អង្គការតម្លាភាពហៅកាត់ថា (TI) រកឃើញថាកម្ពុជា ធ្លាក់ចុះ១ពិន្ទុសម្រាប់សន្ទស្សន៍អំពើពុករលួយក្នុងឆ្នាំ២០១៨ បើធៀបរយៈពេលដូចគ្នានៃឆ្នាំ២០១៧ ហើយពិន្ទុនោះក៏ទាបបំផុតក្នុងចំណោមប្រទេសជាសមាជិកអាស៊ានផងដែរ។
របាយការណ៍របស់អង្គការតម្លាភាពកម្ពុជាឲ្យដឹងថា ប្រទេសកម្ពុជាបានទទួលចំណាត់ថ្នាក់ទី១៦១ ក្នុងចំណោមប្រទេសចំនួន១៨០ ដែលត្រូវបានបញ្ចូលក្នុងសន្ទស្សន៍នេះ ហើយចំណាត់ថ្នាក់នេះនៅដដែលដូចឆ្នាំមុន(១៦១/១៨០)។ របាយការណ៍ដដែល បង្ហាញថាក្នុងចំណោមប្រទេសជាសមាជិកអាស៊ានទាំង១០ ប្រទេសសឹង្ហបុរីជាប្រទេសដែលស្អាតស្អំជាងគេ ពោលគឺទទួលបានពិន្ទុរហូតដល់៨៥ ខណៈដែលកម្ពុជាទទួលបានតែ២០ពិន្ទុប៉ុណ្ណោះ។ ប្រភពដដែលឲ្យដឹងថា តាមរយៈពិន្ទុនេះកម្ពុជា នៅតែជាប្រទេសដែលមានកម្រិតអំពើពុករលួយខ្ពស់។
របាយការណ៍តម្លាភាពដដែលឲ្យដឹងថា សន្ទស្សន៍ចំណាត់ថ្នាក់ប្រទេស និងដែនដីសរុបចំនួន១៨០នោះ ត្រូវបានដាក់ដោយផ្អែកលើការយល់ឃើញរបស់អ្នកឯកទេស និងអ្នកជំនាញធុរកិច្ច អំពីកម្រិតនៃអំពើពុករលួយនៅក្នុងវិស័យសាធារណៈក្នុងប្រទេសនីមួយៗ ដោយប្រើប្រាស់មាត្រដ្ឋានពិន្ទុពីសូន្យទៅ១០០។ ពិន្ទុសូន្យ មានន័យថា ពុករលួយខ្លាំង ហើយ១០០ពិន្ទុគឺស្អាតស្អំខ្លាំង។
ក្នុងសន្និសីទសារព័ត៌មាន ស្តីពីសន្ទស្សន៍ នៃការយល់ឃើញអំពីអំពើពុករលួយ ឆ្នាំ២០១៨ នាថ្ងៃនេះ នាយកប្រតិបត្តិអង្គការតម្លាភាពកម្ពុជា លោក ព្រាប កុល ថ្លែងថា កម្ពុជាទទួលបាន២០ពិន្ទុ សម្រាប់សន្ទស្សន៍នៃការយល់ឃើញពីអំពើពុករលួយនៅឆ្នាំ២០១៨ បើធៀបរយៈពេលដូចគ្នានៃឆ្នាំ២០១៧ ពោលមានការធ្លាក់ចុះ១ពិន្ទុប៉ុណ្ណោះ។ លោកបន្តថា ដើមចមដែលនាំឲ្យធ្លាក់ចុះ១ពិន្ទុ ដោយសារពិន្ទុស្តីពីអភិបាលកិច្ចតាមបែបប្រជាធិបតេយ្យធ្លាក់ចុះពី១៩/១០០ ក្នុងឆ្នាំ២០១៧ មកត្រឹម១២/១០០ ក្នុងឆ្នាំ២០១៨។
