កងកម្លាំងយោធាក្នុងប្រទេស បានបង្ហាញជំហរគាំទ្ររដ្ឋាភិបាលដឹកនាំដោយលោកនាយករដ្ឋមន្ដ្រី ហ៊ុន សែន ដែលគំរាមកម្ទេចអតីតមេដឹកនាំគណបក្សប្រឆាំងនៅក្រៅប្រទេស លោក សម រង្ស៊ី ឬក្រុមប្រឆាំងរដ្ឋាភិបាល។
តាមរយៈបណ្ដាញសង្គមហ្វេសប៊ុក កាលពីថ្ងៃទី២៥ មករាកន្លងមកនេះ ប្រធានស្ដីទីគណបក្សសង្គ្រោះជាតិ លោក សម រង្ស៊ី បានប្រកាសអំពីគម្រោងធ្វើមាតុភូមិនិវត្តន៍នាពេលខាងមុខ ដោយថា អាចមានប្រជាពលរដ្ឋ អ្នកស្នេហាលទ្ធិប្រជាធិបតេយ្យ និងអ្នកគាំទ្រជាច្រើននាក់ ត្រៀមទៅទទួលរូបលោក។
លោក សម រង្ស៊ី ក៏បានអំពាវនាវទៅកងកម្លាំងប្រដាប់អាវុធ កុំឲ្យស្ដាប់តាមបញ្ជាលោក ហ៊ុន សែន និងកុំបាញ់ប្រជាពលរដ្ឋស្លូតត្រង់ និងជំរុញពួកគេឲ្យឈរខាងប្រជាពលរដ្ឋ ដើម្បីទាមទារសេរីភាព និងយុត្តិធម៌។
លោក សម រង្ស៊ី ថ្លែងបន្ថែមកាលពីថ្ងៃម្សិលមិញថា៖ «ហើយខ្ញុំធ្វើនេះ មិនមែនប្រថុយប្រថានទេបងប្អូន យើងធ្វើអីទាល់តែគិតមែនទែន ពេលវេលាមកដល់ហើយ ឪកាសមកដល់ហើយ អញ្ចឹងកុំឲ្យរបូត ប្រើឪកាសឲ្យទាន់ពេលវេលាគេមានកាំភ្លើងគេមានអាវុធ មានកងទ័ព គេមានតុលាការ […] សូមអញ្ជើញបងប្អូនយើងទៅស្រុកខ្មែរ ទៅសង្គ្រោះម្ដាយយើងឲ្យទាន់ពេលវេលា។ បើ ហ៊ុន សែន សឺង ហ៊ុន សែន ត្រូវតែហ៊ាន ហ៊ុន សែន ជាមនុស្សកំសាក ហ៊ុន សែន យកប៉ូលិស ទាហានមកចាប់ខ្ញុំ ហ៊ុន សែន ជាមនុស្សកំសាក»។
ប៉ុន្ដែ ភ្លាមៗក្រោយពីលោក សម រង្ស៊ី ប្រកាសអំពីគម្រោងធ្វើមាតុភូមិនិវត្តន៍ និងអំពាវនាវឲ្យកងកម្លាំងប្រដាប់អាវុធកុំស្ដាប់តាមបញ្ជារដ្ឋាភិបាលដឹកនាំដោយបក្សកាន់អំណាចនោះ ក្រសួងការពារជាតិ មន្ដ្រីជាន់ខ្ពស់កងទ័ពជើងទឹក និងជើងគោក និងបញ្ជាការដ្ឋានយោធាជាច្រើនទៀត បានថ្កោលទោសចំពោះអតីតមេដឹកនាំបក្សប្រឆាំងរូបនេះ ហើយពួកគេប្ដេជ្ញាត្រៀមកម្ទេចក្រុមប្រឆាំងនឹងរដ្ឋាភិបាលផងដែរ។
ក្រុមមេដឹកនាំកងទ័ពបានសម្ដែងជំហរគាំទ្ររបស់ពួកគេតាមរយៈសេចក្ដីថ្លែងការណ៍ ឬកិច្ចសម្ភាសនានាដែលត្រូវបានចុះផ្សាយជាបន្តបន្ទាប់ដោយសារព័ត៌មានស្និទនឹងរដ្ឋាភិបាល Fresh News។
ក្នុងសេចក្ដីថ្លែងការណ៍មួយកាលពីថ្ងៃម្សិលមិញនេះ អ្នកនាំពាក្យក្រសួងការពារជាតិ បានថ្លែងថា៖ «កងយោធពលខេមរភូមិន្ទ ត្រៀមខ្លួនរួចជាស្រេចហើយ ដើម្បីអនុវត្តនូវដីការបស់តុលាការនៃព្រះរាជាណាចក្រកម្ពុជាក្នុងការចាត់វិធានការចំពោះជនដែលតុលាការតាមចាប់ខ្លួន»។
