អ្នកឃ្លាំមើលសិទ្ធិមនុស្ស បានជំរុញទៅអាជ្ញាធរទទួលខុសត្រូវចំពោះការបង្ក្រាបដ៏ហិង្សាទៅលើការតវ៉ាក្នុងជម្លោះដីធ្លីរបស់ពលរដ្ឋនៅខេត្តព្រះសីហនុកាលពីសប្ដាហ៍មុន ដែលបណ្ដាលឲ្យពលរដ្ឋមួយចំនួនរងរបួសត្រូវគ្រាប់កាំភ្លើងបៀមនៅជាប់ឆ្អឹងខ្នង។
ពលរដ្ឋរាប់រយនាក់មកពីភូមិគគីរ ស្ថិតក្នុងឃុំបិតត្រាង ស្រុកព្រៃនប់ បានប្រមូលផ្ដុំគ្នាដុតកង់ឡាន និងបិទផ្លូវ ដើម្បីជំទាស់ទៅនឹងសមត្ថកិច្ចចម្រុះរាប់រយនាក់ ចុះទៅអនុវត្តសាលដីការបស់តុលាការខេត្តព្រះសីហនុ កាលពីថ្ងៃទី២៤ ខែមករាសប្ដាហ៍មុន។
យ៉ាងហោចណាស់ពលរដ្ឋ ២នាក់ បានរងរបួស ក្នុងនោះបុរសម្នាក់ ត្រូវបានបាញ់ត្រូវចំផ្នែកស្មា ហើយគ្រាប់កាំភ្លើងបៀមជាប់ក្នុងឆ្អឹងខ្នង អំឡុងពេលប៉ះទង្គិចគ្នាជាមួយក្រុមសមត្ថកិច្ចដែលប្រដាប់ទៅដោយអាវុធ ខែល ដំបងឆក់ និងឡានទឹក។
បុរសដែលរងរបួសនោះ ត្រូវបានបញ្ជូនមកព្យាបាលរបួសនៅឯមន្ទីរពេទ្យក្នុងរាជធានីភ្នំពេញ ហើយស្ថិតនៅក្រោមការព្យាបាលនៅឡើយរហូតមកដល់ថ្ងៃនេះ។
ជាងនេះទៅទៀត វីដេអូដែលត្រូវបានផ្សព្វផ្សាយនៅលើបណ្ដាញសង្គមហ្វេសប៊ុកកាលពីចុងសប្ដាហ៍មុន បានបង្ហាញបុរសម្នាក់ស្ថិតក្នុងឯកសណ្ឋានកងរាជអាវុធហត្ថ បានធ្លាក់ច្រំទៅលើបុរសម្នាក់ទៀតស្ថិតក្នុងសម្លៀកបំពាក់ស៊ីវិល ខណៈបុរសម្នាក់នោះ ស្ថិតក្នុងស្ថានភាពដៃជាប់ចំណ និងដេកដួលនៅលើដី។
វីដេអូឃ្លីបនៃសកម្មភាពបាញ់រះ និងប្រើអំពើហឹង្សាវាយទាត់ធាក់ របស់កម្លាំងកងរាជអាវុធហត្ថខេត្តព្រះសីហនុ…
Posted by ដែន អយុធ្យា on Saturday, January 26, 2019
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា បានជំរុញទៅអាជ្ញាធរត្រូវតែទទួលខុសត្រូវចំពោះការបង្ក្រាបដ៏ហិង្សានេះទៅលើប្រជាពលរដ្ឋ ដែលពុំមានអ្វីការពារខ្លួននោះឡើយ។
លោក ស៊ឹង សែនករុណា មានប្រសាសន៍ថា៖ «យើងត្រូវពិនិត្យមើលអ្នកដែលដឹកនាំគណៈបញ្ជាការចម្រុះទាំងអស់ហ្នឹង ដែលទៅបង្ក្រាបហ្នឹង អ្នកណាដែលជាអ្នកដឹកនាំ ហើយបញ្ជាផ្ទាល់នៅទីនោះ ហើយអ្នកដែលចុះទៅផ្ទាល់តែម្ដង។ យើងមើលទៅមិនពិបាករកទេ ព្រោះមានវីដេអូ ឃើញមុខសញ្ញា អ្នកដែលប្រព្រឹត្តិហ្នឹង ហើយអ្នកដែលបញ្ជាពីក្រោយខ្នងហ្នឹង។ យើងចាត់វិធានការផ្លូវច្បាប់ទៅ ព្រោះច្បាប់មិនអនុញ្ញាតឲ្យយើងធ្វើអញ្ចឹងទេ»។
អ្នកគ្រប់គ្រងបច្ចេកទេសស៊ើបអង្កេតនៅអង្គការការពារសិទ្ធិមនុស្សលីកាដូ លោក អំ សំអាត ក៏ស្នើទៅអាជ្ញាធរឲ្យធ្វើស៊ើបអង្កេតមួយដោយឯករាជ្យ ដើម្បីចាប់ជនល្មើសមកផ្ដន្ទាទោសតាមច្បាប់ ដោយថា អំពើហិង្សានោះគឺជាបទល្មើសព្រហ្មទណ្ឌ។
