អតីតមេដឹកនាំបក្សប្រឆាំង លោក សម រង្ស៊ី អំពាវនាវទៅសហភាពអឺរ៉ុបឲ្យបន្តរក្សាជំហរជួយស្តារប្រជាធិបតេយ្យនៅកម្ពុជា ដោយថាវិធានការព្យួរប្រព័ន្ធអនុគ្រោះពន្ធ (EBA) ជាការទប់ស្កាត់កម្ពុជា កុំឲ្យរអិលទៅរករបបផ្តាច់ការ។
លោក សម រង្ស៊ី បានសរសេរនៅលើហ្វេសប៊ុករបស់លោកកាលពីថ្ងៃចន្ទម្សិលមិញថា សហភាពអឺរ៉ុបត្រូវតែរក្សាគោលជំហរឲ្យរឹងមាំ ក្នុងការជួយស្តារលទ្ធិប្រជាធិបតេយ្យ នៅកម្ពុជា។
លោក សម រង្ស៊ី លើកឡើងទៀតថា៖ «ក្នុងនាមប្រជាពលរដ្ឋខ្មែរគ្រប់មជ្ឈដ្ឋាន ដែលគណបក្សសង្គ្រោះជាតិ ធ្វើជាតំណាង ខ្ញុំសូមបញ្ជាក់ទៅសហភាពអឺរ៉ុបថា ប្រតិកម្មរបស់សហភាពអឺរ៉ុបឆ្លើយតបទៅនឹងការរំកិលទៅរកអំណាចផ្តាច់ការនៅប្រទេសកម្ពុជា (គឺការព្យួរកម្មវិធីអនុគ្រោះពន្ធដារ EBA) គឺ ជាវិធានការត្រឹមត្រូវ និងសមស្រប ដែលយើងអាចទទួលយកបាន»។
អតីតមេដឹកនាំបក្សប្រឆាំងរូបនេះ បានបញ្ជាក់ថា គណបក្សសង្គ្រោះជាតិ នៅតែតំណាងឲ្យឆន្ទៈប្រជារាស្ត្រខ្មែរ យ៉ាងតិចពាក់កណ្តាលប្រទេស។
VOD មិនទាន់អាចសុំការបញ្ជាក់ពីតំណាងសហភាពអឺរ៉ុប ជុំវិញសារអំពាវនាវរបស់លោក សម រង្ស៊ី នេះបាននៅឡើយទេនៅថ្ងៃអង្គារនេះ ។
កាលពីថ្ងៃទី២១ ខែមករា ឆ្នាំ២០១៩នេះ ស្នងការនៃគណៈកម្មការអឺរ៉ុបទទួលបន្ទុកផ្នែកពាណិជ្ជកម្ម លោកស្រី សេស៊ីលីយ៉ា ម៉ាលស្ត្រុម បានបញ្ជាក់ជំហរលើបណ្តាញទំនាក់ទំនងសង្គម Twitter ក្រោយជំនួបជាមួយរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ថាសហភាពអឺរ៉ុបនូវតែមានកង្វល់ទាក់ទងនឹងលទ្ធិប្រជាធិបតេយ្យ សិទិ្ធមនុស្ស និងនីតិរដ្ឋនៅកម្ពុជា។ លោកស្រី ក៏បានបញ្ជាក់ផងដែរថា អឺរ៉ុបនឹងបន្តរក្សាជំហរធ្វើការពិភាក្សាជាមួយកម្ពុជាលើបញ្ហានេះ។
នាយករដ្ឋមន្ត្រីកម្ពុជា លោក ហ៊ុន សែន កាលពីថ្ងៃទី១៤ ខែមករា ឆ្នាំ២០១៩នេះ បានព្រមានធ្ងន់ៗថា ការដាក់ទណ្ឌកម្មសេដ្ឋកិច្ចណាមួយមកលើប្រទេសកម្ពុជា លោកថា មិនខុសពីសម្លាប់បក្សប្រឆាំងនោះទេ។
នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក មឿន តុលា ពន្យល់ថា ប្រព័ន្ធអនុគ្រោះព័ន្ធរបស់សហភាពអឺរ៉ុប និងសហរដ្ឋអាមេរិក ឲ្យមកកម្ពុជា លោកថា មានប្រភពចេញពីកិច្ចព្រមព្រៀងសន្តិភាពទីក្រុងប៉ារីស១៩៩១ ដែលកិច្ចព្រមព្រៀងនោះ បានដាក់លក្ខខណ្ឌឲ្យកម្ពុជា គោរពសិទ្ធិមនុស្ស និងលទ្ធិប្រជាធិបតេយ្យ។
លោក មឿន តុលា រំឭកថា បើអ្នកនយោបាយខ្មែរគិតប្រយោជន៍ជាតិ ពួកគេត្រូវរួមគ្នាជំរុញដំណើរការប្រជាធិបតេយ្យដ៏ពិតប្រាកដមួយ ដើម្បីឆ្លើយតបទៅនឹងលក្ខខណ្ឌស្របតាមការជំរុញរបស់សហគមន៍អន្តរជាតិ ។
លោកថា៖ «សម្រាប់ខ្ញុំ ខ្ញុំថា បើសិនជាអ្នកនយោបាយ ខ្ញុំអត់សំដៅទៅខាងណាទេ បើគាត់គិតពីប្រយោជន៍ពលរដ្ឋជាធំ គិតពីប្រយោជន៍ជាតិជាធំ លក្ខខណ្ឌរបស់សហភាពអឺរ៉ុបក៏ដោយ របស់សហរដ្ឋអាមេរិកក៏ដោយ វាអត់ធ្វើឲ្យរលាយ ឬក៏សាបសូន្យនូវអធិបតេយ្យភាពរបស់ប្រទេសទេ។ បើយើងមើលលក្ខខណ្ឌទាំងពីរហ្នឹង គេអត់បានតម្រូវឲ្យកម្ពុជា ត្រូវតែផ្តល់ដីសម្បទាន ឬក៏កាត់ខេត្តណាមួយរបស់កម្ពុជាឲ្យទៅប្រទេសទាំងពីរហ្នឹងដែរ»។
ដំណើរការដកប្រព័ន្ធអនុគ្រោះពន្ធរបស់សហភាពអឺរ៉ុបនេះ បានជំរុញឲ្យសមាគមន៍អ្នកជំនួយ៤០ ក្នុងនោះមានទាំង ប្រធានសភាពាណិជ្ជកម្មកម្ពុជា លោក គិត ម៉េង ផងដែរ បានចុះហត្ថលេខាលើលិខិតមួយផ្ញើទៅកាន់ស្នងការនៃគណៈកម្មការអឺរ៉ុបទទួលបន្ទុកផ្នែកពាណិជ្ជកម្ម កុំឲ្យដកប្រព័ន្ធអនុគ្រោះពន្ធនេះ។ ក្រុមអ្នកជំនួញទាំងនោះលើកឡើង ថាការដក EBA នឹង ប៉ះពាល់ដល់ជីវភាពរបស់កម្មករព្រមទាំងក្រុមគ្រួសាររបស់ពួកគេ ដែលពឹងផ្អែកទៅលើវិស័យកាត់ដេរ និងមានឥទ្ធិពលអវិជ្ជមានកាន់តែខ្លាំង ទៅដល់ស្ដ្រី៨៥ភាគរយរស់នៅតាមជនបទ ដែលជាកម្មការិនីកាត់ដេរ ក្នុងចំណោមអ្នកកាត់ដេរ៧០ម៉ឺននាក់៕