បន្ទាប់ពីក្រសួងការពារជាតិចេញសេចក្ដីថ្លែងការណ៍បែបនេះ បញ្ជាការដ្ឋានផ្សេងៗនៃកងទ័ព ត្រូវបានដកស្រង់សម្ដីដោយសារព័ត៌មាន Fresh News ដែលចុះផ្សាយថា ពួកគេសុទ្ធតែថ្កោលទោស និងប្រឆាំងដាច់ខាតចំពោះអតីតមេដឹកនាំបក្សប្រឆាំង លោក សម រង្ស៊ី ដែលកំពុងរស់និរទេសខ្លួនឯងនៅបរទេស។
សារព័ត៌មាន Fresh News ក៏បានចុះផ្សាយទៀតថា អគ្គមេបញ្ជាការរង និងជាមេបញ្ជាការកងទ័ពជើងគោក លោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន ផងនោះ បានដឹកនាំក្រុមនិសិត្សនាយទាហានសកម្មជំនាន់ទី១៩ ទៅស្បថនៅមុខប្រាសាទអង្គរវត្ត ខេត្តសៀមរាប កាលពីថ្ងៃទី២៥ ខែមករាកន្លងទៅ។
ក្នុងពិធីនោះ លោក ហ៊ុន ម៉ាណែត បានរំលឹកឲ្យនាយទាហានទាំងនោះ មានភាពស្មោះត្រង់ចំពោះជាតិ សាសនា ព្រះមហាក្សត្រ និងត្រូវការពាររដ្ឋាភិបាលស្របច្បាប់។
ខេត្តសៀមរាប, ថ្ងៃសុក្រ ទី២៥ មករា ២០១៩ពិធីសច្ចាប្រណិធានរបស់និស្សិតនាយទាហានសកម្មជំនាន់ទី១៩ នៅប្រាសាទអង្គរវត្ត។
Posted by Hun Manet on Thursday, January 24, 2019
អ្នកវិភាគនយោបាយ លោកបណ្ឌិត ឡៅ ម៉ុងហៃ លើកឡើងថា បើលោក សម រង្ស៊ី វិលត្រឡប់មកប្រទេសកម្ពុជាវិញក្នុងស្ថានភាពបែបនេះ វានឹងបង្កប៉ះពាល់ធ្ងន់ធ្ងរដល់សង្គមកម្ពុជា។
អ្នកវិភាគនយោបាយរូបនេះ មើលឃើញថា ការប្រកាសជំហរគាំទ្ររបស់កងទ័ពចំពោះរដ្ឋាភិបាលនេះ គឺមានគោលដៅទប់ស្កាត់ការអំពាវនាវរបស់លោក សម រង្ស៊ី និងម្យ៉ាងទៀត ដើម្បីរារាំងប្រជាពលរដ្ឋ មិនឲ្យងើបឡើងតវ៉ាប្រឆាំងនឹងការដឹកនាំរបស់រដ្ឋាភិបាលសព្វថ្ងៃ។
ក្នុងពិធីប្រារព្ធខួប ២០ឆ្នាំនៃថ្ងៃបង្កើតបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ កាលពីថ្ងៃទី២៤មករា ក្រោយពីបញ្ចប់ដំណើរទស្សនកិច្ចទៅប្រទេសចិននោះ លោក ហ៊ុន សែន ក៏បានគំរាមកម្ទេចចោលកងទ័ពណាដែលលោកហៅថា ទ័ពប្រឆាំងនឹងរដ្ឋាភិបាលផងដែរ។
អង្គការឃ្លាំមើលសិទ្ធិមនុស្ស Human Rights Watch បានលើកឡើងនៅក្នុងរបាយការណ៍របស់ខ្លួនកាលពីដើមឆ្នាំ២០១៥ថា ស្ថិតក្នុងអំណាចជាង ៣ទសវត្សរ៍ លោកនាយករដ្ឋមន្ត្រី ហ៊ុន សែន តែងតែប្រើប្រាស់ម្ដងហើយម្ដងទៀតនូវអំពើហិង្សានយោបាយ ការបង្ក្រាប និងអំពើពុករលួយ ដើម្បីរក្សាអំណាច។
Human Rights Watch បានចាត់ថ្នាក់លោក ហ៊ុន សែន គឺជាមេដឹកនាំកាន់អំណាចយូរជាងគេបំផុតលំដាប់ទី៦ នៅក្នុងចំណោមមេដឹកនាំកាន់អំណាចយូរបំផុតនៅលើពិភពលោក ដោយស្ថិតនៅពីក្រោយមេដឹកនាំផ្ដាច់ការហ្ស៊ីបាវ៉េ លោក រ៉ូប៊ឺត មូហ្គាបេ ដែលត្រូវបានពួកយោធាទម្លាក់ពីអំណាចកាលពីចុងឆ្នាំ២០១៧កន្លងមក៕