លោក អំ សំអាត ថា៖ «ត្រូវតែមានការស៊ើបអង្កេត ដើម្បីស្វែករកការពិត និងជនដៃដល់ដែលបាញ់គ្រាប់ពិត ដែលបណ្ដាលឲ្យរងរបួស យកទៅអនុវត្តតាមផ្លូវច្បាប់ ព្រោះអនុវត្តសាលក្រមរឿងមួយ តែរឿងព្រឹត្តិការណ៍មួយ រឿងបង្កឲ្យរងរបួស ជារឿងបទល្មើសព្រហ្មទណ្ឌមួយ»។
អ្នកនាំពាក្យខេត្តព្រះសីហនុ លោក ឱ សារឿន បានច្រានចោលការទទួលខុសត្រូវចំពោះហេតុការណ៍ប៉ះទង្គិច ដោយថា សមត្ថកិច្ចមិនបានបាញ់ពលរដ្ឋទេ ទោះបីជាក្នុងហេតុការណ៍នោះ អាជ្ញាធរមានកាំភ្លើងក៏ដោយ។
លោកថា៖ «យើងសង្កេតឃើញបុរសម្នាក់ដែលត្រូវរបួសហ្នឹង គឺសមត្ថកិច្ចបានបញ្ជាក់ថា ការចុះប្រតិបត្តិការនេះ ពុំមានប្រើប្រាស់អាវុធប្រភេទឡុក ដែលបានរកឃើញក្បាលគ្រាប់នៅក្នុងខ្លួនបុរសរងគ្រោះ។ ដូច្នេះ សមត្ថកិច្ចបានដាក់ការសង្ស័យ អាចនឹងមានជនបន្លំណាមួយ ដែលគាត់ឆ្លៀតឱកាសពេលមានស្ថានការណ៍ច្របូកច្របល់។ ដូច្នេះ សមកិច្ចបានបើកការស៊ើបអង្កេត»។
អ្នកជំនាញផ្នែកច្បាប់ លោក សុក សំអឿន អះអាងថា ប្រសិនបើអំពើហិង្សានោះបង្កឡើងដោយជនទី ៣ លោកថា សមត្ថកិច្ចត្រូវតែទទួលខុសត្រូវលើការស្វែងរកជនបង្កនោះ មកផ្ដន្ទាទោស ដើម្បីផ្ដល់យុត្តិធម៌ដល់ជនរងគ្រោះ។
លោកថា៖ «ត្រូវតែរកយុត្តិធម៌ជូនអ្នករងគ្រោះ ទី២ បើសិនជាមានជនទី៣ តាមសម្ដីព័ត៌មានរបស់អាជ្ញាធរដូចថា មានជនទី៣ ក្រៅពីអាជ្ញាធរដែលបំពេញតួនាទី បើសិនមានជនទី៣ ខ្ញុំថា ដូចសំណាងណាស់ដែលបាញ់ទៅលើប្រជាពលរដ្ឋ បើមានជនទី៣មែន បើបាញ់ទៅលើអាជ្ញាធរទៅ មិនចោទប្រជាពលរដ្ឋមានកាំភ្លើងបាត់ហើយ រឹតតែមានបញ្ហាធំកើតឡើង»។
ព្រះរាជអាជ្ញារងសាលាដំបូងខេត្តព្រះសីហនុ លោក លឹម ប៊ុនហេង បានអះអាងថា តុលាការខេត្តនេះកំពុងតែធ្វើការស៊ើបអង្កេតលើករណីហិង្សានេះ ប៉ុន្តែ លោកបានបដិសេធផ្ដល់ព័ត៌មានលម្អិតអំពីដំណើរការនៃការស៊ើបអង្កេតនេះ។
លោក លឹម ប៊ុនហេង ប្រាប់ថា៖ «ប៉ុន្មានថ្ងៃនេះ ខាងរដ្ឋបាលខេត្ត ទាំងខាងអយ្យការហ្នឹង យើងប្រជុំគ្នាយកចិត្តទុកដាក់រឿងហ្នឹង។ អញ្ចឹង បើមានព័ត៌មានអីទៀត យើងនឹងជម្រាបជួន»។
ក្រៅពីពលរដ្ឋត្រូវបានរងរបួសដោយសារគ្រាប់កាំភ្លើងហើយនោះ ពលរដ្ខ ៦នាក់ទៀត ក៏ត្រូវបានសមត្ថកិច្ចចាប់ខ្លួនផងដែរនៅអំឡុងពេលនៃការបង្ក្រាបរបស់សមត្ថកិច្ចចម្រុះទៅលើការតវ៉ារបស់ប្រជាពលរដ្ឋជុំវិញជម្លោះដីធ្លីរបស់ពួកគេជាមួយអ្នកស្រី ហុង សួន ដែលជាភរិយារបស់ឧកញ៉ា ស៊ីវ គង់ទ្រីវ។
របាយការណ៍សង្ខេបមួយរបស់ក្រសួងរៀបចំដែនដី នគររូបនីយកម្ម និងសំណង់ ចេញផ្សាយចុងឆ្នាំមុន បានឲ្យដឹងថា វិវាទដីធ្លីទូទាំងប្រទេសជិត ១៥០០ករណីទៀត នៅមិនទាន់បានដោះស្រាយចប់នៅឡើយទេ៕