ការលេចធ្លាយព័ត៌មានផ្ទាល់ខ្លួន ឬព័ត៌មានឯកជនរបស់មនុស្សជាង ១ម៉ឺននាក់ បានក្លាយទៅជាសំណុំរឿងដ៏លេចធ្លោនៅក្នុងសង្គមសិង្ហបុរីនៅក្នុងរយៈពេលប៉ុន្មានថ្ងៃចុងក្រោយនេះ ដែលត្រូវបានគេចាត់ទុកថា ជាការរំលោភលើព័ត៌មានសម្ងាត់របស់បុគ្គលឯកជន។
សារព័ត៌មានសិង្ហបុរី Channel News Asia បានចុះផ្សាយថា ព័ត៌មានផ្ទាល់ខ្លួនរបស់មនុស្ស ១៤,២០០នាក់ ដែលរស់នៅជាមួយមេរោគអេដស៍ រួមទាំងព័ត៌មានសម្ងាត់ដទៃទៀតដូចជាលេខអត្តសញ្ញាណប័ណ្ណ និងលេខទំនាក់ទំនងជាដើម ត្រូវបានគេទម្លាយនៅលើប្រព័ន្អអ៊ិនធឹណិតនាពេលថ្មីៗនេះ។
រដ្ឋមន្ត្រីសុខាភិបាលសិង្ហបុរី លោក ហ្កាន គីមយ៉ុង ត្រូវបានសារព័ត៌មានដកស្រង់សម្ដីកាលពីថ្ងៃម្សិលមិញដែលបានថ្លែងទទួលស្គាល់អំពីការលេចធ្លាយព័ត៌មានឯកជនរបស់មនុស្សមានផ្ទុកមេរោគអេដស៍នេះ ហើយក៏បានសុំទោសចំពោះបញ្ហានេះផងដែរ។
សារព័ត៌មានបានចុះផ្សាយបន្តថា ទិន្នន័យដែលលេចធ្លាយទាំងនោះ មានសំណុំឯកសារនៃពលរដ្ឋសិង្ហបុរី ៥,៤០០នាក់ដែលត្រូវបានរកឃើញថាផ្ទុកមេរោគអេដស៍ចន្លោះពីឆ្នាំ១៩៨៥ ដល់ខែមករា ឆ្នាំ២០១៣ និងសំណុំឯកសារសុខភាពរបស់ជនបរទេស ៨,៨០០នាក់ ក្នុងនោះមានទាំងអ្នកកាន់ទិដ្ឋាការទេសចរណ៍ និងទិដ្ឋាការការងារ ដែលត្រូវបានធ្វើតេស្តរកឃើញផ្ទុកមេរោគអេដសដ៍នៅចន្លោះពីឆ្នាំ១៩៨៥ ដល់ឆ្នាំ២០១១។
ក្រៅពីថ្លែងសុំទោសជាសាធារណៈហើយ រដ្ឋមន្ត្រីសុខាភិបាលសិង្ហបុរី លោក ហ្កាន គីមយ៉ុង បានឲ្យដឹងថា អ្នកទម្លាយព័ត៌មានឯកជនទាំងនោះ គឺបុរសឈ្មោះ Mhiky K Farrera Brochez ដែលជាជនជាតិអាមេរិកមានផ្ទុកមេរោគអេដស៍ ហើយបានរស់នៅសិង្ហបុរីចាប់ពីឆ្នាំ២០០៨មក។ បុរសម្នាក់នេះ ត្រូវបានតុលាការសិង្ហបុរីកាត់ទោសពីបទល្មើសច្រើនករណី ដូចជា បទឆបោក និងបទល្មើសគ្រឿងញៀន៕
