារនៅត្រឹមខែមិថុនាខាងមុខនេះ មុននឹងបញ្ចប់ការតុបតែងផ្ទៃក្នុងអគារនៅត្រឹមចុងឆ្នាំ២០១៩នេះ។
អគារ Golden Tower ដែលស្ថិតលើផ្ទៃដីទំហំប្រហែល ១៤ម៉ឺនម៉ែត្រការ៉េនេះ ត្រូវបានវិនិយោគដំបូងដោយក្រុមហ៊ុនកូរ៉េខាងត្បូងឈ្មោះថា Yon Woo Cambodia កាលពីឆ្នាំ២០០៨ ជាមួយទំហំទឹកប្រាក់វិនិយោគដល់ទៅ ២០០លានដុល្លារអាមេរិក។
ដំណើរការសាងសង់អគារនេះ បានស្ថិតក្នុងដំណើររអាក់រអួលអស់រយៈពេលជាច្រើនឆ្នាំ មុននឹងត្រូវបានផ្ទេរសិទ្ធិវិនិយោគបន្តទៅឲ្យក្រុមហ៊ុន Shenzhen Hongtao និងក្រុមហ៊ុន Waiman ដែលជាក្រុមហ៊ុនវិនិយោគមកពីប្រទេសចិន៕