រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា ការទៅទទួលលោក សម រង្ស៊ី នៅពេលលោកវិលត្រឡប់ចូលមកកម្ពុជាវិញ គឺជាការបង្កអស្ថិរភាពក្នុងសង្គម ដោយថា លោក សម រង្ស៊ី នៅជាទណ្ឌិតមិនទាន់ត្រូវបានព្រះមហាក្សត្រលើកលែងទោសឲ្យធ្វើនយោបាយវិញនៅឡើយទេ។
ការថ្លែងរបស់រដ្ឋមន្ត្រីក្រសួងមហាផ្ទៃលោក ស ខេង ធ្វើឡើងក្នុងពិធីផ្សព្វផ្សាយលទ្ធផលសន្និបាតគណៈកម្មាធិការកណ្ដាលលើកទី៤១ អាណត្តិទី៥ របស់គណបក្សប្រជាជនកម្ពុជា កាលពីថ្ងៃទី ២៦ ខែមករា ឆ្នាំ២០១៩ កន្លងមក ។
លោកថា៖ «ឥឡូវថា ចូលមក ចូលមក ចូលរបៀបម៉េចឥឡូវហ្នឹង។ ហើយអ្នកណាទៅជួនមក អ្នកណាទៅទទួល ព្រោះអត់មានវា ទី១ សម រង្ស៊ី អត់ត្រូវបានលើកលែងទោសដូចពីមុនទេ ពីមុនព្រះមហាក្សត្រលើកលែងទោស។ លោកឡាយព្រះហស្តលេខាលើកលែងទោស មកអ្នកណាទៅទទួលក៏បានដែរ មកតាមព្រលានយន្តហោះពោធិ៍ចិនតុង។ ប៉ុន(ប៉ុន្តែ)លើកនេះ សម រង្ស៊ី មកតាមណាមកតាមព្រលានយន្តហោះ មកតាមផ្លូវទឹក ឬតាមផ្លូវគោក អ្នកទៅទទួលយកហេតុផលអី ហ្នឹងហើយជាចលនាមួយដែលនាំឲ្យស្រុកទេសអស្ថិរភាព»។
ទោះបីជាយ៉ាង លោក ស ខេង មិនបានបញ្ជាក់ពីវិធានការលើអ្នកដែលទៅទទួលលោក សម រង្ស៊ី នោះទេ។
អ្នកតំណាងរាស្ត្រគណបក្សសង្រ្គោះជាតិ លោក គឹមសួរ ភារិទ្ធិ ចាត់ទុកការការថ្លែងរបស់លោក ស ខេង ថាជាការបំបិទសិទ្ធិប្រជាពលរដ្ឋ។
លោកថា៖ «ក្នុងនាមខ្ញុំជាប្រជាពលរដ្ឋម្នាក់ ហើយខ្ញុំធ្លាប់ធ្វើជាអ្នកតំណាង ២០ ឆ្នាំដូចអត់មានច្បាប់ណាហាមមិនឲ្យគេទៅទទួលមនុស្សម្នាក់ៗ ដែលគេស្រឡាញ់ទេ។ ទោះបីជាអ្នកនៅជាប់ទោស ត្រូវគេចោទប្រកាន់ វាអត់មានច្បាប់ហាម។ អញ្ចឹងបើសិនជាគាត់និយាយថា គ្រាន់តែអ្នកទៅទទួលខុសច្បាប់ កើតចលាចល វាអត់ត្រូវ។ វាទាល់តែអ្នកនឹងទៅបង្កបញ្ហាប៉ះពាល់ដល់សណ្ដាប់ធ្នាប់សង្គម កុំឲ្យតែពួកគាត់បង្កើតទៅ។ គេគ្រាន់តែទៅទទួលមនុស្សដែលគេស្រឡាញ់ មានអីខុសទៅ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា អ្នកនយោបាយគួរតែជជែកគ្នា ដើម្បីស្វែងដំណោះស្រាយ ជាជាងការប្រើប្រាស់វិធានការច្បាប់ និងប្រើប្រាស់កងកម្លាំង។
លោកថា៖ «អញ្ចឹងដំណោះស្រាយនយោបាយយើងចង់ឲ្យមានអ្នកនយោបាយជជែកគ្នាឲ្យរួចសិនទៅ តើអាចវិលត្រឡប់ដោយមធ្យាបាយណា ត្រូវជួយការពារ ថែរក្សាសន្ដិសុវត្ថិភាព ពេលនោះរបៀបម៉េច ហើយយើងជជែកគ្នាក្នុងន័យប្រកួតប្រជែងស្មើរភាពអី។ អាហ្នឹងរឿងប្រសើជាង ជាជាងលើយកតែកម្លាំង អាចប្រើប្រាស់កម្លាំងនេះ បានអាចប្រើប្រាស់កម្លាំងនោះបាន យកប៉ះទង្គិចគ្នា។ ខ្ញុំមានការព្រួយបារម្ភណាស់ខ្ញុំអត់ចង់ឃើញការប៉ះទង្គិច រវាងពលរដ្ឋជាមួយសមត្ថកិច្ច ឬពលរដ្ឋនិងពលរដ្ឋទេ»។
ក្នុងជួបជុំសមាជិកគណបក្សសង្គ្រោះជាតិនៅសហរដ្ឋអាមេរិកកាលពីថ្ងៃទី២៦ ខែមករា ឆ្នាំ២០១៩ លោក សម រង្ស៊ី បានប្រកាសថា លោកនឹងវិលចូលស្រុកខ្មែរ នៅឆ្នាំ២០១៩ ដោយថា មិនមែនជារឿងប្រថុយប្រថាននោះឡើយ ប៉ុន្តែជាដំណើរវិលចូលមាតុភូមិវិញ ប្រកបដោយផែនការណ៍ជាក់លាក់ ធ្វើយ៉ាងណាសង្គ្រោះប្រទេសកម្ពុជាឲ្យទាន់ពេលវេលា៕