លោកថ្លែងថា៖ «អ្វីដែលទាញកម្ពុជាឲ្យធ្លាក់១ពិន្ទុ ហើយចំណុចនេះ កក្តានេះ គឺនិយាយពីប្រជាធិបតេយ្យ និយាយអំពីពុករលួយ នយោបាយ និយាយអំពីការដោះស្រាយក្នុងប្រព័ន្ធយុត្តិធម៌ អ្វីដែលនាំឲ្យពិន្ទុកម្ពុជាធ្លាក់ចុះ ទាក់ទងទៅនឹងសុខភាពប្រជាធិបតេយ្យ ព្រោះចេញលទ្ធផលមកគឺថាប្រជាធិបតេយ្យនៅស្រុកខ្មែរអត់ល្អ បានធ្លាក់ចុះ »។
វីអូឌី មិនអាចសុំការបំភ្លឺពីប្រធានអង្គភាពប្រឆំាងអំពើពុករលួយលោក ឱម យិនទៀងបានទេ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា លោកមិនចាប់អារម្មណ៍នឹងរបាយការណ៍របស់អង្គការតម្លាភាពនោះទេ ដោយថា រដ្ឋាភិបាលកំពុងធ្វើកំណែទម្រង់រចនាសម្ព័ន្ធរបស់រដ្ឋមួយចំនួនទៀត ដើម្បីផ្តល់សេវាជូនប្រជាពលរដ្ឋឲ្យកាន់តែប្រសើរនិងស្របតាមគោលនយោបាយចតុកោណរបស់រដ្ឋាភិបាល។
លោកមានប្រសាសន៍ថា៖ «ពិន្ទុប៉ុន្មានក៏ដោយ គឺមិនគិតគួរយកបញ្ហានេះ យកមកគិតគូធ្វើជាមូលដ្ឋាន ។សម្រាប់ការអភិវឌ្ឍប្រទេសឲ្យរីកចំរើន យើងធ្វើទៅតាមកម្មវិធីនយោបាយរបស់គណបក្សប្រជាជនកម្ពុជា ដែលប្រែក្លាយទៅជាកម្មវិធីនយោបាយ ក៏ដូចជាយុទ្ធសាស្ត្រចតុកោណរបស់រាជរដ្ឋាភិបាល ដើម្បីកសាងប្រទេសជាតិឲ្យមានការរីកចំរើន» ។
អង្គការតម្លាភាព ផ្តល់ជាអនុសាសន៍ថា ដើម្បីកាត់បន្ថយអំពើពុករលួយបាន រដ្ឋាភិបាល ត្រូវធ្វើវិសោធនកម្មច្បាប់ប្រឆាំងអំពើពុករលួយ ជាពិសេសទាក់ទងនឹងការប្រកាសទ្រព្យសម្បត្តិ អនុម័តឲ្យទាន់ពេលនូវបទបញ្ញត្តិដែលលើកកម្ពស់សិទ្ធិពលរដ្ឋទទួលបានព័ត៌មានសាធារណៈ និងការពារបុគ្គលរាយការណ៍ ពង្រឹងស្ថាប័នដែលពាក់ព័ន្ធនឹងការលើកកម្ពស់នីតិរដ្ឋ ដោះស្រាយដោយតម្លាភាព បង្កបរិយាកាសឲ្យមានការចូលរួមយ៉ាងសកម្មពីអង្គការសង្គមស៊ីវិល និងប្រព័ន្ធផ្សព្វផ្សាយ ដើម្បីរួមគ្នាប្រឆាំងអំពើពុករលួយ។ អង្គការនេះ ក៏ជំរុញឲ្យបង្កើតយន្តការធានាគណនេយ្យភាព ប្រព័ន្ធត្រួតពិនិត្យ និងធានាតុល្យភាពអំណាចទាំងថ្នាក់ជាតិ ថ្នាក់ក្រោមជាតិ និងជំរុញវប្បធម៌សុចរិតភាព តម្លាភាពនៅគ្រប់ស្រទាប់នៃសង្គម៕
